Eron Islom Respublikasi parlamenti spikeri Muhammad Bagir G‘olibaf AQSH bilan sulh tuzish imkonsiz ekanini ma’lum qildi. Bu haqda Zamin.uz xabar berdi.
Uning so‘zlariga ko‘ra, bunga asosiy sabab Vashington tomonining o‘zaro kelishuvlardagi majburiyatlarni buzayotganidir. Rasmiy Tehron Qo‘shma Shtatlarga nisbatan chuqur tarixiy ishonchsizlikka ega va bu holat har gal takrorlanmoqda.
Muzokaralar uchun asos sifatida qabul qilingan o‘n banddan iborat taklifning uchta qismi AQSH tomonidan buzilgani qayd etildi. Birinchidan, Livanda zudlik bilan sulh tuzish va harbiy harakatlarni to‘xtatish bo‘yicha olingan majburiyat bajarilmadi.
Xalqaro hamjamiyat va mintaqa davlatlari vakillari, jumladan, Pokiston bosh vaziri ham bu talabni qo‘llab-quvvatlagan edi, biroq amalda hech qanday o‘zgarish kuzatilmadi. Ikkinchi holat Eron havo hududining buzilishi bilan bog‘liq.
Fors viloyati hududida Eron havo chegarasini noqonuniy kesib o‘tgan dushmanga tegishli uchuvchisiz uchar qurilma yo‘q qilindi. Bu harakat ikki tomonlama kelishuvda ko‘rsatilgan xavfsizlik kafolatlariga zid hisoblanadi.
Uchinchi masala esa Eronning yadroviy salohiyati va boyitish huquqiga daxldor. Kelishuvning oltinchi bandida belgilangan huquqlar poymol etilmoqda.
Eron tomoni muzokaralar boshlanmasidanoq bunday bosim va buzilishlar kuzatilayotganini ta’kidlamoqda. G‘olibafning fikricha, bunday sharoitda tomonlar o‘rtasida samarali muloqot o‘tkazish yoki barqaror sulhga erishish uchun hech qanday huquqiy va amaliy asos qolmagan.
Eron o‘z manfaatlarini himoya qilishda qat’iy turishini va xalqaro kelishuvlarga rioya etilishini talab qilishini bildirmoqda.