O‘zgidromet markazi joriy yilning 2 aprel kunidan 6 aprel sanasiga qadar respublikamiz hududlarida kuzatilishi kutilayotgan kuchli yog‘ingarchiliklar yuzasidan shoshilinch ogohlantirish bilan chiqdi. Bu haqda Zamin.uz xabar berdi.
Mutaxassislarning tahlillariga ko‘ra, kutilayotgan yomg‘irlar mamlakatimizning tog‘oldi va tog‘li hududlarida sel hamda suv toshqinlari xavfini keltirib chiqarishi mumkin. Shu sababli aholidan o‘ta ehtiyotkor bo‘lish va xavfsizlik qoidalariga qat’iy rioya qilish so‘ralmoqda.
Tabiiy ofat xavfi Qashqadaryo viloyatining Yakkabog‘, Dehqonobod, Chiroqchi, Kitob, Shahrisabz, Qamashi va G‘uzor tumanlarida, shuningdek, Surxondaryo viloyatining Sariosiyo, Uzun, Oltinsoy, Denov, Boysun, Sherobod, Sho‘rchi, Qumqo‘rg‘on hamda Muzrobot tumanlarida yuqori baholanmoqda. Samarqand viloyatining Urgut, Samarqand, Bulung‘ur, Nurobod, Qo‘shrabot, Kattaqo‘rg‘on, Payariq, Jomboy va Ishtixon tumanlari aholisi ham ogohlikka chaqiriladi.
Navoiy viloyatida Xatirchi, Navbahor, Nurota, Konimex, Karmana, Jizzax viloyatida esa Zomin, Baxmal, G‘allaorol, Sharof Rashidov, Forish va Yangiobod tumanlarida ham sel kelish ehtimoli mavjud. Toshkent viloyatining Ohangaron, Bo‘stonliq, Parkent, Piskent, O‘rtachirchiq, Yuqorichirchiq tumanlari hamda Angren va Olmaliq shaharlarida ham xavfsizlik choralarini ko‘rish zarur.
Shuningdek, Namangan, Farg‘ona va Andijon viloyatlarining tog‘oldi hududlarida joylashgan barcha tumanlarda ham yog‘ingarchilik oqibatlari kuzatilishi mumkin. Ushbu hududlarda istiqomat qiluvchi fuqarolar, tog‘li hududlarda hordiq chiqarayotgan dam oluvchilar hamda tog‘li yo‘llarda harakatlanayotgan haydovchilardan o‘z xavfsizligini ta’minlash uchun barcha zarur choralarni ko‘rish, imkon qadar xavfli hududlarga bormaslik tavsiya etiladi.
Ob-havo sharoiti murakkablashgan vaqtda ehtiyotkorlik o‘zingiz va yaqinlaringiz salomatligini saqlashda muhim ahamiyat kasb etadi. Vaziyatni nazorat qilib borish va rasmiy xabarlardan xabardor bo‘lish tavsiya etiladi.