Инженерҙың фотограф булып киткәне
Илфир Исламғазиндың фотоһүрәттәрендә элекке Өфөнө лә күрергә була
Башҡортостандың Милли музейында фотограф-пейзажсы, Рәсәй Фоторәссамдар союзы ағзаһы Илфир Исхаҡ улы Исламғазиндың шәхси күргәҙмәһе асылды. Ул авторҙың 80 йәше тулыуға арнала. Экспозицияла ижадсының 60-тан артыҡ эше ҡуйылған.
“Үҙегеҙҙең беренсе төшөргән фотоһүрәтегеҙҙе иҫләйһегеҙме?” тигән һорауыма Илфир Исхаҡ улы күргәҙмәләге тәүге фотоға ишаралай:
– Бына ул, Өфөлә үткән ат сабышы. Ул ипподром хәҙер юҡ инде, күбеһе уның ҡайҙа урынлашҡанын да иҫләмәй. Октябрҙең 50 йыллығы урамы менән Ибраһимов бульвары араһында Оло Граждандар урамы буйлап тора ине ул. Унан арыраҡ – Цюрупа менән Революцион урамдары киҫелешенең ул саҡтағы торошо, унда шәхси йорттар тора ине әле (һүрәттәрҙә). Уларҙы Революцион урамындағы туғыҙ ҡатлы йорттарҙы төҙөгәндә төшөрөп алдым.
Ысынлап та, Башҡортостаныбыҙҙың иҫ киткес гүзәл күренештәре һынланған фотоһүрәттәр авторы һөнәре буйынса – инженер, уға тиклем йәшләй генә төҙөлөштә ташсы булып та эшләгән.
Саҡмағош районының Ҡалмашбаш ауылында йәшәгән малай мәктәп йылдарынан уҡ ижадҡа тартыла, һүрәт төшөрөү менән мауыға. Тора-бара, фотоһүрәттәрҙең донъяға пәйҙә булыу мәленә шаһит булғандан һуң, ошо шөғөл менән ҡыҙыҡһыныу күңеленә инеп оялай. Өфөлә ташсы һөнәренә уҡығанда, унан эшләгәндә лә, аҙаҡ төҙөлөш инженеры һөнәренә юғары белем алғанда ла фотоға төшөрөүен ташламай ул, ә тәүге эш хаҡына “Смена” фотоаппаратын һатып ала. Унан һуң алған “Зоркий”ы Илфир Исхаҡ улы менән бергә әрме хеҙмәтен дә “үтә”.
Төҙөлөш инженерының яуаплы хеҙмәте яратҡан шөғөлөн бер аҙға оноттороп торһа ла, күңелендәге ынтылыш юғалмай. Хаҡлы ялға сыҡҡас, Илфир Исхаҡ улы башкөллө ошо мауығыуына сума. Инде үҙгәргән замандың башҡа төрлө фотоаппараттарын да тиҙ арала өйрәнеп, хәҙер инде һанлы ҡорамал менән дә уртаҡ тел тапҡан оҫта ул.
Илфир Исламғазиндың фотоһүрәттәрендә – әрмеләге хеҙмәттәштәре, Башҡортостандың ҡабатланмаҫ күркәмлеккә эйә тәбиғәте, баш ҡалабыҙ урамдары. Өфөнөң элекке һәм хәҙергеһен фотоларҙа мәңгеләштергән ижадсы баш ҡалабыҙ тарихы йылъяҙмаһына ла үҙ өлөшөн индерә, тимәк.
Оҫтаның береһенән-береһе матур, сағыу фотоһүрәттәрен ҡарарға, Башҡортостаныбыҙҙың гүзәл тәбиғәтенә ҡабаттан ғашиҡ булырға тәләһәгеҙ, Милли музейҙағы күргәҙмәне мотлаҡ барып күрегеҙ, дуҫтар. Ваҡыт етерлек – ул 12 майға тиклем бара.
Рәүилә ҒАТАУЛЛИНА.
Автор фотолары.
