Башкортстан — лидерлар өчлегендә!
Республика укучылары «Сириус»та химия буенча Бөтенрусия олимпиадасы җиңүчеләре арасында.
Башкортстан илнең интеллектуаль лидерлары арасында позицияләрен елдан-ел ныгыта. Безнең укучылар, төп технологик юнәлешләр буенча әзерлекнең югары дәрәҗәсен раслап, техник дисциплиналарда ышанычлы җиңү яулый. Республика копилкасында бүген агымдагы елгы Олимпиаданың 34 дипломы бар. 24 предметның 9ыннан финал сынаулары тәмамланды, укучыларны алда тагын 15е көтә.
6 апрельдә атналык оператив киңәшмәдә төбәк җитәкчесе Радий Хәбиров республика педагогларына һәм укучыларына Башкортстанның дәүләт бүләкләрен тапшырды.
Башкортстанның Мактау грамотасына Уфа радиоэлектроника, телекоммуникацияләр һәм хәвефсезлек колледжы директоры Игорь Нуйкин лаек булды. Мәгариф учреждениесе «Профессионаллар» чемпионатының төбәк этабында лидерларның берсе булды, шулай ук узган елда «Яшьләр һәм балалар» гомумдәүләт проектының «Профессионалитет» федераль проектын гамәлгә ашыру буенча Русиядә иң яхшы 10 колледж исемлегенә керде.
— Узган ел нәтиҗәләре буенча безнең колледж илебездә иң яхшыларның берсенә әйләнде. Эшне яхшы оештырганыгыз өчен рәхмәт, – диде Радий Хәбиров. — Безнең һөнәри белем бирү системасында мөһим бурычларны үтәүче 92 колледж эшли. Беренче чиратта, бу икътисад өчен кирәкле кадрлар әзерләү. Соңгы елларда бу өлкәгә шактый күп акча керттек һәм аны камилләштерүне дәвам итәчәкбез.
Шулай ук төбәк җитәкчесе «Сириус» мәгариф үзәгендә химия буенча Бөтенрусия олимпиадасында призлы урыннар алган республика командасы вәкилләрен һәм аларның остазларын бүләкләде.
Башкортстан Башлыгының Рәхмәте белән Республика инженерлык лицей-интернатының химия укытучысы Айнур Гомәров, Олимпиада хәрәкәте остазларының төбәк ассоциациясе рәисе Тимур Маннанов һәм Уфа дәүләт нефть техник университеты студенты Вадим Харисов бүләкләнде. Октябрьский шәһәре 2нче гимназиясенең 10нчы сыйныф укучысы Динияр Галимов һәм Нефтекама 1нче лицееның 11нче сыйныф укучысы Денис Филипповка Башкортстан Башлыгының Рәхмәт хатлары тапшырылды.
— Минем күңелемдә сәләтле укучыларыбызның уңышларыннан һәрвакыт канәгатьлек тойгысы. Бу укучылар өчен республикада киң ярдәм чаралары каралган. Бу Бөтенрусия ярышларында җиңүчеләр һәм призерлар саны елдан-ел арта баруга китерә, — дип ассызыклады Радий Хәбиров. — «Сириус»тагы химия буенча Бөтенрусия олимпиадасында дипломнар саны буенча Башкортстан нәтиҗәлелеге буенча ТОП-3 төбәккә керде, Мәскәү һәм Мәскәү өлкәсеннән генә калышты. Химикларның бөтен командасына рәхмәт һәм хөрмәт сүзләрен җиткерәм. Алга яңа җиңүләргә, республика сезнең белән горурлана!
Фото: glavarb.ru