Балтачта корамалы тегү модада
Нәфисә Ахунова кул эшләреннән җанына тынычлык табаРусия халыклары бердәмлеге елы уңаеннан “Дуслык бизәкләре” фестивале чикләрендә, район үзәге Иске Балтач мәдәният йортында талантлы кул эшләре осталары катнашлыгында осталык дәресләре уза.
Шул чараларның берсендә Иске Янбай авылыннан 37 ел стажлы башлангыч сыйныфлар укытучысы, хезмәт ветераны Нәфисә Ахунова белән таныштык. Нәфисә Әсләм кызы балаларны укырга һәм язарга гына өйрәтеп калмыйча, аларда хезмәткә сөю дә тәрбияли.
Хезмәт дәресләрендә һәм сыйныфтан тыш чараларда ул нәниләр өчен кул эшләре буенча осталык дәресләре үткәрә, пенсиягә чыккач, үзен шушы яраткан шөгыльгә багышлау турында хыяллана. Әнисеннән (ул да башлангыч сыйныфларны укыткан) калган тегү машинасы хәзер аңа хезмәт итә.
Нәфисә Ахунова иске пәрдәләрдән, майкалардан кечкенә декоратив мендәрләр ясый, аларны поролон белән тутыра.
– Кул эшләре мине тынычландыра, хезмәтемнең нәтиҗәләре якыннарыма да шатлык, сөенеч бүләк итә. Үз кулларың белән булдырган матур әйберләрдән ниндидер җылылык сирпелә сыман, – ди ул.
Аның оста куллары тудырган күз явын алырлык, сокланып туйгысыз әйберләр – җылылык һәм кайгыртучанлык белән тулы истәлекле бүләкләр.
Бу көнне чарада осталар күп иде. Мине Нәфисә ханымның корамалы тегү үрнәге җәлеп итте. Мозаика принцибы буенча тукыма кисәкләреннән бербөтен итеп тегелгән кул эшләре әллә кайдан үзенә игътибарны җәлеп итә.
– Бары тик теләк, бераз тукыма һәм идея генә кирәк, – дип, корамалы тегү (пэчворкның) берничә гади ысулын куллануы турында сөйләп үтте.
Корамалардан ясалган бизәкләр күптөрле. Нәфисә Әсләм кызы, булачак эшнең эскизын уйлап һәм материал сайлап, башта корамалардан блоклар тегә, соңрак алардан тулы бер эшләнмә төзи. Бу эшне дүрт этапка бүлә кул эше остасы.
Тәүдә эскизын төзи һәм тукыма әзерли; корамалы тукыманың өске катламын әзерли; аннары катламнарны тоташтыра; әзер әйбернең чит-читләрен эшкәртә.Осталык дәресе барышында кул остасы шушы нечкәлекләр һәм тукыма сайлау турында балаларга теләп сөйләде.
Корамалап тегү нинди генә интерьерда да – авыл йортында да, күпкатлы фатирда да уңайлылык тудыра һәм ачык, чагу төсләр өсти. Ул беркайчан да үзенең актуальлеген югалтмый.
Корамалы тегүгә иске тукымаларны үтильләштерү ысулы итеп кенә түгел, ә кул эшләрендә иҗатны, үткәннәрне һәм уникальлекне берләштергән тулы бер юнәлеш итеп карау дөрестер. Практик яктан әбиләребез бу ысулны борынгы заманнарда барлыкка китергән, кешеләр җылы одеяллар яки кием тегү өчен материянең һәр кисәген кулланган. Бүген исә бу төс, текстура һәм дизайн аша иҗат итү мөмкинлеге бирүче сәнгать буларак кабул ителә.
Балтач районында яшәүче Нәфисә Ахунова кебек кул эше осталары ул үрнәкләрне онытмый, югалтмый. Алар аны саклап калып, үсеп килүче буынга тапшыра.
Аида ХӘЙРТДИНОВА.
Балтач районы.