Кемдәр ул иң ғилемлеләр?
Еңеү яулаған уҡыусылар сәхнәгә бер-бер артлы саҡырыла, уларҙың һәр береһе көслө, белемле, һәләтле, алдынғы.
Олимпиаданың еңеүселәрен билдәләү сараһын уҡыусылар ғына түгел, уҡытыусылар һәм ата-әсәләр ҙур түҙемһеҙлек менән көтөп алды. Был юлы ла сарала ҡатнашыусыларҙы Асҡар ауылы полилингваль мәктәбе коллективы ихлас ҡаршыланы. Бүләкләү тантанаһында бары тик еңеүсе уҡыусылар саҡырылды. Һәр кемдең йөҙөндә шатлыҡ балҡый, уҡытыусылар уҡыусылары өсөн һөйөнә, ата-әсәләр балаларының уңышын күреп ҡыуан.
Еңеү яулаған уҡыусылар сәхнәгә бер-бер артлы саҡырыла, уларҙың һәр береһе көслө, белемле, һәләтле, алдынғы. Шулай булмаһа, тиҫтерҙәре араһында оло еңеүгә өдгәшерҙәр инеме?! Һәр хәлдә, йөҙҙәре шатлыҡтан балҡыған ҡыҙ һәм малайҙарға ҡарап, уларҙың тәүге еңеүҙәренә һөйөнөп, киләсәккә ышаныслы аҙымдар менән атлауҙарына өмөт иткән уҡытыусылар был көндә уҡыусыларына ҡарағанда икеләтә һөйөндө.
Йылдар буйы эшләгән хеҙмәттәренә оло баһа алыу, үҙ эштәренең һөҙөмтәһен күреү – уҡытыусы өсөн иң ҙур хөрмәттәрҙең береһе ул. Мәҫәлән, Хәлил урта мәктәбенең химия һәм биология уҡытыусыһы Зилә Батыр ҡыҙы Шаһивәлиева ике уҡыусыһын әҙерләгән. Х класс уҡыусыһы Асия Рәхмәтуллина – беренсе, Данил Сәйфетдинов өсөнсө урынға лайыҡ булды.
“Уҡыусыларым тәүге тапҡыр ҡатнашты һәм еңеүселәр рәтенә сыҡты. Асия химия менән күптән шөғөлләнә, төрлө олимпиадаларҙа ҡатнашабыҙ. Киләһе йыл химиянан Берҙәм дәүләт имтиханын һайларға уйлай һәм артабан белемен ошо йүнәлештә дауам итәсәк. Фәҡәт беҙҙең район уҡыусылары өсөн “Ғилем” олимпиадаһының үткәрелеүенә ыңғай ҡарайым. Бында һәр уҡыусы ҡатнаша һәм үҙенең көсөн дүрт йүнәлештә һайлай ала. Хатта ҡайһы бер уҡыусылар бер фәндән генә түгел, ә бер нисә фән буйынса олимпиадала ҡатнашырға мөмкинлек таба. Бында сикләү юҡ, иң мөһиме – белем һәм теләктең булыуы ғына кәрәк”, – ти Зилә Батыр ҡыҙы.
Төрлө фәндәр буйынса призлы урындар яулаған уҡыусыларға Почет грамотаһы менән иҫтәлекле бүләктәр тапшырылды. Бөтәһе 45 уҡыусы быйыл “Ғилем” олимпиадаһында еңеүселәр тип танылды. Балаларға ҡиммәтле бүләктәр: беренсе урын өсөн – аҡыллы колонкалар, икенсе урынға – смарт-сәғәт һәм өсөнсө урынға сымһыҙ ҡолаҡсындар (беспроводные наушники) тапшырылды.
Автор фотолары.
