Аермасын беләсе иде
— Идарәче компания (ИК) белән торак милекчеләре ширкәте (ТСЖ) арасында нинди аерма бар? Теге яки бу форма нинди өстенлекләр бирә?
─ ТСЖ ─ йортта яшәүчеләрнең йорт белән мөстәкыйль идарә итү өчен берләшкән оешмасы, ә ИК — йорт белән түләүле идарә итүче коммерция оешмасы.
ТСЖда ут, су, газ һ. б. белән тәэмин итүчеләр арасындагы килешүләрне кешеләр үзләре төзи, ИКда — эшнең нечкәлекләрен яхшы аңлый торган профессиональ команда.
ТСЖда мөһим карарлар гомум җыелышта кабул ителә. ИКда ─– штатлы белгечләр тарафыннан, ләкин милекчеләр килешүендә һәм карарларында билгеләнгән вәкаләтләр кысаларында (милекчеләрнең гомум җыелышы беркетмәсе нигезендә).
ТСЖ түләүләрне киметү белән кызыксына. ИК хезмәт күрсәтүләрнең сыйфатын һәм яшәүчеләрнең уңайлылыгын арттырган өчен табыш алуга юнәлтелгән.
ТСЖда подрядчыны алмаштыру җиңел, карарлар йорт милекчеләренең гомум җыелышында кабул ителә. ИКда бу карар идарәче оешма компетенциясендә кала.
ТСЖ идарәдә катнашырга әзер булган актив милекчеләр өчен яраклы. ИК ─ моны профессионалларга тапшыруны өстен күрүчеләр өчен. Шул рәвешле, ике вариантның да плюслары һәм минуслары бар, кайсысын сайлау анык хәл-шартларга бәйле.