Республика Хөкүмәте эше югары бәяләнде
Бүген Дәүләт җыелышы-Корылтайда Башкортстан Хөкүмәте Премьер-министры Андрей Назаров 2025 елдагы эшчәнлеккә нәтиҗә ясады һәм депутатларның сорауларына җавап бирде. Чарада Башкортстан Башлыгы Радий Хәбиров катнашты.
Төбәк Башлыгы 2025 елда республика Хөкүмәтенең эшен югары бәяләде. Журналистлар белән очрашуда ул ассызыклавынча, 2025 ел чыннан да бик катлаулы булды. Шуңа карамастан, шактый нәтиҗәле эш башкарылды. Башкортстан Башлыгы Хөкүмәт эшенең нәтиҗәләрен шәрехләп, киңкүләм мәгълүмат чаралары игътибарын берничә күрсәткечкә юнәлтте. Беренче чиратта, тулай төбәк продукты үсешенә.
"Бездә үсеш темплары югары, бу бик мөһим. Бу нәкъ менә икътисад торышының база күрсәткече", - диде республика җитәкчесе.
Икенче мөһим күрсәткеч - инвестицияләр динамикасы. Республика соңгы җиде ел дәвамында "инвестицияләр үсешен тәэмин итә", бу бүгенге чынбарлыкта бик җиңел түгел.
"Өченчесе - бюджетны арттыру. Ул бездә үсә. Бу да мөһим күрсәткеч. Бездә бюджетның дефицитлы булуы сезне борчымасын, чөнки, күргәнебезчә, чыгымнар да билгеле сәбәпләр аркасында бездә шактый җитди үсә. Шулай да без монда билгеле бер балансны саклыйбыз», — дип белдерде Радий Хәбиров.
Аның фикеренчә, бу өч төп күрсәткеч икътисад үсеше торышының маркерлары булып тора. Узган ел дәвамында Русия Хөкүмәте белән шактый җитди эш башкарылды. Гомумдәүләт проектларын һәм Русия Президенты һәм Хөкүмәте йөкләмәләре буенча барлык программаларны гамәлгә ашыруга кагылышлы эшкә зур игътибар бирелә.
"Монда да, минемчә, шактый уңышлы эш башкарылган. Без федераль хөкүмәт линиясе буенча социаль проектларыбызны гамәлгә ашыруга китә торган дотацияләр һәм субсидияләр күләмен сизелерлек арттырдык. Шуңа күрә, гомумән алганда, тагын бер кабат әйтәм: без куйган бурычларны үтәдек кенә түгел, арттырып үтәдек, - диде Башкортстан Башлыгы һәм агымдагы икътисади вәзгыятьне исәпкә алып, бурычларның елдан-ел катлаулана гына баруын билгеләп үтте. - Шуңа карамастан, без ел саен әлеге өч күрсәткечне арттырырга тиешбез».
Быел ук хәл ителергә тиешле бурычлар шул ук калачак, дип ачыклык кертте Радий Хәбиров. Шул ук вакытта аларның иң мөһиме — СВОда җиңү өчен барысын да эшләүне дәвам итү. Сугышчыларга нәтиҗәле ярдәм итү өчен яхшы эшләүче икътисад кирәк.
"Икътисад быелгы кыенлыклар белән очраша, һәм алар узган елга караганда күпкә җитдирәк, авыррак. Хәер, 2025 ел да гади булмады", - дип билгеләде ул.
Хәзерге вакытта республика хакимияте әлегә кече һәм урта эшкуарлык субъектлары саны кимү тенденциясен күрми, әмма, мөгаен, статистикларның яңа мәгълүматларында моны күрәчәкләрен аңлый, чөнки бизнес алып бару катлаулана бара. Бурыч - аларның санының нык кимүенә юл куймау.
Шулай ук төбәктә эре предприятиеләрнең эшен саклап калу мөһим. Бүгенге көндә барлык зур предприятиеләр дә диярлек эшли.
"Кайдадыр бераз кыскартулар бар. Әмма бездә эшсезлек дәрәҗәсе элеккечә үк түбән. Бездә эшләргә кешеләр юк. Шуңа күрә без мигрантлар белән төзелеш, торак-коммуналь хуҗалык һәм башка өлкәләрдә шөгыльләнәбез дә», - дип аңлатты республика җитәкчесе.
Хөкүмәтнең 2025 елгы эшенә йомгак ясап, Радий Хәбиров хәбәр иткәнчә, быел, иске бурычлардан тыш, төбәктә яңа юнәлешләр белән җитди шөгыльләнәчәкләр. Алар арасында - ясалма интеллектны системалы кертү һәм санлы трансформация.
Шулай ук, утырышта депутатлар республика Контроль-исщп палатасы рәисе вазыйфасына Елена Теняеваның кандидатурасын раслады.