Хезмәтегез алдында баш иябез!
Уфада “Ел укытучысы-2026” конкурсына йомгак ясалды
Ел саен язны сагынып көтеп алабыз. Кояшлы көннәре, матур бәйрәмнәре, төрле чаралары белән быелгы яз да күңелләрдә үз урынын алыр. Аеруча укытучылар өчен әлеге чор истәлекле булачак, чөнки шушы көннәрдә республикада “Ел укытучысы” бәйгесенә йомгак ясалды.
26 мартта Мифтахетдин Акмулла исемендәге Башкорт дәүләт педагогия университетында “Ел укытучысы-2026” конкурсы җиңүчеләре билгеләнде. Әлеге чара кысаларында, шулай ук, педагоглар арасында һөнәри осталык буенча республика конкурсларына да нәтиҗә ясалды. Атап әйткәндә, “Башкортстанның ел укытучысы”, “Башкорт теле һәм әдәбияты ел укытучысы”, “Мәктәпкәчә белем бирү оешмасының ел педагогы”, “Мәктәпкәчә белем бирү оешмасының туган телдә белем бирүче ел педагогы”, “Русиянең укытучы-дефектологы” конкурслары җиңүчеләре билгеле булды. Ярты ел дәвамында белгечләр үзләренең һөнәри осталыгын мәктәп, район һәм республика этапларында күрсәтте. Жюри әгъзалары әйтүенчә, иң яхшыларын сайлап алу да җиңел булмаган, чөнки һәр катнашучы конкурска җитди әзерләнгән.
36нчы тапкыр үткәрелгән “Башкортстанның ел укытучысы-2026” республика конкурсының җиңүчесе исемен Уфа шәһәренең 93нче лицее урыс теле һәм әдәбияты укытучысы Ангелина Степанова яулады. Благовещен шәһәренең
М. А. Киняшов исемендәге 6нчы урта гомуми белем бирү мәктәбенең башлангыч сыйныфлар укытучысы Любовь Луговаяга – икенче, Уфаның 29нчы белем бирү үзәге математика укытучысы Данил Бобровка өченче урын бирелде.
Җыр-моң белән үрелеп барган чарада башка конкурсларда җиңгән педагогларның исемнәре дә яңгырады. Әйтик, “Мәктәпкәчә белем бирү оешмасының ел укытучысы” исеменә Уфадагы 251нче балалар бакчасы тәрбиячесе Алсу Селезнова лаек булса, “Мәктәпкәчә белем бирү оешмасының туган телдә белем бирүче ел педагогы” итеп Хәйбулла районының Акъяр “Шатлык” балалар бакчасы тәрбиячесе Альбина Шәрипова билгеләнде. “Русиянең укытучы-дефектологы” конкурсының төбәк этабы җиңүчесе – Стәрлетамак коррекцион мәктәп-интернаты педагогы Ирина Корманаева.
Чарада иң яхшы туган тел укытучылары да бүләкләнде. Конкурста башкорт, татар, мари һәм чуваш телләре укытучылары катнашты. Дүртөйле районының Чарлак авылы мәктәбеннән мари теле укытучысы Татьяна Аптулаева әлеге конкурста җиңүче булып танылды. Әлеге номинациядә катнашкан башкорт теле һәм әдәбияты укытучылары арасында Уфаның 24нче мәктәбе укытучысы Гөлшат Вәлиуллина икенче урынны алды. Ә Уфа районы Миловка мәктәбенең татар теле һәм әдәбияты укытучысы Дамир Дәүләтгәрәев әлеге конкурста өченче урынны яулады.
— 2011 елдан мәктәптә эшлим. Тәүдә Кушнаренко педагогия колледжын тәмамладым, аннары М. Акмулла исмендәге Башкорт дәүләт педагогия университетының магистратурасы дипломын алдым. Менә шулай үз һөнәремә озын юллар үтеп килергә туры килде.
Бүген мәктәптә эшләү җиңел түгел, әмма үз эшемне бик яратам, шуңа да миңа авыр түгел. Үзем әле яшь, киләчәккә планнарым да зурдан. Әмма аларның иң олысы — укучыларымның нәтиҗәсен күрү. Минем өчен моннан да зуррак җиңү булмаячак, — диде Дамир Ригать улы.
Чара кысаларында республика мәктәпләре командалары арасында ел саен үткәрелә торган “Соты” конкурсына да йомгак ясалды. Уфа районы укытучылары быел бишенче тапкыр үткәрелгән кызыклы бәйгедә җиңүчеләр булды. Финалга, шулай ук, Уфа, Межгорье шәһәрләре, Караидел, Дуван районнары командалары чыкты.
Әлеге конкурсларда җиңүчеләргә дипломнар, акчалата бүләкләр, Дәүләт җыелышы-Корылтайның, Мәгариф министрлыгының, Бөтендөнья башкортлары корылтаеның, Русия халык мәгарифе һәм фән хезмәткәрләре профсоюзының Башкортстан комитетының, уку йортларының Мактау грамоталары һәм истәлекле бүләкләре тапшырылды.
Чарада катнашучылар мондый конкурсларның аларны тагын да нәтиҗәлерәк эшләргә илһамландыруын билгеләде.
Гөлия Гәрәева.