Хәйер һораған өйһөҙ Мәрхәбә хәҙер "йондоҙ" булып киткән
Былтыр Дағстандағы Хасавюрт ҡалаһы баҙарында бер турист ҡатын ҙур зәңгәр күҙле, аҡһыл сәсле хәйер һорап йөрөгән ҡыҙҙы осрата. Ул туғыҙ йәшлек Мәрхәбә була.
Был ҡатын ҡыҙҙы фотоға төшөрә һәм социаль селтәргә һала. Кешеләр ябыҡ, бысраҡ, йыртыҡ кейемдәге бәләкәй героиня менән ҡыҙыҡһына башлай. Шундайҙарҙың береһе Йәннәт Сөләймәнова булып сыға.
- Мин фотоның минең өйөм тирәһендәрәк төшөрөлгәнен аңланым. Шунда уҡ машинаға ултырып, ҡыҙҙы эҙләп сығып киттем. Бер нисә сәғәт йөрөнөм, әммә юлым уңманы - тапманым. Инде ҡайтырға йыйынғанда әсәһе менән автобус туҡталышына китеп барған Мәрхәбәне күреп ҡалдым, - тип һөйләй Йәннәт.
Ҡатын улар менән таныша, йөрөп килергә тәҡдим итә. Баҡһаң, Мәрхәбәләр биш бала: дүрт ҡыҙ һәм бер малай. Йәннәт уларҙың барыһын да паркка алып китә, тәмлекәстәр менән һыйлай, уйынсыҡтар бүләк итә. Балаларҙың бер көн булһа ла бәхетле булыуын теләй. Инде хушлашырға йыйынғанда Мәрхәбә Йәннәткә килә лә: "Ә һеҙ минең әсәйемме?" - тип һорай. Ҡатын нимә әйтергә белмәй ҙә: "Эйе, мин дә һинең әсәйең. Хәҙер һинең ике әсәйең бар", - ти.
Шул көндән Йәннәт был ғаилә менән нығыраҡ аралаша башлай. Мәрхәбә Үзбәкстанда тыуа. Уға өс йәш тулғас, ғаилә Дағстанға күсеп килә. Ләкин тиҙҙән атай кешене иленә ҡыуып ҡайтарып ебәрәләр. Әсә эшһеҙ, аҡсаһыҙ биш бала менән тороп ҡала. Хәйер һорайҙар, теләһә ҡайҙа ҡунып йөрөйҙәр. Бар тапҡан аҡсаларын бәләкәй генә торлаҡты ҡуртымға алыу өсөн тотоналар. Биш йыл инде шулай.
Мәрхәбә Йәннәткә ныҡ эйәләшә. Ҡунаҡҡа йыш килә башлай. Ҡатын уны йыуындыра, кейендерә һәм ҡыҙҙың бик матур икәнен күрә. Мәрхәбә беренсе тапҡыр көҙгөлә үҙен күргәс, илап ебәрә. "Рәхмәт, әсәкәйем, мин бер ҡасан да былай һәйбәт йәшәмәгәйнем", - ти ул.
Ҡыҙ Йәннәттең ғаиләһендә ҡала, уның ҡыҙы менән дуҫлаша. Ире лә, Мәрхәбәнең әсәһе лә быға ҡаршы булмай. Йәннәт ҡыҙҙы йыш ҡына туғандары янына алып бара.
Йәннәт баҙарҙа эшләй. Улар бай йәшәмәй, шуға күрә бер генә баланы һыйындыра алалар. Мәрхәбәне уҡытыу проблемаһы ла киҫкен тора: ул бер ваҡытта ла мәктәпкә йөрөмәгән, шәхесен раҫлаған документтары ла юҡ. Әле уны онлайн-мәктәпкә яҙҙырғандар. Ул үҫкәс табип йәки полицейский булырға теләй.
Ҡыҙға ярҙам итергә теләп, уны матур итеп фотоға төшөрәләр һәм ғаиләнең таныштарынан таратыуҙарын үтенәләр. Һәм тәүҙә Мәрхәбәгә реклама ролигында төшөргә тәҡдим итәләр, һуңынан - күлдәктәр рекламаларға. Хәҙер социаль селтәрҙә уға 70 меңләп кеше яҙылған. Ә ҡыҙ күп итеп аҡса эшләп, ғаиләһенә ярҙам итергә хыяллана.
Аҡ бәхеттәр һәм уңыштар был ҡыҙға!
Мәрхәбәнең фотоларын ошонда ҡарағыҙ: https://www.kp.ru/daily/27742.3/5168861/
Фото яһалма интеллект ярҙамында яһалды.