Башкортстаннан өч студент Думада стажировка үтәчәк
Башкортстан Башлыгы каршындагы Дәүләт хезмәте һәм идарә академиясендә төбәкнең әйдәп баручы югары уку йортлары студентлары арасында эссе конкурсына йомгак ясадылар. Тантана гыйнварда ук башланган проектны төгәлләде.
Исегезгә төшерәбез: 26 гыйнварда Башкортстан Дәүләт җыелышы-Корылтайның зур залында студентларның Русия Дәүләт думасы делегациясе белән очрашуы узды. Дискуссия барышында катнашучылар туристлык инфраструктурасын үстерүнең актуаль мәсьәләләре, туризмда санлаштыру трендлары, кече һәм урта бизнеска ярдәм чаралары, шулай ук яшьләрнең үз-үзләрен тормышка ашыру механизмнары турында фикер алыштылар. Очрашу нәтиҗәләре буенча студентларга эссе язарга тәкъдим ителде, анда һәркем төбәктә туризм һәм эшкуарлыкны үстерү буенча үз идеяләрен бәян итә алды.
25 мартта академиядә җиңүчеләрнең исемнәрен игълан иттеләр. Иң яхшы эшләрнең өч авторы Дәүләт думасында ике атналык җәйге стажировка узу мөмкинлеге алды. Эшләрен югары бәяләгән тагын җиде кеше 7–8 апрельдә Дәүләт думасына экскурсиягә чакырылды.
Тантанада Башкортстан Башлыгы академиясе ректоры вазыйфасын башкаручы Азат Бадранов чыгыш ясады. Ул, конкурс кызыклы килеп чыкты, дип белдерде.
Без академиядә мондый конкурслар белем бирү процессы өчен мөһим дип саныйбыз, чөнки алар студентлар өчен кызыклы. Шул ук вакытта стажировкалар һөнәри белемне киңәйтергә мөмкинлек бирә. Эссе конкурсында катнашу зур булмаска да мөмкин, ләкин бу — алга таба бер адым. Ул җиңүчеләргә стажировка ишекләрен ачты, ә стажировка, үз чиратында, үзеңне күрсәтергә һәм алга таба хезмәттәшлек һәм үсеш буенча тәкъдимнәр алырга мөмкинлек бирә. Һәр адым яңа офыклар ача, һәр ачык ишек арытабангы ишекләрне ачарга мөмкинлек бирә. Бу тормышта барысы да сезнең үзегездән генә тора. Академия һәм башка югары уку йортлары конкурсларында актив катнашыгыз, — дип сәламләде җиңүчеләрне һәм катнашучыларны Азат Бадранов.
Азат Шамил улы, шулай ук, мондый чараның соңгысы булмавын билгеләп үтте.
Башкортстан Башлыгы Радий Хәбиров безнең алга, укып кына калмыйча, иҗат итә белүчеләргә ярдәм итү бурычын да куя. Шул уңайдан без талантлы яшьләр белән системалы эш алып барабыз. Исегезгә төшерәм: мартта биредә узган лекциясендә Премьер-министр Андрей Назаров студентлар өчен республика Хөкүмәтендә алга таба стажировкага эссе конкурсы игълан иткән иде. Анда иң актив, талантлы һәм амбициозларны көтәләр.
Катнашучылар төрле темаларга эссе язган: кемдер ни өчен Дәүләт думасына эләгергә теләве турында сөйләсә, кемдер туризм һәм эшкуарлыкны үстерү буенча үз тәкъдимнәрен бәян иткән. 22 эш арасыннан иң яхшы уны сайлап алынган.
- Өчесе - бик көчле, унын без бик яхшы дип саныйбыз, — диде Азат Бадранов. — Дәүләт думасындагы коллегаларыбыз белән сөйләштек һәм калган җидесен экскурсиягә җибәрәбез дип килештек. Программада Мәскәү шәһәр Думасы белән танышу да, Дәүләт думасында Владислав Даванков белән очрашу да каралган.
Академиянең юридик факультеты икенче курс студенты Зарина Җәләлетдинова, «политология» юнәлешенең икенче курс студенты Гөлназ Харрасова һәм психология факультетының читтән торып уку бүлеге беренче курс студенты Валерия Чернышева стажировкада җиңүче булдылар, дип хәбәр итә «Молодёжная газета».
Фото: mgazeta.com