Радий Хәбиров Совет утырышында катнашты
26 мартта Башкортстан Башлыгы Радий Хәбиров видеоконференция режимында Идел буе федераль округы Советы утырышында катнашты. Аны Русия Президентының Идел буе федераль округындагы Тулы вәкаләтле вәкиле Игорь Комаров уздырды. Көн тәртибендә — округ төбәкләренең авыл территорияләрендә дәүләт демографик сәясәтен гамәлгә ашыру.
Утырышта шулай ук Федерация Советы, профильле федераль министрлыклар һәм ведомстволар вәкилләре катнашты.
Игорь Комаров үз чыгышында Идел буе федераль округының Русиядә авыл халкы саны буенча лидер булуын билгеләп үтте. Авылларда 8 миллионга якын кеше яши.
- Демография һәм округ икътисады характеристикалары күрсәткәнчә, авылда кем һәм ничек яшәячәгенә илнең киләчәк үсеше, аның суверенитеты һәм азык-төлек иминлеге бәйле, — диде Президентның Тулы вәкаләтле вәкиле. — Гаилә һәм демография сәясәтен гамәлгә ашыру, күп балалылыкка ярдәм итү буенча федераль стратегиядә авыл җирендәге вәзгыять аерым билгеләп үтелде, анда тормыш рәвеше шәһәрнекеннән принципиаль аерыла. Авылның демографик потенциалын гамәлгә ашыру мәсьәләсе авыл территорияләрен комплекслы үстерү белән тыгыз бәйләнгән.
Шул ук исемдәге дәүләт программасы кысаларында округ төбәкләрендә 2020-25 елларда 327 мең кв. м. торак төзелгән һәм сатып алынган, җәмәгать киңлекләрен төзекләндерү буенча 7,5 мең проект гамәлгә ашырылган, 650 километрга якын автомобиль юллары төзелгән һәм ремонтланган.
- Шул ук вакытта авылда социаль-икътисади һәм демографик процессларның тискәре трендлары теркәлә. Ә кабул ителгән дәүләт ярдәме чаралары әлегә аларны җиңеп чыгарга мөмкинлек бирми, чөнки авыл территорияләренең үзенчәлеген исәпкә алмыйлар, — диде Игорь Комаров. — Бу федераль һәм төбәк дәрәҗәләрендә чараларга анализ ясау, өстенлекләрне билгеләү һәм авылда демографияне һәм тормыш сыйфатын күтәрү өчен аларны көйләп бетерү кирәклеге турында сөйли.
Утырышта катнашучылар иң яхшы тәҗрибәләрне күрсәтте һәм Идел буе федераль округы төбәкләрендә демографик үсеш өлкәсендә тупланган уңай тәҗрибә белән уртаклашты.
- Башкортстан - нәкъ менә авыл халкы шактый күп булган территория, ягъни республика халкының 37 проценттан артыгы, ә бу - 1,5 млн кеше. Аларның үзләрен ничек хис итүе барысына да, шул исәптән демографиягә дә йогынты ясый, — диде Радий Хәбиров. — Без туучылар санының кимүен күзәтәбез, шул исәптән авылда да. Аңлашыла ки, урбанизациянең глобальләшү процессы бара һәм кешеләр акрынлап шәһәрләргә күчә. Һәм безнең бурыч — авылда икътисадны саклап калу, социаль инфраструктураны үстерү, чөнки ансыз кешеләр бала тапмаячак. Биредә барлык күрсәткечләр буенча без чыннан да начар бармыйбыз.
Башкортстан Башлыгы искәрткәнчә, «Авыл территорияләрен комплекслы үстерү» программасы буенча Борай районында заманча физкультура-савыктыру комплексы эшләтеп җибәрелгән һәм яңа мәктәп төзелгән, Әлшәй районында ябык шугалак төзелгән, башка объектлар да төзелгән.
«Авылларыбызның социаль инфраструктурасын без төрле программалар кысаларында үстерәбез. Якын арада Әбҗәлил районының Әскар авылында поликлиника ачачакбыз. Федераль үзәк ярдәмендә без алты поликлиника төзедек, районнарда булачак әниләр өчен дүрт хатын-кызлар консультациясе ачтык», — дип билгеләде Радий Хәбиров. — «Идел буе федераль округы Советы карары проектына да үз тәкъдимнәребезне юлладык. Әмма, әлбәттә, монда барысы да беренче чиратта финанслау дәрәҗәсеннән һәм җәмгыятьтә күпбалалы гаиләләргә кагылышлы атмосферага бәйле. Бездә бу эш уңышлы алып барыла».
Фото: glavarb.ru