«Русиянең иң яхшы төбәге» премиясенә лаек булдык!
Әлеге исем спорт үсешенә керткән өлеше өчен бирелсә дә, Башкортстан башка проектларны гамәлгә ашыру буенча да югары нәтиҗәләргә иреште.
Төбәктә перспектив проектларны гамәлгә ашыру нәтиҗәсе берничә тапкыр федераль үзәкнең югары бәяләренә лаек булды. Аерым алганда, вице-премьер Марат Хөснуллин үткән елның ноябрь ахырында узган "Транспорт атнасы" кысаларында Радий Хәбиров белән эшлекле очрашу барышында Дүртөйледән Свердловск өлкәсенең Әчит бистәсенә кадәр М-12 «Восток» трассасы участогы буенча хәрәкәтне башлап җибәрүне уңай мисал итеп билгеләп үтте.
Вице-премьер Дмитрий Чернышенко былтыр июньдә «Физик культура һәм спортны үстерү» комплекслы дәүләт программасын гамәлгә ашыру буенча Хөкүмәт комиссиясе утырышы барышында «финанс чыгымнары азрак булган очракта да яхшы нәтиҗәләргә ирешүче» төбәкләр арасында Башкортстанны мисал итеп китерде. Ул билгеләп үткәнчә, республика 2025 елның ноябрендә спорт үсешенә керткән өлеше өчен дә «Русиянең иң яхшы төбәге» премиясенә лаек булды.
2025 елның февралендә Дмитрий Чернышенко «Берлога» киберфизик платформасы проектын - файдалы мобиль һәм видеоуеннар аша балаларны техник иҗатка һәм технологик белемгә күпләп җәлеп итү буенча перспективалы проектны гамәлгә ашыруда республиканың пионер булуына игътибарны юнәлтте. Вице-премьер билгеләп үткәнчә, Президент хуплаган әлеге проектны «илнең барлык субъектларына да таратырга кирәк».
Инновация практикаларын үстерү, шулай ук әһәмиятле проектларны азрак чыгымнар белән нәтиҗәле гамәлгә ашыруга федераль бюджеттан финанслау өчен дә, 2026-27 еллар дәвамында бу өлкәдә төбәкләр арасында көндәшлек артачак шартларда инвесторларны җәлеп итү өчен көрәштә дә республиканың мөһим өстенлеге булып кала.
Фото: bashinform.ru
Башкортстан хакимиятенең төбәкнең фәнни-технологик потенциалын үстерү буенча эше дә федераль хакимиятнең махсус игътибарына лаек булды. 2025 елның декабрендә Мәгариф һәм фән министрлыгы башлыгы Валерий Фальков үткәргән Фәнни-технологик үсеш комиссиясе утырышы барышында Башкортстан фәнни-технологик үсеш өлкәсендә алдынгы төбәкләр рәтендә аталды, бу күрсәткеч буенча, Мәскәү, Санкт-Петербург һәм Татарстаннан кала, 4нче урынны алды.
Ә 2025 елның августында Мәгариф һәм фән министрлыгы башлыгы билгеләп үткәнчә, Башкортстан студентлар конструкторлык бюролары саны буенча Мәскәүдән кала икенче урынны алды.
Фәнни-технологик өлкәдәге проектлар озак вакытка инвестицияләр җәлеп итә, шулай ук 2026-30 елларда төбәктә гамәлгә ашырылачак югары уку йортларына һәм кадрлар әзерләү программаларына ярдәм итүнең өстәмә драйверларына әверелә.