Пастереллез Башкортстанга яныймы?
Башкортстан Хөкүмәтендә Премьер-министр Андрей Назаров рәислегендә республикада җәнлекләр авырулары буенча эпизоотик хәл каралды.
Премьер-министр билгеләп үткәнчә, Русия төбәкләрендә эпизоотик хәл катлаулы булып кала. Кайбер төбәкләрдә аеруча куркыныч авырулар таралу очраклары теркәлә. Аерым алганда, Удмуртиядә, Свердловск һәм Ырынбур өлкәләрендә пастереллез һәм "котыру чире" учаклары ачыкланган. Бу хәл халык арасында борчылу тудыра.
Авыру тиз тарала, шуңа күрә республикага инфекция керү куркынычы саклана. Мондый очракта терлекчелек продукциясен төбәкләр арасында һәм чит илләргә чыгару чикләнергә мөмкин.
Ветеринария хезмәте республикада эпизоотик иминлекне тәэмин итү өчен комплекслы чаралар үткәрә. Барлыгы 77 төр хайван авыруына каршы профилактика эшләре алып барыла, шуларның 11е аеруча куркыныч категориягә керә. Белгечләр билгеләвенчә, әлеге авырулар югары йогышлылыгы белән аерылып тора: бер хайваннан кыска вакыт эчендә дистәләгән, хәтта йөзләгән хайванга йога ала. Авыруны дәвалау нәтиҗәсез, шуңа күрә очрак теркәлгәндә зарарланган терлекләр юк ителә.
Авыруларны кисәтү максатында республикада терлекләрне контрольсез кертүне чикләү, карантин чаралары, көтүлекләрне контрольдә тоту, хайваннарны даими тикшерү кебек чаралар гамәлгә ашырыла. Федераль һәм республика юлларында ветеринария постлары оештырылган, белгечләр хокук саклау органнары белән берлектә законсыз ташу очракларын кисәтә.
Белгечләр фикеренчә, эпизоотик учакларның күпчелеге нәкъ менә авыру терлекләрне контрольсез кертү белән бәйле. Шуңа күрә халыкка башка төбәкләрдән хайваннар кертүдән вакытлыча тыелып торырга киңәш ителә.
Киңәшмәдә кыргый хайваннар саны арту мәсьәләсе дә күтәрелде. Соңгы елларда төбәктә аю, бүре һәм төлке кебек ерткычлар саны арткан. Алар да авырулар таралуына сәбәпче булырга мөмкин. Табигатьтән файдалану һәм экология министры Нияз Фазылов хәбәр иткәнчә, агымдагы ел башыннан 1000нән артык төлке һәм якынча 30 бүре юк ителгән. Алга таба ерткычлар санын көйләү өчен махсус түләүләр кертү планлаштырыла.
Киңәшмә йомгаклары буенча Андрей Назаров профильле ведомстволарга эпизоотик хәлне контрольдә тотуны көчәйтергә һәм инфекцияләр таралу куркынычын киметү буенча өстәмә чаралар күрергә кушты.
Иртәгә 14.00 сәгатьтә "Роспотребнадзор"ның төбәк буенча идарәсе җитәкчесе Анна Казак һәм Республика клиник йогышлы авырулар дәваханәсенең баш табибы Азат Мөхәммәтҗанов белән матбугат конференциясе оештырылачак. Спикерлар журналистларга респиратор инфекцияләр буенча эпидемиологик сезон нәтиҗәләре, язгы-җәйге чорда актуаль булган йогышлы авыруларны профилактикалау чаралары, шулай ук балаларның җәйге ялына әзерлек турында сөйләячәк.