Игорь Комаров Совет утырышын үткәрәчәк
26 мартта Түбән Новгородта Русия Президентының Идел буе федераль округындагы Тулы вәкаләтле вәкиле профильле федераль министрлыклар һәм ведомстволар җитәкчеләре, Федераль җыелыш вәкилләре һәм Идел буе федераль округы төбәкләре башлыклары катнашлыгында Совет утырышын уздырачак. Утырышта Башкортстан Башлыгы Радий Хәбиров та катнашачак.
Утырышның төп темасы округ төбәкләренең авыл территорияләрендә дәүләт демографик сәясәтен гамәлгә ашыру булачак. Идел буе федераль округы Русиядә авыл халкы саны буенча лидер. Авыл җирлекләре территорияләрендә 7,8 млн кеше яисә илнең авыл халкының гомум саныннан 21,5 проценты яши.
Халыкны саклап калу, сәламәтлекне ныгыту, гражданнарның иминлеген арттыру һәм гаиләгә ярдәм итү Русия Президенты Владимир Путин тарафыннан 2036 елга кадәр Русия үсешенең милли максатлары исәбенә билгеләнде. Өстенлекле бурычлар арасында-туучыларның суммар коэффициентын арттыру.
Туучылар санын арттыруда гаилә кыйммәтләре гадәттәгечә көчле булган, ә бала табуга караш шәһәрләрдәгегә караганда югарырак булган авыл территорияләре аеруча зур әһәмияткә ия. Демографик потенциал авыл территорияләрен комплекслы үстерүгә турыдан-туры бәйле. 2030 елга кадәр исәпләнгән “Авыл территорияләрен комплекслы үстерү” дәүләт программасы бу эштә төп корал булып кала.
Идел буе федераль округы аны гамәлгә ашыру буенча алдынгы урыннарда тора: 2026 елда округ төбәкләре өчен 22 млрд сум федераль субсидияләр каралган — ил буенча гомуми күләмнең 42 проценттан артыгы. Авылны үстерүгә һәм демографик хәлне яхшыртуга юнәлдерелгән чаралар шулай ук «Гаилә», «Озак һәм актив тормыш» гомумдәүләт проектлары һәм башка стратегик документлар кысаларында тормышка ашырыла. Алар арасында — балалы гаиләләргә ярдәм чаралары, аналарны саклау һәм сәламәтлек саклауның беренчел звеносын үстерү.
Идел буе федераль округы төбәкләрендә демографик үсеш өлкәсендә шактый уңай тәҗрибә тупланган. Иң яхшы тәҗрибәләр Совет утырышында да күрсәтеләчәк. Фикер алышу йомгаклары буенча Русия Президенты Владимир Путин куйган бурычлар контекстында авылларда демографик потенциалны ныгытуга һәм тормыш сыйфатын күтәрүгә юнәлдерелгән федераль һәм төбәк дәрәҗәләрендәге чараларны алга таба камилләштерү буенча тәкъдимнәр эшләү планлаштырыла.
Фото: pfo.gov.ru