“Язлар матур хатын-кызлар белән”
Борай районы авылларында асыл затларыбызга багышланган күркәм чаралар үтте
Республика “Сәхибҗамал” татар хатын-кызлары иҗтимагый оешмасының Борай бүлекчәсе әгъзалары 8 Март уңаеннан да күп матур һәм әһәмиятле чаралар үткәрде.
Кузбай авылы китапханәсе мөдире Роза Габдулхакова, мәсәлән, яз, хатын-кыз һәм әниләр темасына шигърият кичәсе оештырды. Анда катнашучылар шушы бәйрәмгә багышланган шигырьләр сөйләп, җырлар башкарып күңел ачты, кайбер җырларның иҗат ителү тарихын искә төшерде. Чараның икенче өлеше авылдашлары, СВОда һәлак булган Илмир Камалетдиновка куелган тактаташка чәчәкләр салып, бер минут тынлыкта аны искә алуга багышланды, яугирнең әнисенә сәламәтлек һәм Ходайдан сабырлык теләдек. Бәйрәм чарасы уразада булмаучылар белән чәй табыны янында, ә кич клубта концерт белән дәвам итте. Бүләкләр, котлаулар күп булды. Финә Талипованың чагу төсле җепләр белән чигелгән картиналары хатын-кызлар өчен бигрәк тә онытылмаслык, соклангыч бүләк булды.
Әҗәк авылы клубы мөдире, милли чаралар оештыру осталарыбызның берсе Роза Сафина хатын-кызлар бәйрәменә күпбалалы авылдашлары, 8 бала анасы, 6 солдат (Фидан исемлесе әле СВОдан ялга кайткан иде) тәрбияләп үстергән Фларида Вәлиева-Замалиеваны балалары белән чакырган иде. Бәйрәм чарасы авыл биләмәсе хакимияте башлыгы, Ветераннар советы рәисенең, һәм башкаларның котлаулары, бәйрәмчә эчтәлекле чагу концерт номерлары, бүләкләүләр белән үрелеп барды. Заман нинди, бәйрәм дә шундый мәгънәгә ия. Замалиевлар авылдашлары белән бергә Бөек Ватан сугышы яугирләренә куелган обелискка чәчәкләр салды. Фидан Замалиевның Польша, Украина җирләрен фашистлардан азат итүдә катнашкан, Җиңү солдаты (офицер) булган картәтисе Гыйльмулла Вәлиевның исеме дә шунда уеп язылган. Әйткәндәй, аның белән горурланып үскән Фидан Фәрит улының, бабасының изге юлын дәвам итүче буларак үзе теләп СВОга китүендә дә зур мәгънә ята. “Җиңү безнеке булачак!” — ди ул.
Бәйрәмгә килүчеләр, илгә тынычлык һәм җиңү теләп, чараны оештыручыларга рәхмәтле булып таралышты.
Рафига Усманова,
“Сәхибҗамал” иҗтимагый оешмасының Борай районы бүлекчәсе җитәкчесе.