Арына Сабаленка другі раз запар выйграла турнір WTA у Маямі
Выйграўшы турнір у Маямі, Сабаленка зарабіла больш за $1,1 млн і 1000 рэйтынгавых ачкоў. З перамогай яе павіншавалі Прэзідэнт Беларусі Аляксандр Лукашэнка і кіраўнік НАК краіны Віктар Лукашэнка.
Беларуская тэнісістка Арына Сабаленка другі раз запар выйграла турнір катэгорыі WTA-1000 у Маямі. У фінале яна была мацнейшая за амерыканку Коры Гаўф – 6:2, 4:6, 6:3. У мінулым годзе ў фінале гэтых спаборніцтваў яна перамагла яшчэ адну амерыканку Джэсіку Пегулу – 7:5, 6:2.
Гэта трэцяя перамога беларускі ў сезоне: раней яна стала лепшай на турнірах у Брысбене і Індыян-Уэлсе.
Сабаленка – другая беларуска, якая выйграла «тысячнік» у Маямі, раней на гэтых кортах тройчы перамагала Вікторыя Азаранка (2009, 2011, 2016).
Дзякуючы гэтай перамозе Арына стала пятай тэнісісткай, якая аформіла «Сонечны дубль», – гэта значыць выйграла звязку турніраў у Індыян-Уэлсе і Маямі на працягу аднаго сезона. Да яе гэта змаглі зрабіць толькі немка Штэфі Граф (1994, 1996), бельгійка Кім Клейстэрс (2005), беларуска Вікторыя Азаранка (2016) і полька Іга Свёнтак (2022).
Усяго на рахунку Сабаленкі цяпер 24 перамогі на турнірах пад эгідай WTA у адзіночным разрадзе. На турнірах Вялікага шлема яна перамагала чатыры разы, двойчы выйграўшы Адкрыты чэмпіянат Аўстраліі (2023, 2024) і двойчы – Адкрыты чэмпіянат ЗША (2024, 2025).
]]>