Улуус дьаһалтатыгар
Хаҥаласка туризм сайдыытыгар үлэни торумнаатылар
Улуус дьаһалтатыгар туризмы сайыннарыыга баһылык Сергей Гребнев салайыытынан кэлэр сылларга хайдах үлэлииргэ санаа атастаһыылаах сүбэ-мунньах буолан ааспыта. Көрсүһүүгэ СӨ предпринимательствоҕа, туризмы сайыннарыыга миниистир солбуйааччыта Мария Карпова кыттыбыта, өрөспүүбүлүкэҕэ бу эйгэҕэ ханнык хайысхалаах үлэ барарын, туох соруктар туралларын туһунан кылгас иһитиннэриини оҥорбута.
Баһылык Сергей Гребнев Хаҥаласка туризм сайдыытыгар улахан кыахтар баалларын, айылҕабыт бэйэтинэн онно олук уурарын, урбаанньыттарга дьаһалта граннары олохтоон көмөлөһөрүн, туристическай кластердар тэриллибиттэрин, биисинэс кыттыытын ыйан туран туризмы сүрүннүүр баһылык дьаһалтатын иһинэн сэбиэт тэриллэрин олохпут ирдиирин эппитэ, санаа атастаһарга, быһаарыы ылынарга, туризм сайдыытыгар бары нэһилиэктэри бииргэ сомолоһон үлэлииргэ сорук туруорбута.
Людмила Аммосова.
Ааптар хаартыскаҕа түһэриилэрэ.
