На Утрени
Тропа́рь в Ла́зареву суббо́ту, глас 1
О́бщее воскресе́ние/ пре́жде Твоея́ стра́сти уверя́я,/ из ме́ртвых воздви́гл еси́ Ла́заря Христе́ Бо́же./ Те́мже и мы я́ко о́троцы побе́ды зна́мения нося́ще,/ Тебе́ Победи́телю сме́рти вопие́м:/ оса́нна в вы́шних,// благослове́н Гряды́й во и́мя Госпо́дне.
на Кафизмах
Седален по 1-ом стихословии
Уще́дрив Ма́рфины и Мари́ины сле́зы, / отвали́ти ка́мень от гро́ба повеле́л еси́, Христе́ Бо́же, / воскреси́л еси́ возгласи́в ме́ртваго, ми́ра Жизнода́вче, / Собо́ю уверя́я воскресе́ние. / Сла́ва си́ле Твое́й, Спа́се, / сла́ва вла́сти Твое́й, / сла́ва сло́вом вся Соста́вившему.
Сла́ва и ны́не
Уще́дрив Ма́рфины и Мари́ины сле́зы, / отвали́ти ка́мень от гро́ба повеле́л еси́, Христе́ Бо́же, / воскреси́л еси́ возгласи́в ме́ртваго, ми́ра Жизнода́вче, / Собо́ю уверя́я воскресе́ние. / Сла́ва си́ле Твое́й, Спа́се, / сла́ва вла́сти Твое́й, / сла́ва сло́вом вся Соста́вившему.
Седальны по полиелее
Исто́чник прему́дрости и предве́дения во Вифа́нию прише́д, / с Ма́рфою су́щих вопроша́л еси́: / где положи́сте, рек, дру́га, Ла́заря? / Его́же ра́ди прослези́в Благоутро́бне, / четверодне́вна ме́ртва воскреси́л еси́ гла́сом Твои́м / Человеколю́бче и Ще́дрый, / я́ко Жизнода́вец и Госпо́дь.
Сла́ва и ны́не
Исто́чник прему́дрости и предве́дения во Вифа́нию прише́д, / с Ма́рфою су́щих вопроша́л еси́: / где положи́сте, рек, дру́га, Ла́заря? / Его́же ра́ди прослези́в Благоутро́бне, / четверодне́вна ме́ртва воскреси́л еси́ гла́сом Твои́м / Человеколю́бче и Ще́дрый, / я́ко Жизнода́вец и Госпо́дь.
Кано́н в Ла́зареву суббо́ту. Глас 8. На 4.
Песнь 1
Ирмос, глас 8: Пои́м Го́сподеви,/ прове́дшему лю́ди Своя́ сквозе́ Чермно́е мо́ре,/ я́ко еди́н сла́вно просла́вися.
Припев: Сла́ва Тебé, Бо́же на́ш, сла́ва Тебé.
Ла́заря уме́ршаго, / ма́нием Боже́ственным воскреси́л еси́, / я́ко Созда́тель сый, / и живота́ сокро́вище, Человеколю́бче.
Сло́вом четверодне́внаго Ла́заря / возгласи́л еси́, Безсме́ртне, / темнообра́зное а́дово разруши́в кре́постию ца́рство.
Всем пребоже́ственнаго позна́ние Божества́ показа́л еси́, / из ме́ртвых возста́вив / четверодне́внаго Ла́заря, Влады́ко.
Ин кано́н в Ла́зареву суббо́ту. Глас 8. На 3.
Пре́жде от не су́щих приве́д вся́ческую тварь, / и ве́дый серде́чная сокро́вища / предглаго́леши я́ко Влады́ка ученико́м Ла́зарево успе́ние.
Челове́ка естество́м осуществова́выйся, Христе́, от Де́вы, / Ла́зарево Ты погребе́ние навы́кнути вопроша́л еси́, я́ко Челове́к, / не неве́дый, я́ко Бог, иде́же лежа́ше.
Уверя́я, Сло́ве, Твое́ Воскресе́ние, / вои́стинну я́ко от сна, люби́маго воскреси́л еси́ уже́ смердя́ща, / четверодне́вна мертвеца́ от гро́ба.
Сла́ва и ны́не,
Катавасия В Субботу Лазареву. Глас 8: Во́ду проше́д, я́ко су́шу,/ и еги́петскаго зла избежа́в,/ изра́ильтянин вопия́ше:// Изба́вителю и Бо́гу на́шему пои́м.
Песнь 3
Ирмос, глас 8: Ты еси́ утвержде́ние/ притека́ющих к Тебе́, Го́споди,/ Ты еси́ свет омраче́нных,// и пое́т Тя дух мой.
Два предлага́я де́йства Твоя́, / показа́л еси́ суще́ств, Спа́се, сугу́бство: / Бог бо еси́ и Челове́к.
Бе́здна сый ра́зума, Ты вопроша́еши: / где положи́ся ме́ртвый; / хотя́ воскреси́ти, Животода́вче, лежа́щаго.
Ме́ста преходя́й, я́ко быв Челове́к, / яви́лся еси́ опи́сан, / исполня́я вся́ческая, я́ко Бог неопи́санный.
Ин кано́н Глас 8. На 3.
Предста́в Ты гро́бу чудотво́рче, Го́споди, / в Вифа́нии над Ла́зарем прослези́лся еси́, зако́ном естества́, / плоть Твою́ уверя́я, Иису́се Бо́же мой, / ю́же восприя́л еси́.
Мари́ин плач Ты а́бие утоли́л еси́, Спа́се, / и Ма́рфе показу́я самовла́стное. / Ты бо воскресе́ние, Ты и живо́т, я́коже рекл еси́: / и́стина бо еси́и всех Госпо́дь.
Обви́таго укро́йми люби́маго Ла́заря, Го́споди, / от а́да те́мнаго исхи́тил еси́ Ты, / сло́вом Твои́м всемо́щным / сме́рти разве́рг закле́пы же и ца́рствия.
Сла́ва и ны́не,
Катавасия Небе́снаго кру́га/ Верхотво́рче, Го́споди,/ и Це́ркве Зижди́телю,/ Ты мене́ утверди́ в любви́ Твое́й,/ жела́ний кра́ю, ве́рных утвержде́ние,// Еди́не Человеколю́бче.
Малая ектения
Седален
Вку́пе предста́сте Христу́ Ла́зареве сестре́, / и слезя́ще го́рце, и пла́чуще его́, ре́ша Ему́: / Го́споди, у́мре Ла́зарь. / Он же я́ко Бог не неве́дый погреба́ния, / вопроша́ше я́ко Челове́к: / где положи́сте его́? / И приступи́в ко гро́бу, возглаша́ше четверодне́внаго Ла́заря. / Он же а́бие воста́, / и покланя́шеся Воскреси́вшему.
Сла́ва и ны́не,
Прове́дый вся́ческая, я́ко Творе́ц, / в Вифа́нии проре́кл еси́ ученико́м Твои́м: друг наш Ла́зарь у́спе днесь. / И ве́дый вопроси́л еси́, рекл: где положи́сте его́? / И Отцу́ помоли́лся еси́, прослези́вся, я́ко Челове́к, / те́мже и возгласи́в, его́же люби́л еси́, / от а́да возста́вил еси́, Го́споди, четверодне́внаго Ла́заря. / Сего́ ра́ди вопие́м Тебе́: / приими́, Христе́ Бо́же, дерза́ющих приноси́ти хвале́ние Тебе́, / и сподо́би всех сла́вы Твоея́.
Песнь 4
Ирмос, глас 8: Услы́шах, Го́споди,/ смотре́ния Твоего́ та́инство,/ разуме́х дела́ Твоя́,// и просла́вих Твое́ Божество́.
Не посо́бника тре́буяй, / но смотре́ния соверша́яй неизрече́нное, / моля́ся возста́вил еси́ ме́ртва, / четверодне́внаго, Всеси́льне.
Отцу́ соприсносу́щное Сло́во, / и Бог пре́жде зри́мый, / ны́не я́ко Челове́к мо́лится, / моли́твы всех Прие́мляй.
Глас Твой разруши́, Спа́се, сме́ртную всю си́лу, / основа́ния же а́дова / Боже́ственною Твое́ю си́лою поколеба́шася.
Ин кано́н Глас 8.
Ты, я́ко па́стырь, исхи́тил еси́, Христе́, челове́ка, / растле́вша уже́ четверодне́вна, Зижди́телю, / от во́лка лю́таго вои́стинну и всея́дца, / я́ко всеси́лен же и Госпо́дь, / сим проявля́я всеми́рную сла́ву, / Твоего́ ны́не тридне́внаго воста́ния.
Тя жизнь ви́дяще су́щии с Ма́рфою, Христе́, вопия́ху: / а́ще бы был еси́ зде, Го́споди, просвеще́ние всех и жизнь, / отню́д не бы у́мерл, мертв не яви́лся бы Ла́зарь. / Жизнь же уме́рших, Ты Человеколю́бче сый, / в ра́дость плач их прелага́еши.
Тя исто́чника боя́тся, Го́споди, бе́здны, / Тебе́ рабо́тают во́ды вся́ческия, / Тебе́ трепе́щут, Христе́, вереи́ а́довы, / и закле́пы держа́вою Твое́ю разруша́ются, / Ла́зарю воскре́сшу из ме́ртвых гла́сом Твои́м, / всеси́льне Спа́се Человеколю́бче.
Сла́ва и ны́не,
Катавасия Глас 8: Ты моя́ кре́пость, Го́споди,/ Ты моя́ и си́ла,/ Ты мой Бог, Ты мое́ ра́дование,/ не оста́вль не́дра Отча/ и на́шу нищету́ посети́в./ Тем с проро́ком Авваку́мом зову́ Ти:// си́ле Твое́й сла́ва, Человеколю́бче.
Песнь 5
Ирмос, глас 8: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́нного,/ но обрати́ мя/ и к све́ту за́поведей Твои́х// пути́ моя́ напра́ви, молю́ся.
Предста́в Ла́зареву гро́бу, Человеколю́бче, / сего́ призва́л еси́ и жизнь по́дал еси́, / я́ко жизнь сый безсме́ртная челове́ком всем, / я́ко Бог бу́дущее прообразу́я я́ве воскресе́ние.
Свя́зан нога́ма Ла́зарь хожда́ше, чу́до в чудесе́х, / ибо бо́лий яви́ся возбраня́ющаго укрепля́яй и Христо́с, / Его́же сло́ву вся раболе́пно слу́жат, / я́ко Бо́гу и Влады́це рабо́тающа.
Ме́ртва смердя́ща Ла́заря воздви́гнувый, Христе́, четверодне́вна, / возста́ви мя, уме́рша ны́не грехи́ мои́ми, / и положе́на в ро́ве и те́мней се́ни сме́ртней, / и я́ко благоутро́бен изба́ви и спаси́ мя.
Ин кано́н
Отцу́ сла́ву подая́, / я́ко не богопроти́вный был еси́ моля́ся, / предстоя́щий уверя́я наро́д, Долготерпели́ве, / и благодаре́ние Твоему́ Отцу́ принося́, / повеле́нием воздвиза́еши Ла́заря.
О гла́са Боговеща́ннаго и Боже́ственныя си́лы, Спа́се держа́вы Твоея́! / Е́юже а́дова врата́ всея́дныя сме́рти сокруши́л еси́, / но исхити́ мя от страсте́й мои́х, / я́коже пре́жде четверодне́вна Твоего́ дру́га Ла́заря.
Моли́твами Ла́заря, Ма́рфы же и Мари́и, / нас сподо́би зри́телей бы́ти Креста́ и страсте́й Твои́х, Го́споди, / и светоно́сицы дней и цари́цы Воскресе́ния Твоего́, Человеколю́бче.
Сла́ва и ны́не,
Катавасия Глас 8: Вску́ю мя отри́нул еси́/ от лица́ Твоего́, Све́те Незаходи́мый,/ и покры́ла мя есть чужда́я тьма, окая́ннаго?/ Но обрати́ мя и к све́ту за́поведей Твои́х// пути́ моя́ напра́ви, молю́ся.
Песнь 6
Ирмос, глас 8: Ио́ну в ки́те, Го́споди,/ еди́наго всели́л еси́,/ мене́ же, свя́заннаго мре́жами вра́жиями,// я́ко от тли о́наго, спаси́.
Любо́вь Тебе́ в Вифа́нию, Го́споди, отведе́ к Ла́зарю, / и сего́ уже́ смердя́ща воскреси́л еси́ я́ко Бог, / и от уз а́довых спасл еси́.
Любо́вь Тебе́ в Вифа́нию, Го́споди, отведе́ к Ла́зарю, / и сего́ уже́ смердя́ща воскреси́л еси́ я́ко Бог, / и от уз а́довых спасл еси́.
Ма́рфа у́бо отча́яшеся Ла́заря, я́ко ви́де четверодне́вна, / Христо́с же истле́вшаго воскреси́ я́ко Бог, / и к жи́зни преста́ви глаго́лом.
Ин кано́н
Бог сый и́стинный, Ла́зарево ве́дал еси́ успе́ние, / и сие́ ученико́м Твои́м провозвести́л еси́, / уверя́я, Влады́ко, Божества́ Своего́ неопреде́льное де́йство.
Бог сый и́стинный, Ла́зарево ве́дал еси́ успе́ние, / и сие́ ученико́м Твои́м провозвести́л еси́, / уверя́я, Влады́ко, Божества́ Своего́ неопреде́льное де́йство.
Пло́тию опи́сан сый Неопи́санный, в Вифа́нию прише́д, / я́ко Челове́к Влады́ко слези́ши над Ла́зарем, / я́ко Бог же хотя́ воскреша́еши четверодне́внаго.
Сла́ва и ны́не,
В Субботу Лазареву. Глас 8. Песнь 6.
Катавасия Глас 8: Очи́сти мя, Спа́се,/ мно́га бо беззако́ния моя́,/ и из глубины́ зол возведи́, молю́ся:/ к Тебе́ бо возопи́х и услы́ши мя,// Бо́же спасе́ния моего́.
Малая ектения
Кондак
Всех ра́дость Христо́с, / И́стина, Свет, Живо́т и ми́ра Воскресе́ние, / су́щим на земли́ яви́ся Свое́ю бла́гостию, / и бысть о́браз Воскресе́ния, / всем подая́ Боже́ственное оставле́ние.
Икос: Ученико́м Созда́тель всех предвеща́, глаго́ля: / бра́тия и зна́емии, наш друг у́спе, / си́ми предглаго́ля и уча́, я́ко вся ве́си, я́ко Созда́тель всех. / И́дем у́бо, и уви́дим стра́нное погребе́ние, / и рыда́ние Мари́ино, и Ла́зарев гроб у́зрим, / та́мо бо хощу́ чудоде́йствовати, / соверша́я Креста́ предначина́ние, / и всем подая́ Боже́ственное оставле́ние.
Песнь 7
Ирмос, глас 8: О́троцы евре́йстии в пещи́/ попра́ша пла́мень дерзнове́нно,/ и на ро́су огнь преложи́ша, вопию́ще благослове́н еси́ Го́споди Бо́же во ве́ки.
Прослези́вся я́ко челове́к, Ще́дре, / воскреси́л еси́ я́ко Бог су́щаго во гро́бе, / и разре́шся от а́да Ла́зарь взыва́ше: / благослове́н еси́ Го́споди Бо́же во ве́ки.
Прослези́вся я́ко челове́к, Ще́дре, / воскреси́л еси́ я́ко Бог су́щаго во гро́бе, / и разре́шся от а́да Ла́зарь взыва́ше: / благослове́н еси́ Го́споди Бо́же во ве́ки.
Изы́де пово́йми обвя́зан, / про́пасти а́да же и тьмы убе́г Влады́чним сло́вом, Ла́зарь взыва́я: / благослове́н еси́ Го́споди Бо́же во ве́ки.
Ин кано́н
Над дру́гом прослези́вся, Ма́рфины, Ще́дре, сле́зы утоли́л еси́, / и стра́стию во́льною отъя́л еси́ от лица́ люде́й Твои́х вся́кую сле́зу. / Оте́ц на́ших Бо́же, благослове́н еси́.
Живота́ сокро́вище, ме́ртваго я́ко от сна, Спа́се, воздви́гл еси́, / и сло́вом а́дову утро́бу расто́ргнув, воскреси́л еси́ пою́ща: / оте́ц на́ших Бо́же, благослове́н еси́.
Мертвеца́ смердя́ща, свя́зана пово́йми, Влады́ко, воздви́гнул еси́, / и мене́ свя́занаго плени́цами прегреше́ний, возста́ви пою́ща: / оте́ц на́ших Бо́же, благослове́н еси́.
Сла́ва и ны́не,
Катавасия Глас 8: От Иуде́и доше́дше о́троцы,/ в Вавило́не иногда́,/ ве́рою Тро́ическою пла́мень пе́щный попра́ша, пою́ще:// отце́в Бо́же, благослове́н еси́.
Песнь 8
Ирмос, глас 8: Мусики́йским орга́ном согласу́ющим,/ и лю́дем безчи́сленным, покланя́ющимся о́бразу в Деи́ре,/ три о́троцы не повину́вшеся,/ Го́спода воспева́ху,// и славосло́вляху во вся ве́ки.
Я́ко Па́стырь а́гнца взыска́л еси́, / от во́лка лю́таго губи́теля восхи́тив, / растле́вша обнови́л еси́, пою́ща Тебе́: / по́йте и превозноси́те во вся ве́ки.
Я́ко Па́стырь а́гнца взыска́л еси́, / от во́лка лю́таго губи́теля восхи́тив, / растле́вша обнови́л еси́, пою́ща Тебе́: / по́йте и превозноси́те во вся ве́ки.
Я́ко Челове́к гро́ба взыска́л еси́, / ме́ртваго я́ко Соде́тель воскреси́л еси́, / повеле́нием Твои́м Влады́чним, Его́же ад ужасе́ся, / вопию́ща Тебе́: по́йте и превозноси́те во вся ве́ки.
Ин кано́н
Вопроша́еши у́бо я́ко Челове́к, / я́ко Бог же воскреша́еши сло́вом четверодне́внаго. / Те́мже Тя пое́м и превозно́сим во вся ве́ки.
Тебе́ благоразу́мно Влады́ко, я́коже до́лжное / Мари́я приноша́ет ми́ро, / воспева́ющи во вся ве́ки.
Призыва́еши у́бо я́ко Челове́к Отца́, / я́ко Бог же Ла́заря воздвиза́еши. / Те́мже Тя пое́м Христе́ во ве́ки.
Благослови́м Отца́ и Сы́на и Свята́го Ду́ха, Го́спода, и ны́не, и при́сно, и во ве́ки веко́в. Ами́нь.
Хва́лим, благослови́м, покланя́емся Го́сподеви, пою́ще и превознося́ще во вся ве́ки.
Катавасия Глас 8: Царя́ Небе́снаго,/ Его́же пою́т во́и А́нгельстии,// хвали́те и превозноси́те во вся ве́ки.
Песнь 9
Ирмос, глас 8: Чи́стую сла́вно почти́м, лю́дие, Богоро́дицу,/ огнь Божества́ прии́мшую во чре́ве неопа́льно,// пе́сньми велича́ем.
Лю́дие ви́девше ходя́ща мертвеца́ четверодне́вна, / удиви́вшеся чудеси́, вопия́ху Изба́вителю, / Бо́га Тя в пе́снех велича́юще.
Лю́дие ви́девше ходя́ща мертвеца́ четверодне́вна, / удиви́вшеся чудеси́, вопия́ху Изба́вителю, / Бо́га Тя в пе́снех велича́юще.
Предуверя́я сла́вное воста́ние Твое́, о Спа́се мой, / ме́ртва четверодне́вна, из а́да свобожда́еши Ла́заря, / пе́сньми Тя велича́юща.
Ин кано́н
Почита́я Твоего́ Отца́, и показу́я, я́ко не богопроти́вен еси́, / моли́тву де́еши, Христе́, / самовла́стно воздви́г четверодне́внаго.
Из гро́ба четверодне́внаго Ла́заря воздвиза́еши, / тридне́внаго, Христе́, Твоего́ воста́ния, / всеи́стиннаго всем показу́я сведе́теля.
Хо́диши, и слези́ши, веща́еши же, Спа́се мой, / челове́ческое показу́я Твое́ де́йство, / Боже́ственное же явля́я, воздвиза́еши Ла́заря.
Сла́ва и ны́не,
Катавасия Глас 8: Вои́стинну Богоро́дицу/ Тя испове́дуем,/ спасе́ннии Тобо́ю, Де́во Чи́стая,// с безпло́тными ли́ки Тя велича́юще.
Малая ектения
Cветильны
Сло́вом Твои́м, Сло́ве Бо́жий, / Ла́зарь ны́не возска́чет к житию́ па́ки поте́к, / и с ве́твьми лю́дие Тя держа́вне почита́ют, / я́ко в коне́ц погуби́ши ад сме́ртию Твое́ю. (Дважды)
Сла́ва и ны́не,
Ла́зарем тя Христо́с уже́ разруша́ет, сме́рте, / и где твоя́ а́де побе́да? / Вифа́нии плач ны́не на тебе́ преставля́ется, / вси ве́тви побе́ды Тому́ принесе́м.
Стихиры на хвалитех
Глас 1: Воскресе́ние и жизнь челове́ком сый Христе́,/ гро́бу Ла́зареву предста́л еси́,/ уверя́я нам два существа́ Твоя́, Долготерпели́ве,/ я́ко Бог и Челове́к/ от Чи́стыя Де́вы прише́л еси́./ Я́коже бо Челове́к вопроша́л еси́: где погребе́ся?/ И я́коже Бог воскреси́л еси́// живоно́сным манове́нием четверодне́внаго.
Хвали́те Его́ во гла́се тру́бнем. хвали́те Его́ во псалти́ри и гу́слех.
Ла́заря уме́рша четверодне́внаго/ воскреси́л еси́ из а́да, Христе́, пре́жде Твоея́ сме́рти,/ потря́с сме́ртную держа́ву,/ и еди́нем люби́мым, всех челове́к провозвеща́яй из тли свобожде́ние./ Те́мже покланя́ющеся Твое́й всеси́льней вла́сти вопие́м:// благослове́н еси́, Спа́се, поми́луй нас.
Хвали́те Его́ в тимпа́не и ли́це. хвали́те Его́ во стру́нах и орга́не.
Ма́рфа и Мари́я Спа́су глаго́ласте:/ а́ще бы зде был еси́ Го́споди,/ не бы у́мерл Ла́зарь:/ Христо́с же воскресе́ние усо́пших,/ сего́ уже́ четверодне́внаго из ме́ртвых воскреси́./ Прииди́те вси ве́рнии,/ Сему́ поклони́мся гряду́щему во сла́ве,// спасти́ ду́ши на́ша.
Хвали́те Его́ в кимва́лех доброгла́сных, хвали́те Его́ в кимва́лех восклица́ния. Вся́кое дыха́ние да хва́лит Го́спода.
Божества́ Твоего́, Христе́, подава́я ученико́м Твои́м о́браз,/ в наро́дех смиря́л еси́ Себе́, утаи́тися хотя́./ Те́мже апо́столом я́ко прове́дец Бог,/ Ла́зареву смерть предре́кл еси́./ В Вифа́нии же прису́тствуяй лю́дем,/ дру́га Твоего́ гро́ба не неве́дый,/ уве́дети вопроша́л еси́ я́ко Челове́к./ Но Тобо́ю четверодне́вен воскресы́й,/ Боже́ственную Твою́ держа́ву яви́,/ всеси́льне Го́споди, сла́ва Тебе́.
Сла́ва
Ве́лие и пресла́вное чу́до соверши́ся днесь,/ я́ко мертвеца́ четверодне́внаго,/ из гро́ба Христо́с возгласи́в воздви́же и дру́га призва́,/ славосло́вим Его́, я́ко пресла́вна,/ да моли́твами пра́веднаго Ла́заря// спасе́т ду́ши на́ша.
И ныне
Преблагослове́нна еси́, Богоро́дице Де́во,/ Вопло́щшим бо ся из Тебе́ ад плени́ся,/ Ада́м воззва́ся,/ кля́тва потреби́ся,/ Е́ва свободи́ся,/ смерть умертви́ся и мы ожи́хом./ Тем воспева́юще, вопие́м:/ благослове́н Христо́с Бог,// благоволи́вый та́ко, сла́ва Тебе́.
Славословие великое
Тропарь
Глас 1: О́бщее воскресе́ние/ пре́жде Твоея́ стра́сти уверя́я,/ из ме́ртвых воздви́гл еси́ Ла́заря Христе́ Бо́же./ Те́мже и мы я́ко о́троцы побе́ды зна́мения нося́ще,/ Тебе́ Победи́телю сме́рти вопие́м:/ оса́нна в вы́шних,// благослове́н Гряды́й во и́мя Госпо́дне.
Сугубая ектения
Ектения просительная
Отпуст
Многолетие
1-й час
Тропа́рь в Ла́зареву суббо́ту, глас 1
О́бщее воскресе́ние/ пре́жде Твоея́ стра́сти уверя́я,/ из ме́ртвых воздви́гл еси́ Ла́заря Христе́ Бо́же./ Те́мже и мы я́ко о́троцы побе́ды зна́мения нося́ще,/ Тебе́ Победи́телю сме́рти вопие́м:/ оса́нна в вы́шних,// благослове́н Гряды́й во и́мя Госпо́дне.
Конда́к в Ла́зареву суббо́ту, глас 2
Всех ра́дость Христо́с, / И́стина, Свет, Живо́т и ми́ра Воскресе́ние, / су́щим на земли́ яви́ся Свое́ю бла́гостию, / и бысть о́браз Воскресе́ния, / всем подая́ Боже́ственное оставле́ние.
Отпуст
Многолетие