Тыуған көнөң менән, Сәғиҙулла!
Бөгөнгө көндә кем ҡотлай, мине ярата – рәхмәт! Кемдәр мине яратмай, һеҙгә лә рәхмәт, сөнки тормош шулай...
Бөгөн Башҡортостандың халыҡ артисы Сәғиҙулла Байегеттең ғаиләһендә икеләтә байрам – үҙенең һәм тормош иптәшенең тыуған көндәре.
Сәғиҙулла тыуған көнөнә ҡарата бик үҙенсәлекле фекерҙә.
– Тыуған көн, күңелгә һәйбәт. Әлбиттә, ул хәтлем үк идеаль кеше түгелмен. Гонаһтарым бар, һәр кеше лә гонаһлы була инде. Әммә барыбер был донъяла йәшәйһең, нисектер ҡыуанаһың, хаталанаһың, хатаңды төҙәтәһең, ғәфү үтенәһең, яңынан хаталанаһың... Кешенең тормошо, булмышы шулай. Рәхмәт һеҙгә, ҡәҙерле дуҫтарым, туғандарым! Бөгөнгө көндә кем ҡотлай, мине ярата – рәхмәт! Кемдәр мине яратмай, һеҙгә лә рәхмәт, сөнки тормош шулай. Дауам итәбеҙ, йәшәйбеҙ, Алла бирһә. Һуғыш-афәттәр үтеп китһен, егеттәребеҙ иҫән-һау тыуған йорттарына ҡайтһын, йәшәү ғүмерҙәрен дауам итәйек. Атай-әсәйҙәребеҙ, яҡындарыбыҙ, балаларыбыҙ көтөп торһон. Һау булайыҡ, сәләмәт булайыҡ. Рәхмәт булғанығыҙ өсөн, дуҫтар! – тип хис-тойғолары менән уртаҡлашты артист.
Тормош иптәше Айгөлгә лә матур һүҙҙәрен йәлләмәй:
“Аҡыллым, матурым, яратҡаным, һөйөклөм - Айгөлөм! Бөгөн һинең күркәм юбилейың. Ҡоростай ныҡлы һаулыҡ, оҙон ғүмер, ғаилә именлеге, балаларыбыҙҙың ҡәҙер-хөрмәтендә оҙаҡ йылдар буйына, ошо ғына килеш ҡулға ҡул тотоношоп йәшәргә насип булһын!”
Беҙ ҙә Сәғиҙулланы һәм уның ҡатыны Айгөлдө тыуған көндәре менән ҡотлайбыҙ! Киләсәктә лә бәхетле, матур, башҡорт рухлы ғаилә булып ҡалығыҙ!
Әйткәндәй, Сәғиҙулла 12 апрелдә “Башҡортостан” дәүләт концерт залында ҙур концерт ҡуясаҡ. Әле ул шул сараға йүгереп әҙерләнеп йөрөй.
“Мин бик хөрмәт иткән, һеҙ яратҡан Ян ҡустым менән бер аҙ йырлашып, киләсәк концертҡа әҙерләнеп, йырҙар һайлап ултырабыҙ әле.
Йыр һайлау еңел эш түгел икән… Бер йыр башлайбыҙ — икенсеһе иҫкә төшә, тағы берәүен йырлап ҡарайбыҙ...
Ҡыҫҡаһы, бер аҙ моңланып, бер аҙ үткәндәрҙе иҫкә төшөрөп киләсәк концертҡа пыр туҙып әҙерләнәбеҙ, ә концертҡа аҙ ғына самаһы көндәр ҡалды бит. Ваҡыт тигәнең бигерәк тиҙ үтә икән шул...” тип әлеге мәшәҡәттәре хаҡында уртаҡлашты.
Фото: Сәғиҙулла Байегеттең социаль селтәрҙәге сәхифәһенән алынды.