Кытыл Дьураҕа саҥа хочуолунай үлэҕэ киирэн үгүс ыаллар, тэрилтэлэр киинтэн сылааска холбонон абыраннылар. Кыаллан хапсыбатахтар эһиилги сылы эрэнэ күүтэллэр, хас ыал эбии холбоноро чуолкайдана илик. - Бу былдьаһыктаах күннэргэ хочуолунайга анаан чоҕу тиэйии салҕанар. Билиҥҥи туругүнан 726 туонна чох тиэлиннэ, барыта 1880 туоннаны хаһааныахтаахпыт. Кыһыҥҥы суол хаалыар диэри онон улахан үлэ бара турар. Саҥа хочуолунайбыт тымныы күҥҥэ барыллаан 6 туонна чоҕу “сиир”, сменаҕа иккилии киһи хачыгаардыыр. Оттук иһин тарыып нэһилиэнньэҕэ билиҥҥитэ улаханнык уларыйа илик, - диэн күннээҕи түбүктэриттэн иһитиннэрдэ Хаҥаластааҕы ОДьХХ Кытыл-Дьуратааҕы учаастагын салайааччыта Ньургун Лотов. Чоҕу тиэйии салҕанар, күн-дьыл туран биэрдэр диэн олоҕу-дьаһаҕы хааччыйар дьон баҕа санаалаахтар. Людмила Аммосова. Ньургун Лотов хаартыскаҕа түһэриилэрэ. @Новости газеты «Хангалас»