Ҡырым һәм Севастополдең Рәсәйгә ҡайтыуына 12 йыл тулды
Андрей Назаров Ҡырымдың Башҡортостан тормошондағы әһәмиәтен билдәләне.
Башҡортостан Хөкүмәте Премьер-министры Ҡырым ярымутрауының республикабыҙҙың ҙур дуҫы һәм уҙаҡташы булыуын билдәләне. Ҡырым Өфөлә үткән Халыҡ-ара Ялта форумының һәр ваҡыт абруйлы ҡунағы һәм әүҙем эшлекле уҙаҡташы. Ике республика һәр ваҡыт инвестициялар, туризмды үҫтереү, логистика һәм сәнәғәт кооперацияһы өсөн мөмкинлектәр эҙләй.
2014 йылда илебеҙ тарихында ҙур ваҡиға була – Рәсәй составына Ҡырым һәм Севастополь ҡайта. Төбәк һуғыштар һәм конфликттар менән бәйле күп ваҡиғалар кисерә, әммә һәр ваҡыт тергеҙелә һәм сәскә атыуын дауам итә. Был хаҡта Башҡортостан Хөкүмәте Премьер-министры Андрей Назаров белдерҙе.
– Әммә Ҡырымда иң мөһиме – кешеләр. Улар эшһөйәр, ҡунаҡсыл, асыҡ. Унда ла йолаларҙы ҡәҙерләйҙәр, өлкәндәрҙе хөрмәт итәләр, күршеләргә ярҙам итәләр. Һәм беҙгә, Башҡортостанға, был яҡын: беҙгә күп милләтлелектең көсө, күңел йылыһы һәм үҙебеҙҙекеләргә ышаныслы таяныс таныш. Туғандаш республикаға тыныс күк йөҙө һәм тыныс көндәр теләйем, — тип уртаҡлашты Андрей Назаров социаль селтәрҙә сәхифәһендә.
Хәтерегеҙгә төшөрәбеҙ, бөгөн Өфөлә Ҡырымдың һәм Севастополдең Рәсәйгә ҡушылыуы уңайынан телебашня байрам балҡышы аласаҡ – Башҡортостандың баш ҡалаһындағы телевизион вышканың панноһын Рәсәй триколоры һүрәте һәм "18 март – Ҡырымдың Рәсәйгә ҡушылыу көнө” тигән яҙыу биҙәйәсәк.
Фото: Башҡортостан Хөкүмәте Премьер-министры Андрей Назаровтың социаль селтәрҙәге сәхифәһенән.