Святитель Лука почитается как целитель и чудотворец, ему молятся об исцелении от болезней, перед операциями, а также о даровании сил и укреплении веры.
Кондак 1
Возбра́нный святи́телю Це́ркве Правосла́вныя и испове́дниче, возсия́вый стране́ на́шей в земле́ Кры́мстей, я́ко светоза́рное свети́ло, до́бре потруди́выйся и за и́мя Христо́во гоне́ние претерпе́вый, прославля́юще просла́вльшаго тя Го́спода, дарова́вшаго нам тебе́ но́ваго моли́твенника и помо́щника, похва́льное воспева́ем ти пе́ние: ты же, я́ко име́яй ве́лие дерзнове́ние ко Влады́це небесе́ и земли́, от вся́ких неду́гов душе́вных и теле́сных свободи́ нас и до́бре стоя́ти в Правосла́вии укрепи́, да вси во умиле́нии зове́м ти:
Ра́дуйся, святи́телю Кры́мский испове́дниче Луко́, врачу́ благи́й и ми́лостивый.
Икос 1
А́нгелов собесе́дниче и челове́ков наста́вниче, Луко́ пресла́вный, подо́бно Евангели́сту и апо́столу Луке́, ему́же тезоимени́т сый, от Бо́га дар цели́ти неду́ги челове́ческия прия́л еси́, во врачева́нии боле́зней бли́жних, мно́гия труды́ подъе́мля, и, плоть нося́, о пло́ти не раде́л еси́, де́лы до́брыми Отца́ Небе́снаго просла́вил еси́. Те́мже благода́рно во умиле́нии зове́м ти:
Ра́дуйся, от ю́ности ра́зум свой и́гу Христо́ву покори́вый.
Ра́дуйся, пречестно́е Святы́я Тро́ицы селе́ние бы́вый.
Ра́дуйся, блаже́нство ми́лостивых, по Сло́ву Го́спода, унасле́довавый.
Ра́дуйся, ве́рою Христо́вою и зна́нием богодарова́нным мно́гия неду́жныя исцели́вый.
Ра́дуйся, стра́ждущих неду́гами теле́сными врачу́ милосе́рдный.
Ра́дуйся, во дни бра́ни вожде́й и во́инов исцели́телю.
Ра́дуйся, всех враче́в наста́вниче.
Ра́дуйся, ско́рый в ну́ждах и ско́рбех су́щим помо́щниче.
Ра́дуйся, Це́ркви Правосла́вныя утвержде́ние.
Ра́дуйся, земли́ на́шея озаре́ние.
Ра́дуйся, кры́мския па́ствы похвало́.
Ра́дуйся, гра́да Симферо́поля украше́ние.
Ра́дуйся, святи́телю Кры́мский испове́дниче Луко́, врачу́ благи́й и ми́лостивый.
Кондак 2
Ви́дя в челове́цех во вре́мя врачева́ний, а́ки в зерца́ле, прему́дрость и сла́ву Творца́ вся́ческих Бо́га, к Нему́ ду́хом вы́ну возноси́лся еси́, богому́дре, све́том же богоразу́мия твоего́ и нас озари́, да вопие́м ку́пно с тобо́ю: Аллилу́иа.
Икос 2
Ра́зум твой Боже́ственными уче́ньми просвети́л еси́, Луко́ всесла́вне, отве́ргнув вся́ко плотско́е мудрова́ние, с ра́зумом же и во́лю повину́л еси́ Го́сподеви. Подо́бен апо́столом быв, ти́и бо по сло́ву Христо́ву: «Гряди́та по Мне, и сотворю́ вы ловца́ челове́ком» оста́виша вся и по Нем идо́ша, и ты, свя́те, услы́шав зову́щаго тя на служе́ние Го́спода Иису́са чрез раба́ Своего́ архиепи́скопа Ташке́нтского Инноке́нтия а́бие прие́млеши свяще́нство в Церкви Правосла́вней. Сего́ ра́ди, я́ко богому́драго наста́вника, тя ублажа́юще, воспева́ем си́це:
Ра́дуйся, А́нгела Храни́теля увеселе́ние.
Ра́дуйся, я́ко того́ николи́же опеча́лил еси́.
Ра́дуйся, во уче́нии преспева́вый и тем мудрецы́ ми́ра сего́ удиви́вый.
Ра́дуйся, от творя́щих беззако́ние уклони́выйся.
Ра́дуйся, Бо́жия Прему́дрости созерца́телю и пропове́дниче.
Ра́дуйся, и́стиннаго богосло́вия златослове́сный учи́телю.
Ра́дуйся, апо́стольских преда́ний блюсти́телю.
Ра́дуйся, свеще́, Бо́гом возже́нная, мрак нече́стия разгоня́ющая.
Ра́дуйся, звездо́, путь ко спасе́нию показу́ющая.
Ра́дуйся, Правосла́вия ревни́телю.
Ра́дуйся, раско́льников обличи́телю.
Ра́дуйся, свиде́ний и оправда́ний Госпо́дних возжада́вый.
Ра́дуйся, святи́телю Кры́мский испове́дниче Луко́, врачу́ благи́й и ми́лостивый.
Кондак 3
Си́лою благода́ти Бо́жия, еще́ во вре́менней жи́зни прия́л еси́ дар, свя́те Луко́, неду́ги цели́ти, да вси, усе́рдно притека́ющии к тебе́ неду́гов теле́сных и па́че душе́вных исцеле́ния сподобля́ются, вопия́ Бо́гу: Аллилу́иа.
Икос 3
Име́я неусы́пное попече́ние о спасе́нии душ, вве́ренных тебе́ от Бо́га, Луко́ блаже́нне, па́стырски к душеспаси́тельной жи́зни, и сло́вом и са́мым де́лом непреста́нно наставля́л еси́. Сего́ ра́ди приими́ от на́шего усе́рдия досто́йныя похвалы́ тебе́:
Ра́дуйся, Бо́жия ра́зума испо́лненный.
Ра́дуйся, благода́тию Ду́ха Свята́го преосене́нный.
Ра́дуйся, нищеты́ Христо́вы подража́телю.
Ра́дуйся, па́стырю до́брый, уклоня́ющихся от ве́ры правосла́вныя и блужда́ющих по гора́м суему́дрия, взыска́вый.
Ра́дуйся, де́лателю виногра́да Христо́ва, чад Бо́жиих укрепля́яй в и́стинной ве́ре правосла́вней.
Ра́дуйся, щи́те, защища́яй благоче́стие.
Ра́дуйся, непоколеби́мое столпе Правосла́вия.
Ра́дуйся, тве́рдый побо́рниче и́стины.
Ра́дуйся, святи́телю Кры́мский испове́дниче Луко́, врачу́ благи́й и ми́лостивый.
Примечание: Полный текст акафиста включает 12 кондаков и 12 икосов. Здесь приведены первые три для ознакомления. Полный текст можно найти в печатных изданиях или на православных онлайн-ресурсах .
Тропарь и кондак святителю Луке
Эти краткие молитвословия часто читают отдельно, когда нужна скорая помощь святого .
Тропарь, глас 1
Возвести́телю пути́ спаси́тельнаго, / испове́дниче и архипа́стырю Кры́мския земли́, / и́стинный храни́телю оте́ческих преда́ний, / сто́лпе непоколеби́мый, Правосла́вия наста́вниче, / врачу́ богому́дрый, святи́телю Луко́, / Христа́ Спа́са непреста́нно моли́ / ве́ру непоколеби́му правосла́вным дарова́ти // и спасе́ние, и ве́лию ми́лость.
Кондак, глас 8
Я́коже звезда́ всесве́тлая, доброде́тельми сия́ющи, / был еси́ святи́телю, / ду́шу же равноа́нгельну сотвори́л еси́, / сего́ ра́ди святи́тельства са́ном почте́н был еси́, / и во изгна́нии же от безбо́жных мно́го пострада́л еси́ / и непоколеби́м ве́рою пребы́в, / враче́бною му́дростию мно́гия исцели́л еси́. / Те́мже ны́не честно́е те́ло твое́, от земны́х недр обре́тенное ди́вно, / Госпо́дь просла́ви, / да вси ве́рнии вопие́м ти: / ра́дуйся, о́тче святи́телю Луко́, // земли́ Кры́мския похвало́ и утвержде́ние.
Молитва Святителю Луке Войно- Ясенецкому
О всеблаже́нный испове́дниче, святи́телю о́тче наш Луко́, вели́кий уго́дниче Христо́в. Со умиле́нием прекло́ньше коле́на серде́ц на́ших, и припа́дая к ра́це честны́х и многоцеле́бных моще́й твои́х, я́ко ча́да отца́, мо́лим тя усе́рдно: услы́ши нас гре́шных и принеси́ моли́тву на́шу к ми́лостивому и человеколюби́вому Бо́гу, Ему́же ты ны́не в ра́дости святы́х и с ли́ки а́нгел предстои́ши. Ве́руем бо, я́ко ты лю́биши нас то́ю же любо́вию, е́юже вся бли́жния твоя́ возлюби́л еси́, во дни пребыва́ния твоего́ на земли́.
Испроси́ у Христа́ Бо́га на́шего, да утверди́т в лю́дех свои́х дух пра́выя ве́ры и благоче́стия: па́стырем да даст святу́ю ре́вность и попече́ние о спасе́нии люде́й: неве́рующих вразуми́ти, заблу́ждших наста́вити, отпа́дших обрати́ти. Всем же нам да́руй от Го́спода потре́бная ко спасе́нию вре́менныя и ве́чныя жи́зни: градо́в на́ших утвержде́ние, земли́ плодоно́сие, от гла́да и па́губы избавле́ние, ско́рбящим утеше́ние, неду́гующим исцеле́ние, заблу́ждшим на путь и́стины возвраще́ние, роди́телем благослове́ние, ча́дом во стра́се Госпо́днем воспита́ние и науче́ние, си́рым и безпомо́щным по́мощь и заступле́ние.
Да́руй нам твое́ архипа́стырское благослове́ние, да таковы́м моли́твенным покро́вом твои́м изба́вимся от ко́зней лука́ваго и избе́гнем вся́кия вражды́ и нестрое́ний, ересе́й и раско́лов. Наста́ви нас на путь спаси́тельный, моли́ о нас недосто́йных пред престо́лом Вседержи́теля, и ми́рное христиа́нское житие́ сподо́би нас сконча́ти и в Ца́рствии Небе́снем сподо́битися с тобо́ю сла́вити Отца́ и Сы́на и Свята́го Ду́ха, во ве́ки веко́в. Ами́нь.
Молитва об исцелении
О святи́телю блаже́нный, о́тче наш Луко́, ве́лий уго́дниче Христо́в! Умиле́нно прекло́ньше коле́на серде́ц на́ших, припа́дающе к ра́це честны́х и многоцеле́бных моще́й твои́х, я́ко ча́да отца́, мо́лим тя со тща́нием: услы́ши нас гре́шных, и принеси́ моли́тву на́шу ко ми́лостивому и человеколюби́вому Бо́гу, Ему́же ты ны́не в ра́дости святы́х и с ли́ки а́нгел предстои́ши. Тебе́ бо про́сим: огради́ нас, ве́рных чад Це́ркве, от все́х собла́знов ми́ра сего́ и наважде́ний духо́в зло́бы и па́стырски упаси́ нас ко спасе́нию.
Врачу́ богодаро́ванный! Неду́гующим исцеле́ние да́руй, боля́щим и в немоще́х теле́сных су́щим скоропредста́тельную по́мощь низпосли́, да вси в любо́вь прии́мше Творца́ и Спа́са на́шего Иису́са Христа́, Того́ милосе́рдием, Того́ хода́тайством и твои́м предста́тельством спасе́ни бу́дем. Ами́нь.
Дорогие друзья, подписывайтесь на мою страницу.
Поддерживайте посильной денежной помощью работу автора переводом по ссылке. >
