"Туйға... 500 һум аҡса һалдылар!"
Ҡысҡырып әйткәнемде һиҙмәй ҙә ҡалдым. Ҡаршыла ултырған ҡоҙа-ҡоҙағыйҙың күҙҙәре маңлайына менде: "Тимәк, беҙҙекеләр?.."
Ниһайәт, күптәнге теләгебеҙ тормошҡа ашты. Килен алдыҡ. Улым бер матур ҙа, уңған да ҡыҙ менән танышып, оҙаҡ ҡына дуҫлашып йөрөнөләр. Бергә эшләйҙәр ине. Беҙгә лә ҡунаҡҡа бергә ҡайттылар, улар яғына ла.
Ваҡыт та еткәйне инде. Улыбыҙға тип алып ҡуйған фатир бар. Ул күптән инде беҙҙән айырым шунда йәшәй. Ремонт яһап, шөкөр, килен төшөрөрлөк тә булды.
Барыһы ла яҡшы ғына барҙы һымаҡ. Ҡоҙа-ҡоҙағыйҙар менән танышып, һөйләшеп-килешкәс, туй көнөн билдәләнек. Уларҙың да үҙебеҙгә тиң кешеләр булыуына һөйөндөк. Туй ҙа матур үтте, ике яҡтан да бына тигән туғандар йыйылғайны. Әммә ул тамамланғас, кәйефте боҙған хәл булды.
Туй мәжлесенән һуң балалар, ҡоҙа-ҡоҙағыйҙар менән туйға төшкән аҡсаны, бүләктәрҙе барларға ултырҙыҡ. Хәҙер күбеһе конвертҡа аҡса һалып бирә. Заманы шундай. Туйҙар ҙа кафе-ресторанда үтә - сығымы шаҡтай ҙур. Шул хаҡты бер аҙ ҡаплаһа ла яҡшы.
Ләкин бер конвертты асҡас, артҡа йығылып китә яҙҙым. Эсенән... 500 һум аҡса сыҡты! Кемеһе мыҫҡыл итеп шунса һалғандыр, һис кенә лә башыма һыйҙыра алманым. Етмәһә яңы ғына туғанлашҡан кешеләр ҙә быны күрҙе. Оят булды. Хәтеремдән тиҙ генә туйға килгән дуҫтарҙы, туғандарҙы барлап сыҡтым - кемеһе шулай көлөргә йөрьәт итте икән? Юҡ, ундайға барырлыҡ кеше тапманым - бөтәһе лә ышаныслы, эшләйҙәр, мул тормошта йәшәйҙәр, машина өҫтөнә машина алалар, етешһеҙ, мохтаж түгелдәр. Был турала ҡысҡырып әйткәнемде һиҙмәй ҙә ҡалдым.
Ҡаршыла ултырған ҡоҙа-ҡоҙағыйҙың күҙҙәре маңлайына менде: "Тимәк, беҙҙекеләр һалған?" Улар ҙа үҙ яғынан саҡырылғандарҙы хәтерҙән үткәреп сыҡты. Төртөп күрһәтерҙәйен тапманылар. Ике яҡ та уңайһыҙ хәлдә ҡалдыҡ: улар - беҙҙән, беҙ уларҙан шикләндек. Туғанлашыу шундай күңелһеҙ хәлдән башланмаһын ине лә бит...
Был ваҡиғаны оноторға тырышһам да, һаман баштан сыҡмай. Был беҙҙе күрәләтә мыҫҡыл иткән кеүек бит. Кемеһе шулай эшләне икән?..
Бына шулай, яҡындан аралашып йәшәгән кешеләреңдең дә күңелендә аламалыҡ, этлек була икән. Хәҙер һәр кеменә шикләнеп ҡарайым.
Гөлсинә.
Беҙҙең МАХ каналына max.ru/gazetabash... ҡушылығыҙ!