На прэзентацыі, якая ладзілася падчас падвядзення вынікаў работы сферы культуры Смаргоншчыны, супрацоўнікі музея-сядзібы Міхала Клеафаса Агінскага прапанавалі для азнаямлення некалькі цікавых фотаздымкаў з гісторыяй.
«Каштоўнай знаходкай стаў партрэт жонкі Міхала Клеафаса Агінскага Марыі дэ Неры ў сталым узросце. Выяву знайшлі ў Жэмайцінскім мастацкім музеі горада Плунге. Гэта адкрыццё мае асаблівае значэнне, паколькі большасць вядомых партрэтаў адлюстроўваюць жонку кампазітара ў маладыя гады. Цікава, што партрэт захоўваўся ў былой сядзібе, якая належала Нікаласу, малодшаму ўнуку Міхала Клеафаса Агінскага. Цяпер у ёй знаходзіцца мастацкі музей, які захоўвае спадчыну і традыцыі сямейнай рэзідэнцыі Агінскіх», – зазначыла Людміла Градзіцкая, дырэктар музея-сядзібы Міхала Клеафаса Агінскага.
Акрамя таго, фонды Залескага музея-сядзібы папоўніліся яшчэ адным партрэтам дачкі кампазітара – маленькай Амеліі. Гэты рарытэт перадала Вольга Папко, дырэктар Цэнтра даследаванняў беларускай культуры, мовы і літаратуры Нацыянальнай акадэміі навук. Падчас працы ў архівах і падрыхтоўкі да навуковых выступаў ёй удалося знайсці гэты ўнікальны здымак, які папаўняе калекцыю партрэтаў дзяцей Міхала Клеафаса.
Супрацоўнікі музея таксама звярнулі ўвагу на нечаканую літаратурную сувязь. Яны даследавалі постаць вядомага нямецкага пісьменніка-рамантыка, кампазітара і мастака Эрнста Тэадора Амадэя Гофмана. Аўтар сусветна вядомай казкі «Шчаўкунок і Мышыны кароль» быў не толькі пісьменнікам, але і таленавітым музычным крытыкам. Гісторыкі сцвярджаюць, што Гофман, які моцна любіў музыку і сам пісаў оперы, высока цаніў творчасць Агінскага. У сваіх музычных рэцэнзіях ён неаднаразова звяртаў увагу на мелодыі Агінскага, адзначаючы іх элегантнасць і глыбокі лірызм, блізкі да эстэтыкі таго часу.
Гэтыя знаходкі – яскравае сведчанне таго, што культурная спадчына не ведае межаў, а мелодыі Агінскага, якімі калісьці захапляўся сам Гофман, і сёння працягваюць аб’ядноўваць людзей у пошуку прыгожага. Праз намаганні даследчыкаў, музей у Залессі па-ранейшаму здзіўляе і прыцягвае сваю ўвагу.
Галіна АНТОНАВА
Фота з архіва музея-сядзібы Міхала Клеафаса Агінскага
Теги: общество музей сельсовет Залесский сельсовет