12 сакавіка 1986 года, 40 гадоў таму, у Гродне быў створаны гісторыка-культурны клуб "Паходня", які стаў адным з сімвалаў перабудовы ў горадзе.
Першае пасяджэнне, скліканае Міколам Тарандам, адбылося ў гарадскім Доме культуры і сабрала 19 чалавек. Спачатку клуб называўся "Клуб аматараў гісторыі і культуры роднага краю". Неўзабаве суполка аб'яднала шырокае кола людзей: ад навукоўцаў і літаратараў да студэнтаў і школьнікаў, у тым ліку членаў камсамола і КПСС.
У траўні 1986 года Міхасю Ткачову прапанавалі стаць прэзідэнтам клуба, але ён спачатку адмовіўся. Аднак ужо ў чэрвені пагадзіўся ўзначаліць "Паходню", каб сваім аўтарытэтам абараніць яе ад нападак улад.
Клуб быў надзвычай актыўны:
▫️яго намаганнямі сталі традыцыйнымі Купалле, Дзяды, калядныя вечарыны ў Гродне
▫️члены таварыства ўдзельнічалі ў раскопках Старога замка, будаўніцтве помніка паўстанцам 1863 года на Воранаўшчыне, аднаўлялі гадзіннік на званіцы Гродзенскага фарнага касцёла.
▫️яны добраўпарадкоўвалі сядзібу Францішка Багушэвіча ў Кушлянах і Гродзенскія могілкі
▫️ арганізоўвалі фестываль "Рок-крок" у 1988-м, удзельнічалі ў фестывалях "Басовішча" на Беласточчыне
▫️"Паходня" таксама збірала сродкі на помнік Кастусю Каліноўскаму ў Гродне.
Дзейнасць "Паходні" была настолькі прыкметнай, што ў 1988 годзе яна трапіла ў сакрэтную інструкцыю "Аб некаторых асаблівасцях цяперашняй грамадска-палітычнай абстаноўкі ў рэспубліцы", дзе разам з іншымі арганізацыямі была апісана як "група экстрэмісцкага толку". Інструкцыя адзначала, што такія групы "самавольна збіраюць розныя сходы, ствараюць усялякія камітэты, абвяшчаюць дэкларацыі і праграмы, спрабуючы ўцягнуць у гэтую сумніўную валтузню як мага больш людзей, асабліва моладзі".
У 2000-х гадах клуб перастаў весці актыўную дзейнасць. Мікола Таранда тлумачыў гэта тым, што многія былыя актывісты "Паходні" ініцыявалі стварэнне сваіх уласных таварыстваў і грамадскіх арганізацый. Арганізацыя была ліквідавана толькі у 2021 годзе, як і многія іншыя грамадскія аб'яднанні.
🔥 Ваш унёсак у гісторыю: Калі вам падабаецца тое, што мы робім, падтрымайце нашую працу кавай. Кожны данат – гэта новы пост і захаваная гісторыя Гродна!
🫶 ДАНАТ 🫶
👀 Зазірніце ў Гродна!
📸 Больш фота і цікавых фактаў: Дадайце візуальнага Гродна ў сваю стужку! Падпішыцеся на наш Instagram
🎥 Падрабязныя відэа-гісторыі: Глядзіце дакументальныя відэаматэрыялы на YouTube
