9 сакавіка 2026 г. пайшоў з жыцця вядомы вучоны, гісторык, даследчык кніжнай культуры Беларусі Георгій Якаўлевіч Галенчанка.
Нарадзіўся Георгій Якаўлевіч 28.02.1937 г. у г. Петразаводску. Скончыў Беларускі дзяржаўны ўніверсітэт імя У. І. Леніна (1960). Кандыдат гістарычных навук (1965). Тэма кандыдацкай дысертацыі: «Гісторыя беларускага кнігадрукавання XVI—XVIII стагоддзяў». Доктар гістарычных навук (1999). Тэма доктарскай дысертацыі: “Францыск Скарына – беларускі і ўсходніславянскі першадрукар”. У Інстытуце гісторыі НАН Беларусі працаваў старшым навуковым супрацоўнікам з 1968 па 1991 г., загадчыкам аддзела спецыяльных гістарычных навук з 1991 па 2005 г., галоўным навуковым супрацоўнікам аддзела гісторыі Беларусі сярэдніх вякоў і пачатку Новага часу з 2005 па 2020 г.
Лаўрэат Дзяржаўнай прэміі Рэспублікі Беларусь (1994).
Даследваў пытанні крыніцазнаўства XIII–XVIII стст., гістарыяграфію гісторыі Беларусі эпохі феадалізму, культуру, палітычныя, царкоўна-рэлігійныя і этнічныя адносіны, кірылічнае кнігадрукаванне XVI–XVIII стст., гістарыяграфію скарыназнаўства.
Бібліяграфія вучонага налічвае больш за 700 пазіцый, у тым ліку 7 манаграфій (на беларускай, рускай, французскай, італьянскай і нямецкай мовах), бібліяграфічныя даведнікі і каталогі, раздзелы ў калектыўных манаграфіях і падручніках.
Калектыў Інстытута гісторыі НАН Беларусі выказвае сардэчныя спачуванні родным і блізкім.
Развітанне з Георгіем Якаўлевічам адбудзецца ў чацвер 12 сакавіка 2026 г. у 14.00, па адрасе: г. Мінск, вул. Кульман, 33а.