Хаклы ялдагы укытучылар авылдашларының ялын мавыктыргыч итәргә омтылалар.
Үлмәс Шакиров исемендәге Асавка авылы китапханәсенең әйдәүче китапханәчесе Гөлсирә Миңнегалиева һәм авыл клубының мәдәни чаралар оештыручысы Лидия Пукрокова халыкның тормышын мәдәни яктан баету өстендә эшлиләр. Хаклы ялдагы укытучылар авылдашларының ялын мавыктыргыч итәргә омтылалар.
Гөлсирә Рамазан кызы һәм Лидия Гарифзяновна икесе дә авыл мәктәбендә эшләп, хаклы ялга туктаганнар. Гөлсирә Миңнегалиева балаларга башкорт теле һәм әдәбияты буенча белем бирсә, Лидия Пукрокова удмурт теле һәм әдәбиятын укыткан. Икесе дә утыз елдан артык педагогик стажга ия. Бер чорда хаклы ялга туктаганнар. Берсе — 5 ел, икенчесе 8 ел туктап торганнан соң, аларны янә эшкә чакыртып алалар. Сәбәбе гади– авылда эшләргә кеше табылмый. Эш яшендәгеләрнең күбесе йөреп эшлиләр. Берәүләре — Штәнде, күрше районның Кара авылында терлекчелек тармагында, икенчеләре “Танып” санаториясендә көч салалар. Эшкә берничә тапкыр чакырып килгәч кире борып чыгарырга базнат итмәдек, диләр алар.
Гөлсирә Рамазан кызы декрет урынына вакытлыча гына дип эшкә башлый. Мәктәп ябылганчы укытучылар коллективы, укучылар белән берлектә төрле чаралар үткәрергә җиңелрәк була. Бүгенге көндә укучыларның Штәнде авылыннан кайтканнарын көтеп тарабыз, дип ассызыклый ул. Тәмәке тартуга, наркоманига, эчкечелеккә каршы чараларда укучылар өчен төрле буклетлар таратырга тырышалар. Авыл халкы белән берлектә сәламәтлеккә бәйле чаралар еш оештыра ул. Авыл фельдшеры Гөлсимә Глимшина бу уңайдан шулай ук башлап йөрүчеләр сафында. Елның барлык фасылларында табигать кочагына чыгалар, я җәяү йөриләр, я чаңгыда шуалар. Велосипедларда да йөрергә яраталар икән. Авылның активистлары төрле чаралар оештыруда алыштыргысыз. Рәвидә Нигамәтова, Альфина Сайфидиярова, Фәния Муллаярова, Гөлфизә Садриева, Сәрия Мусакаевалар һәр чарада теләп катнашалар. Оста куллы ханымнар белән очрашулар үткәрә. Рита Аллаярова, Оксана Гайниярова, Эмилия Шагиахметова, Ләйсән Миңнегалиевалар китапханәдә осталык дәресләрен үткәрүдә көтеп алынган кунаклар. СВОда катнашучы яугирләрнең якыннары белән очрашулар, билегеле шәхесләргә багышланган чараларны уздырырга тырышлар. Күңел ачу чаралары да еш оештырыла. Быелгы елда узган Май чабу бәйрәме дә бихисап авылдашларын бер урынга туплаган.
— Мин эшемне яратып башкарам. Планнар төзү, чаралар үткәрүне без мәктәптән ук даими эшләп килгән кешеләр. Компьютер белән дә эшләү осталыгым җитәрлек. Ай саен видеотрансляция дә ясыйм. Әмма яшем бара, яшьләр килсен иде дигән теләктәмен, —ди Гөлсирә Рамазан кызы.
Клубта мәдәни чаралар оештырыучы Лидия Гарифзяновна да шундый ук фикердә. Тормыш иптәшем хупламаса, мин дә клубта эшли алмас идем ди ул. Сигез ел хаклы ялда булганнан соң авыл клубында мәдәни чаралар оештыручы булып урнаша ул. Мәгариф өлкәсендә эшләгән елларында ук ул сәнгатьтән аерылгысыз була. Мәктәптә “Чиборио” бию коллективына ул нигез сала. Клуб мөдире булып эшләгән Рәфиз Гарифуллин белән берлектә төрле чаралар оештыра. Сценарийлар яза. Балаларга күлмәкләрне авыл буйлар эзләп йөри, таба, булдыра. Сәхнәдә ярты гомере үтә, оештыру сәләте дә була үзендә. Башкортстан Республикасының удмурт халыклары арсында атказанганнар слётын оештыра. Ул актив тормыш позициясен белән яши. Удмурт халкына кагылышлы бер чарадан да калмый. Үзе яңа идеяләре, уй-фикерләре белән чыгыш ясый. Тәтешле, Калтасы, Ярмәкәй районнарында, Ижевск шәһәрендә узган чараларда даими катнаша ул. Үз милләтенең активистлары белән укмашып яши. Гомере буе мәдәнияттан аерылгысыз була. Биюче, җырчы ул.
Үзе артыннан калганнарны да ияртү сәләте салынган аңа. Иренеп тора торган кеше түгел ул. Бүген дә алар сәхнәдә. Рита Аллаярова, Әлфия Минниәхмәтова, Анжела Ахмадуллина, Залия Галиева, Флүзә Тукамышева, Федосия Ханова, Канафия Ахмадуллина, Юлия Исламовалар һәр концертның бизәге. Гармунчылар Володя Галиев, Фларит Фаткриевлар чыгышларын музыкаль яктан бизиләр.
—Нинди генә чара үткәрергә уйласак та авыл чатына белдерү куям. Быел авылда Сабан туй оештырдык. Авылның олысы да , кечесе дә җыелды. Балалар өчен оештырылган Карбыз бәйрәме дә күңелле узды . Нинди генә чарага да пешеренеп алып чыгырга тырышам, күмәкләшеп ботка ашаулар, чәй эчүләр дә авыл кеше өчен кадерле. Удмурт халкының яшәешен чагылдыру йөзеннән паласылар элдек, халыкка бик ошады. Эшемне яратып башкарам. Яшьлегем дә, инде өлкәнәйгән көнем дә чагу уза, картлыкта истә алырга вакыйгаларым күп, — ди Лидия Пукрокова.
Менә шундый берничә буын укучыларына белем һәм тәрбия биргән бай тәҗрибәле укытучылар бүген инде Асавка авылның мәдәни тормышына җан өрә. Халыкны рухи яткан баетырга, матурлыкны күрергә, булдырырга тырыша.
Рифина НИГАМӘЕВА.