☦️Молитва блаженной Матроне Московской.
О, блаже́нная ма́ти Матро́но, душе́ю на Небеси́ пред Престо́лом Бо́жиим предстоя́щи, те́лом же на земли́ почива́ющи и да́нною ти свы́ше благода́тию разли́чные чудеса́ источа́ющи, при́зри ны́не ми́лостивным твои́м о́ком на ны, гре́шныя, в ско́рбех, боле́знех и грехо́вных искуше́ниях дни своя́ иждива́ющия, уте́ши ны, отча́янныя, исцели́ неду́ги на́ши лю́тыя, от Бо́га нам по грехо́м на́шим попуща́емыя, изба́ви нас от мно́гих бед и обстоя́ний, умоли́ Го́спода на́шего Иису́са Христа́ прости́ти нам вся́ на́ша согреше́ния, беззако́ния и грехопаде́ния, и́миже мы от ю́ности на́шея да́же до настоя́щаго дне и часа́ согреши́хом, да твои́ми моли́твами получи́вше благода́ть и ве́лию ми́лость, просла́вим в Тро́ице Еди́наго Бога, Отца́, и Сы́на, и Свята́го Ду́ха, ны́не и при́сно, и во ве́ки веко́в. Ами́нь.
Дополнительные молитвенные тексты, посвящённые блаженной Матроне
Тропарь блаженной Матроне (глас 2)
Богом умудрённую блаженную старицу Матрону, земли Тульския процветение и града Москвы преславное украшение, восхвалим днесь, вернии. Сия бо, света дневнаго не познавши, светом Христовым просветися и даром прозрения и исцеления обогатися. Пресельница же и странница на земли бывши, ныне в чертозех Небесных Престолу Божию предстоит и молится о душах наших.
Кондак блаженной Матроне (глас 7)
К служению Христову от чрева матерня предызбранная, праведная Матроно, стезею скорбей и печалей шествующи, твёрдую веру и благочестие явивши, Богу угодила еси. Темже, почитающе память твою, молим тя: помози и нам в любви Божии пребывати, старице блаженная.
Величание блаженной Матроне
Величаем тя, святая праведная блаженная Матроно, и чтим святую память твою, ты бо молиши о нас Христа, Бога нашего.
Дни памяти блаженной Матроны Московской:
23 февраля (8 марта) — обретение мощей;
19 апреля (2 мая) — преставление;
20 августа (2 сентября) — Собор Московских святых;
22 сентября (5 октября)
— Собор Тульских святых.