Полный текст акафиста и молитвы.
Акафист - это благодарственное песнопение в честь святой Матроны Московской. Его читают, когда хотят особо прославить святую или просят её о заступничестве в трудных обстоятельствах . Традиционно он состоит из 13 кондаков (хвалебных песен) и 12 икосов (пространных песнопений), которые чередуются.
Кондак 1
Избра́нная Ду́хом Бо́жиим от пеле́н младе́нческих, блаже́нная ста́рице Матро́но, слепоту́ и не́мощь теле́сную ко очище́нию духо́вному от Бо́га прия́вшая, да́ром прозре́ния и чуде́с обогати́лася еси́ и венце́м нетле́нным от Го́спода украси́лася еси́. Сего́ ра́ди и мы благода́рне вене́ц похва́льный прино́сим ти, вопию́ще: Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Икос 1
А́нгел во пло́ти яви́лася еси́ на земли́, Матро́но блаже́нная, исполня́ющи во́лю Бо́жию. А́ще рождество́ твое́ в слепоте́ теле́сней бысть, но Госпо́дь, умудря́яй слепцы́ и любя́й пра́ведныя, просвети́ духо́внеи о́чи твои́, да послу́жиши лю́дем и дела́ Бо́жии явя́тся чрез тебе́. Мы же с любо́вию вопие́м ти такова́я:
Ра́дуйся, от младе́нчества Бо́гом избра́нная;
Ра́дуйся, благода́тию Ду́ха Свята́го от пеле́н осене́нная.
Ра́дуйся, да́ром чуде́с измла́да обогаще́нная;
Ра́дуйся, прему́дростию от Бо́га свы́ше испо́лненная.
Ра́дуйся, мы́сленныма очи́ма во́лю Бо́жию прозира́ющая;
Ра́дуйся, слепо́тствующих умо́м мудрецо́в ве́ка сего́ посрамля́ющая.
Ра́дуйся, ду́ши заблу́ждшия к Бо́гу приводя́щая;
Ра́дуйся, ско́рби и печа́ли утоля́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 2
Ви́дяще лю́дие и иере́й, егда́ креща́ше тя, блаже́нная, чу́дный столп о́блачный над главо́ю твое́ю и обоня́вше благоуха́ние ве́лие, дивля́хуся, что́ у́бо сия́ отрокови́ца бу́дет, пою́ще Бо́гу: Аллилу́иа.
Икос 2
Ра́зум име́я просвеще́нный, иере́й Бо́жий Васи́лий позна́, я́ко креща́емая от него́ сосу́д благода́ти Бо́жия есть, и тя, пра́ведная Матро́но, отрокови́цу свя́ту нарече́. От на́шего же усе́рдия прино́сим ти похвалы́ сия́:
Ра́дуйся, во святе́й купе́ли благода́тию Свята́го Ду́ха облагоуха́нная;
Ра́дуйся, на пе́рсех твои́х крест запечатле́нный име́вшая.
Ра́дуйся, моли́твеннице, от Бо́га люде́м дарова́нная;
Ра́дуйся, свеще́ неугаси́мая, пред Го́сподем сия́ющая.
Ра́дуйся, да́ром чудотворе́ния от Бо́га просла́вленная на земли́;
Ра́дуйся, венце́м неувяда́емым от Го́спода увенча́нная на небеси́.
Ра́дуйся, ми́лости Бо́жия гре́шным возвеща́ющая;
Ра́дуйся, от исто́чника воды́ живы́я жа́ждущия напая́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 3
Си́лу Бо́жия благода́ти ощуща́ющи, еще́ во младе́нчестве су́щи, Матро́но блаже́нная, ко ико́нам святы́м устремля́лася еси́, и чи́стым се́рдцем и младе́нческими усты́ хвалу́ Бо́гу возглаша́ла еси́: Аллилу́иа.
Икос 3
Иму́щи от Бо́га дар прозре́ния изде́тска, блаже́нная ма́ти, сокрове́нная серде́ц приходя́щих к тебе́ ве́дущи, и о́ным бу́дущая, я́ко настоя́щая сказу́ющи, мно́гия лю́ди на путь благоче́стия направля́ла еси́. Те́мже прославля́юще Бо́га, умудря́ющаго слепцы́, вопие́м тебе́ си́це:
Ра́дуйся, ди́вная прови́дице;
Ра́дуйся, сокрове́нных грехо́в обличи́тельнице.
Ра́дуйся, помраче́нных душе́ю пресве́тлая наста́внице;
Ра́дуйся, заблу́ждших ми́лостивая путеводи́тельнице.
Ра́дуйся, звездо́, ве́рным путь указу́ющая;
Ра́дуйся, свеще́, во тьме ве́ка сего́ светя́щая.
Ра́дуйся, еди́ному Бо́гу послужи́вшая;
Ра́дуйся, ко́зни диа́вольския благода́тию Ду́ха Свята́го попра́вшая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 4
Бу́ря недоуме́ния и смяте́ния о чудесе́х твои́х в лю́дех разве́яся, ма́ти блаже́нная, и ти́и, вразуми́вшу их Го́споду, ди́вному во святы́х Свои́х, просла́виша и восхвали́ша тя, Бо́гу же с благодаре́нием воспе́ша: Аллилу́иа.
Икос 4
Слы́шавше лю́дие, ма́ти Матро́но, я́ко по́мощь в неду́зех душе́вных и теле́сных подае́ши, прихожда́ху к тебе́ со упова́нием, и, сове́т благоприя́тен и исцеле́ние получи́вше, благодаря́ще Бо́га, воспева́ху тебе́:
Ра́дуйся, я́ко боле́знующих и стра́ждующих душе́ю прие́млеши;
Ра́дуйся, я́ко мир душа́м скорбя́щим да́руеши.
Ра́дуйся, в заблужде́ниих су́щих вразуми́тельнице;
Ра́дуйся, благоче́стия учи́тельнице.
Ра́дуйся, печа́лей на́ших утоли́тельнице;
Ра́дуйся, в ско́рбех уте́шительнице.
Ра́дуйся, блага́я безсре́бренице;
Ра́дуйся, неду́гов вся́ческих безме́здная врачева́тельнице.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 5
Боготе́чная звезда́ возсия́ла еси́, ма́ти блаже́нная Матро́но, во дни лихоле́тия во оте́чествии на́шем, я́ко но́вая испове́дница, и́го Христо́во дерзнове́нно и безбоя́зненно чрез все житие́ пронесла́ еси́, и благода́тию Бо́жиею укрепля́ема, подава́ла еси́ недоумева́ющим вразумле́ние, стра́ждущим осла́бу, больны́м исцеле́ние, благода́рственно зову́щим Бо́гу: Аллилу́иа.
Икос 5
Ви́девше мно́зи росси́йстии лю́дие чудеса́ и исцеле́ния, Бо́жиею благода́тию от тебе́ подава́емая: хромы́м – хожде́ние, разсла́бленным и на одре́ лежа́щим – исцеле́ние, бесну́ющимся – духо́в зло́бы отгна́ние, устреми́шася к тебе́, ма́ти, я́ко к исто́чнику неисчерпа́емому, от него́же испи́вше оби́льно, умиле́нным се́рдцем возопи́ша тебе́ такова́я:
Ра́дуйся, на путь пра́вый от младе́нчества призва́нная;
Ра́дуйся, пра́веднице, от Бо́га нам дарова́нная.
Ра́дуйся, цели́тельнице, неду́ги на́ша исцеля́ющая;
Ра́дуйся, в нужда́х на́ших ско́ро помога́ющая.
Ра́дуйся, душеполе́зными сове́ты нас вразумля́ющая;
Ра́дуйся, недоуме́ния на́ша ско́ро разреша́ющая.
Ра́дуйся, ду́хи нечи́стыя от челове́к отгоня́ющая;
Ра́дуйся, от вся́кого зла моли́твою твое́ю огражда́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 6
Пропове́дник свя́тости и пра́ведности жития́ твоего́, блаже́нная ма́ти, яви́ся святы́й и пра́ведный оте́ц Иоа́нн Кроншта́дтский, егда́ узре́ тя во хра́ме и наименова́ тя свою́ прее́мницу та́же и осмы́й сто́лп Росси́и. Вси же, слы́шавше сие́, просла́виша Го́спода, возглаша́юще Ему́ пе́снь: Аллилу́иа.
Икос 6
Возсия́ моли́твами твои́ми, ма́ти Матро́но, свет благода́ти Бо́жия в сердца́х, не ве́дущих Бо́га и грехми́ мно́гими прогневля́ющих Его́. Ти́и же, ви́дяще чудеса́, тобо́ю соверша́емая, обраща́хуся ко Го́споду, ублажа́юще тя си́це:
Ра́дуйся, по́двиги твои́ми Бо́га прославля́ющая;
Ра́дуйся, сла́ву Бо́жию нам явля́ющая.
Ра́дуйся, неве́рныя на путь пра́вый наставля́ющая;
Ра́дуйся, грехми́ оскверне́нныя моли́твами твои́ми очища́ющая.
Ра́дуйся, к покая́нию нас призыва́ющая;
Ра́дуйся, за вся благодари́ти Го́спода нас вразумля́ющая.
Ра́дуйся, храм Бо́жий люби́ти нас науча́ющая;
Ра́дуйся, во огра́ду церко́вную расточе́нныя о́вцы собира́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 7
Хотя́щи Пресвяту́ю Влады́чицу на́шу Богоро́дицу досто́йно ублажи́ти, ма́ти Матро́но, повеле́ла еси́ лю́дем написа́ти всечестны́й о́браз Ея́, «Взыска́ние поги́бших» имену́емый, и в хра́ме Бо́жием поста́вити, да вси, притека́ющии к ико́не Сей, ми́лостиваго Засту́пления Споручницу обря́щут, и ны́не, на са́мый о́браз сей взира́юще, уми́льно вопию́т Бо́гу: Аллилу́иа.
Икос 7
Но́вую показа́ засту́пницу и чудотво́рицу лю́дем ру́сским Госпо́дь, егда́ во дни гоне́ний безбо́жных, ма́ти блаже́нная, в мале́нькой хра́мине на У́зком, в ско́рбех и печа́лех притека́ющих к тебе́ приима́ла еси́, ве́рою и наде́ждою к Бо́гу укрепля́ла еси́, и цельбо́сною моли́твою твое́ю неду́ги отгоня́ла еси́, вопию́щим ти сицева́я:
Ра́дуйся, во юдо́ль земну́ю прише́льствие твое́ в ско́рбех мно́гих соверши́вшая;
Ра́дуйся, терпе́нием твои́м благода́тную по́мощь нам призыва́ющая.
Ра́дуйся, я́ко име́ла еси́ по́мощь благода́тную от ико́ны Бо́жия Ма́тере;
Ра́дуйся, я́ко предста́тельством Богоро́дицы мно́гия ско́рби претерпе́ла еси́.
Ра́дуйся, а́нгела-храни́теля незри́маго прия́вшая;
Ра́дуйся, с собо́ю нас в Небе́сное Ца́рствие наставля́ющая.
Ра́дуйся, неусы́пная бде́тельнице о здра́вии на́шем;
Ра́дуйся, ра́досте на́ша, в ско́рбех лю́тых нас посеща́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 8
Стра́нное и ди́вное чу́до яви́ла еси́, блаже́нная ста́рице, егда́ дар благода́тный от Го́спода прия́ла еси́ проро́чествовати, исцеля́ти и бе́сы изгоня́ти. Не утаи́ла еси́ тала́нта, Го́сподем ти да́ннаго, те́мже и нас, приходя́щих к тебе́ и моля́щихся тебе́, не оста́ви, в ско́рбех и боле́знех душе́вных и теле́сных погиба́ющих, да с ве́рою и любо́вию взыва́ем Бо́гу: Аллилу́иа.
Икос 8
Вся еси́ в Вы́шних, блаже́нная Ма́ти, и с Ни́жними не отступа́еши, при́сно пребыва́еши с на́ми гре́шными пред Го́сподем хода́тайствуя. Те́мже усе́рдно мо́лим тя: не пре́зри нас, гре́шных и скорбя́щих, в напа́стех и беда́х су́щих, уте́ши ны, отча́янныя, и исцели́ лю́тыя на́ша боле́зни, вопию́щия ти си́це:
Ра́дуйся, я́ко в житии́ твое́м от скорбе́й и напа́стей спаса́ла еси́;
Ра́дуйся, я́ко и по преставле́нии твое́м всем прося́щим по́мощи подае́ши.
Ра́дуйся, исцеле́ние боля́щим;
Ра́дуйся, ско́рое избавле́ние от бед.
Ра́дуйся, в ско́рбех и печа́лех утеше́ние;
Ра́дуйся, отча́янных спасе́ние.
Ра́дуйся, я́ко моли́твами твои́ми Госпо́дь грехи́ на́ша проща́ет;
Ра́дуйся, я́ко тобо́ю от мно́гих бед избавля́емся.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 9
Все естество́ а́нгельское удиви́ся житию́ твоему́ на земли́, блаже́нная ста́рице, я́ко Бо́га в пло́ти носи́вши, и ми́ру сему́, всеми́ прелестьми́ обложе́нну, яви́лася еси́ а́нгел во пло́ти. Мы же благодаря́ще Го́спода, дарова́вшаго нам такову́ю засту́пницу, вопие́м Ему́: Аллилу́иа.
Икос 9
Вети́и многовеща́ннии не возмо́гут досто́йно просла́вити свя́тость жития́ твоего́ и чудеса́, си́лою Бо́жиею тобо́ю соверша́емая. Мы же, хотя́ще песносло́вити ди́вную во святы́х Го́спода и тебе́, уго́дницу Его́, от избы́тка серде́чнаго дерза́ем воспева́ти ти сицева́я:
Ра́дуйся, го́рняго Иерусали́ма гражда́нко;
Ра́дуйся, я́ко у престо́ла Бо́жия предстои́ши.
Ра́дуйся, о ми́ре все́м всегда́ Бо́га моля́щая;
Ра́дуйся, и нас гре́шных при́сно помина́ющая.
Ра́дуйся, я́ко с любо́вию притека́ющих к тебе́ прие́млеши;
Ра́дуйся, ско́рая помо́щнице всем бе́дствующим.
Ра́дуйся, же́зле, хрома́ющих и разсла́бленных укрепля́ющий;
Ра́дуйся, врачева́тельнице на́ша, исцеле́ния исто́чники нам подаю́щая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 10
Спасти́ хотя́щи мно́гия лю́ди от страсте́й грехо́вных и па́дений, блаже́нная ма́ти, со умиле́нием и благодаре́нием взыва́ти науча́еши Бо́гу: Аллилу́иа.
Икос 10
Стена́ еси́ и заступле́ние всем прибега́ющим к тебе́, блаже́нная ста́рице, и путь к Небеси́ нам указу́еши, да в подви́зех, ско́рбех и боле́знех неосла́бно тече́м, взира́юще на твое́ терпе́ние многострада́льное, и вопие́м ти си́це:
Ра́дуйся, пра́вило ве́ры и благоче́стия;
Ра́дуйся, о́бразе терпе́ния и смире́ния.
Ра́дуйся, ле́ствице, возводя́щая к Небеси́;
Ра́дуйся, приста́нище ти́хое от бурь жите́йских.
Ра́дуйся, я́ко ве́рою приходя́щих к тебе́ ми́луеши;
Ра́дуйся, я́ко и бе́збожных не оста́вила еси́, ко Го́споду обраща́ющихся.
Ра́дуйся, я́ко и ра́ди нас гре́шных предстои́ши Святе́й Тро́ице;
Ра́дуйся, я́ко мо́лишися о душа́х на́ших.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 11
Пе́ние всеумиле́нное прино́сим ти, блаже́нная ма́ти Матро́но, и ве́рою и любо́вию чту́щих святу́ю па́мять твою́. Ты же, я́ко и́мущи дерзнове́ние ко Го́споду, моли́твами твои́ми сохрани́ град сей и лю́ди, от вся́ких бед, боле́зней и напра́сныя сме́рти изба́ви, вопию́щия Бо́гу: Аллилу́иа.
Икос 11
Светоприе́мная свеща́, во тьме ве́ка сего́ светя́щая, яви́лася еси́, блаже́нная ма́ти, привлека́ющая к себе́ сердца́ на́ша, да и ти́и, просвеща́емии тобо́ю, све́том за́поведей Бо́жиих осия́ются, и ны́не в немерца́ющем све́те Небе́снаго Чертога предстоя́щи, моли́твами твои́ми свет ве́чный сподо́би нас улучи́ти, зову́щих ти:
Ра́дуйся, свеще́, пред престо́лом Бо́жиим возжже́нная;
Ра́дуйся, кади́ло, моли́тву за нас непреста́нно вознося́щее.
Ра́дуйся, я́ко от честны́х моще́й твои́х то́ки чуде́с источа́еши;
Ра́дуйся, я́ко всем скорбя́щим и боля́щим благода́тную по́мощь подае́ши.
Ра́дуйся, нена́видящих и обя́дящих нас ми́ром Христо́вым огражда́ющая;
Ра́дуйся, о озло́бленных и гони́мых моли́твами твои́ми заступа́ющая.
Ра́дуйся, светоно́сный о́бразе терпе́ния;
Ра́дуйся, ти́хое приста́нище обурева́емых.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 12
Благода́ть от Бо́га прия́ти испроси́ нам, блаже́нная ма́ти, от щедро́т Бо́жиих, да изба́вимся от бед и ско́рбей, да укрепи́т в ве́ре, наде́жде и любви́ нас, немощны́х и уны́лых, и да сподо́бит ми́лостивно получи́ти проще́ние грехо́в и спасе́ние, вопию́щих Ему́: Аллилу́иа.
Икос 12
Пою́ще твоя́ чудеса́, ма́ти Матро́но, прославля́ем ди́внаго во святы́х Свои́х Бо́га, и моли́твами твои́ми ве́ру, наде́жду и любо́вь в нас утверди́, и во благи́х проше́ния на́ша испо́лни, зову́щих ти:
Ра́дуйся, свята́я пра́ведная, Го́сподом просла́вленная;
Ра́дуйся, блаже́нная ста́рице, Це́рковью Росси́йскою ублажа́емая.
Ра́дуйся, предста́тельство твое́ о нас простира́ющая;
Ра́дуйся, гре́шных ко спасе́нию призыва́ющая.
Ра́дуйся, неду́гующих и боля́щих посеще́ние;
Ра́дуйся, печа́льных и скорбя́щих утеше́ние.
Ра́дуйся, засту́пнице на́ша и покрови́тельнице;
Ра́дуйся, моли́твеннице о душа́х на́ших.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 13
О преблаже́нная ма́ти Матро́но, ны́не приими́ ма́лое сие́ моле́ние и хвалу́ на́шу, тебе́ приноси́мую, и умоли́ Го́спода Бо́га на́шего Иису́са Христа́ дарова́ти нам грехо́в проще́ние, жития́ исправле́ние, ми́лость и благода́ть, и Все́х Ца́рствие Небе́сное получи́ти, да с тобо́ю и все́ми святы́ми воспое́м Бо́гу: Аллилу́иа. (Этот кондак читается трижды).
Затем повторяются Икос 1 и Кондак 1.
Икос 1
А́нгел во пло́ти яви́лася еси́ на земли́, Матро́но блаже́нная, исполня́ющи во́лю Бо́жию. А́ще рождество́ твое́ в слепоте́ теле́сней бысть, но Госпо́дь, умудря́яй слепцы́ и любя́й пра́ведныя, просвети́ духо́внеи о́чи твои́, да послу́жиши лю́дем и дела́ Бо́жии явя́тся чрез тебе́. Мы же с любо́вию вопие́м ти такова́я:
Ра́дуйся, от младе́нчества Бо́гом избра́нная;
Ра́дуйся, благода́тию Ду́ха Свята́го от пеле́н осене́нная.
Ра́дуйся, да́ром чуде́с измла́да обогаще́нная;
Ра́дуйся, прему́дростию от Бо́га свы́ше испо́лненная.
Ра́дуйся, мы́сленныма очи́ма во́лю Бо́жию прозира́ющая;
Ра́дуйся, слепо́тствующих умо́м мудрецо́в ве́ка сего́ посрамля́ющая.
Ра́дуйся, ду́ши заблу́ждшия к Бо́гу приводя́щая;
Ра́дуйся, ско́рби и печа́ли утоля́ющая.
Ра́дуйся, пра́ведная ма́ти Матро́но, те́плая о нас к Бо́гу моли́твеннице.
Кондак 1
Избра́нная Ду́хом Бо́жиим от пеле́н младе́нческих, блаже́нная ста́рице Матро́но, слепоту́ и не́мощь теле́сную ко очище́нию духо́вному от Бо́га прия́вшая, да́ром прозре́ния и чуде́с обогати́лася еси́ и венце́м нетле́нным от Го́спода украси́лася еси́. Сего́ ра́ди и мы благода́рне вене́ц похва́льный прино́сим ти, вопию́ще: Ра́дуйся, пра́ведная ма́ти Матро́но, те́плая о нас к Бо́гу моли́твеннице.
---
Молитва святой блаженной Матроне Московской
Молитва первая
О блаже́нная ма́ти Матро́но, душе́ю на небеси́ пред Престо́лом Бо́жиим предстоя́щая, те́лом же на земли́ почива́ющая, и да́нною ти свы́ше благода́тию разли́чныя чудеса́ источа́ющая! При́зри ны́не ми́лостивным твои́м о́ком на ны, гре́шныя, в ско́рбех, боле́знех и грехо́вных искуше́ниих дни своя́ иждива́ющия, уте́ши ны, отча́янныя, исцели́ неду́ги на́ши лю́тыя, от Бо́га нам по грехо́м на́шим попуща́емыя, изба́ви нас от мно́гих бед и обстоя́ний, умоли́ Го́спода на́шего Иису́са Христа́ прости́ти нам вся на́ша согреше́ния, беззако́ния и грехопаде́ния, и́миже мы от ю́ности на́шея да́же до настоя́щаго дне и часа́ согреши́хом, да твои́ми моли́твами получи́вше благода́ть и ве́лию ми́лость, просла́вим в Тро́ице Еди́наго Бо́га, Отца́, и Сы́на, и Свята́го Ду́ха, ны́не и при́сно и во ве́ки веко́в. Ами́нь.
Молитва вторая (о замужестве, о детях, о здоровье)
О свята́я пра́ведная, блаже́нная ста́рице Матро́но! Помози́ ми (произнесите своё прошение: о замужестве, об исцелении, о рождении ребенка, о работе и т.д.). Со умиле́нием се́рдца моего́ к тебе́ прибега́ю, припа́даю к честны́м твои́м моще́м и усе́рдно молю́ся: умоли́ Го́спода на́шего Иису́са Христа́, да пода́ст мне здра́вие душе́вное и теле́сное. Ты ве́си, блаже́нная ма́ти, коли́кия ско́рби и боле́зни на ду́ши мое́й. Сего́ ра́ди сле́зно молю́ тя: предста́тельством твои́м у Го́спода Бо́га и Спа́са на́шего Иису́са Христа́ поми́луй мя (произнесите прошение), пода́ждь ми благода́ть и ве́лию ми́лость. Я́ко да просла́влю Пресвяту́ю Тро́ицу, Отца́ и Сы́на и Свята́го Ду́ха, ны́не и при́сно и во ве́ки веко́в. Ами́нь.
Дорогие друзья, подписывайтесь на мою страницу.
Поддерживайте посильной денежной помощью работу автора по ссылке>
