Денис Мантуров Башкортстан предприятиеләрендә булды
Башкортстанга эш визиты белән килгән Русия Хөкүмәте Рәисенең беренче урынбасары Денис Мантуров һәм республика Башлыгы Радий Хәбиров төбәкнең алдынгы инновацион сәнәгать предприятиеләрендә булдылар.
Денис Мантуров, аерым алганда, пилотсыз очу аппаратлары, электр двигательләре һәм алар өчен генераторлар җитештерү мәйданчыгы эше белән танышты.
Аннары Денис Мантуров һәм Радий Хәбиров ОДК-УМПОның җитештерү мәйданчыкларында булдылар һәм авиация тармагы өчен эшләнмәләр әзерләүнең уникаль технологияләре белән таныштылар. Шулай ук Башкортстан сәнәгать предприятиеләре продукциясе күргәзмәсендә булдылар.
Шул ук көнне Денис Мантуров һәм Башкортстан Башлыгы Радий Хәбиров махсус хәрби операция яугирләренә гуманитар ярдәм колоннасын озатуда катнаштылар.
Йөк составында - 17 автомобиль, шул исәптән «Урал», 11 "УАЗ" машинасы һәм 4 җиңел автомобиль, шул исәптән 3 «Нива». Хәрбиләргә, шулай ук, «Урал» мотоциклы, FPV-дроннар, генераторлар, маскировка челтәрләре, төзелеш материаллары һәм эш кораллары җибәрелде.
Соңрак Денис Мантуров һәм Башкортстан Башлыгы Радий Хәбировның эшлекле очрашуы булды. Көн тәртибендә - төбәк сәнәгатен үстерү һәм республиканың федераль үзәк белән үзара хезмәттәшлеге мәсьәләләре.
- Бүген без төбәкнең сәнәгать предприятиеләре эше нәтиҗәләре белән таныштык. Бу двигательләр төзү дә, пилотсыз системалар да. Күргәзмәдә станоклар төзү кластеры продукциясе тәкъдим ителде. Бу республика өчен дә, тулаем ил өчен дә иң перспектив юнәлешләрнең берсе. Бездә «Җитештерү һәм автоматлаштыру чаралары» гомумдәүләт проекты бар. Шуңа күрә без төбәктә инде яхшы билгеле булган инструментлар аша ярдәм күрсәтүне дәвам итәчәкбез, - диде Денис Мантуров.
Башкортстан Башлыгы Федераль сәнәгать сәясәтенең нәтиҗәлелеген югары бәяләде һәм республикада тармак үсешенең төп юнәлешләре турында хәбәр итте.
– Русия Хөкүмәте һәм Сәнәгать һәм сәүдә министрлыгының системалы ярдәме нәтиҗәсендә безнең предприятиеләр хәтта катлаулы шартларда да тотрыклы эшли, - дип ассызыклады Радий Хәбиров. - Регионда гамәлдәге производстволар модернизацияләнә һәм яңа производстволар барлыкка килә, компанияләр инновацион технологияләр кертәләр һәм көндәшлеккә сәләтле продукция чыгаралар.
Фото: glavarb.ru