Ғорурлыҡ һәм һоҡланыу менән һөйләйем
Башҡортостан ҡатын-ҡыҙҙар союзы рәйесе гүзәл заттарҙы байрам менән ҡотланы.
Матур йола буйынса, байрам алдынан “Торатау” конгресс-холында Халыҡ-ара ҡатын-ҡыҙҙар көнөнә арналған тантаналы сара уҙҙы. Башҡортостан Башлығы Радий Хәбиров ҡатнашҡан сараға МХО яугирҙәренең әсәләре һәм ҡатындары, күп балалы әсәләр, һөнәрендә, сәйәсәттә, эшҡыуарлыҡта, фәндә, сәнғәткә ҙур уңышҡа өлгәшкән гүзәл зат вәкилдәре саҡырылды.
Республикабыҙ ҡатын-ҡыҙҙары тураһында үҙ фекере менән Башҡортостан ҡатын-ҡыҙҙар союзы рәйесе, Иглин районы хакимиәте башлығы Гүзәл НАСИРОВА уртаҡлашты.
– Башҡортостан ҡатын-ҡыҙҙары хаҡында һөйләгәндә, мин һәр ваҡыт ҙур ғорурлыҡ һәм һоҡланыу тойғоһо кисерәм. Улар – көс һәм наҙ, аҡыл һәм матурлыҡ, фиҙакәрлек һәм сикһеҙ мөхәббәттең ғәжәп берләшмәһе. Гүзәл заттар – республикабыҙҙың йәне, уның ышаныслы таянысы һәм хәрәкәт итеүсе көсө.
Халыҡ-ара ҡатын-ҡыҙҙар көнө алдынан ҡатын-ҡыҙҙарҙың төбәгебеҙ үҫешендә ҙур роль уйнауын билдәләргә теләйем. Улар бөтә өлкәләрҙә лә уңышлы эшләй: мәғариф, һаулыҡ һаҡлау, сәнәғәт, ауыл хужалығы, мәҙәниәт һәм сәнғәт. Башҡортостан ҡатын-ҡыҙҙары предприятиелар һәм йәмәғәт ойошмаларын етәкләй, балалар тәрбиәләй һәм өлкән быуын тураһында хәстәрлек күрә, фәнни тикшеренеүҙәр алып бара һәм матур сәнғәт әҫәрҙәре ижад итә.
Бөгөн махсус хәрби операцияла ҡатнашҡан ҡатын-ҡыҙҙарға айырым рәхмәт һүҙҙәре әйтәм. Беҙҙең ҡыйыу яҡташтарыбыҙ хәрби табиптар һәм шәфҡәт туташтары булып хеҙмәт итә, яралы яугирҙәрҙең ғүмерен ҡотҡара, һуғыш яланында һәм штабтарҙа эшләй, хәрби бурыстар үтәй. Үҙҙәрен ҡурҡыныс аҫтына ҡуйып, улар иҫ киткес батырлыҡ һәм сыҙамлыҡ күрһәтә, шул уҡ ваҡытта шул уҡ һиҙгер, хәстәрлекле һәм яҡын кеше булып ҡала.
Ирекмән ҡатын-ҡыҙҙарыбыҙға рәхмәт. Махсус хәрби операцияның тәүге көндәренән үк улар беҙҙең яҡлаусыларға һәм уларҙың ғаиләләренә ярҙам итеү өсөн берләште. Уларҙың алтын ҡулдары маскировка селтәрҙәре бәйләй, окоп шәмдәре эшләй, йылы ойоҡбаш бәйләй һәм гуманитар йөк йыя. Һәр посылкала, һәр йыйылған күстәнәстә - уларҙың күңеленең бер өлөшө, әсә хәстәрлеге һәм еңеүгә ышанысы.
Республикабыҙҙа көслө ҡатын-ҡыҙҙар берләшмәһе эшләүе менән ғорурланам. Ҡатын-ҡыҙҙар советтары һәр ҡалала һәм районда меңәрләгән әүҙем, битараф булмаған ҡатын-ҡыҙҙарҙы берләштерә. Беҙ бергәләп социаль проекттарҙы тормошҡа ашырабыҙ, ғаиләләргә, балаларға һәм ололарға ярҙам итәбеҙ, традицияларҙы һаҡлайбыҙ һәм киләсәк булдырабыҙ.
Башҡортостандың ҡәҙерле ҡатын-ҡыҙҙары! Һеҙ – республикабыҙҙың төп байлығы. Һеҙҙең хеҙмәтегеҙ, сабырлығығыҙ, аҡыллылығығыҙ һәм, бөтә хәстәрлектәргә ҡарамаҫтан, матур, илһамландырыусы һәм мөхәббәтле булып ҡалыуығыҙ өсөн рәхмәт. Өйҙәрегеҙҙә һәр ваҡыт тыныслыҡ һәм татыулыҡ хөкөм һөрһөн, балалар уңыштар менән ҡыуандырһын, ә яҡындарығыҙ хәстәрлек менән уратып алынһын. Яҙ, мөхәббәт һәм матурлыҡ байрамы менән! – тине ул.
Фото: Иглин районы хакимиәте.
Беҙҙең МАХ каналына max.ru/gazetabash... ҡушылығыҙ!