Ռուսաստանի արտաքին գործերի նախարարության խոսնակ Մարիա Զախարովան, մեկնաբանելով «հիբրիդային հարձակումներին» հակազդելու համար արագ արձագանքման խումբ տեղակայելու՝ ԵՄ-ին ուղղված Երևանի խնդրանքի մասին հաղորդագրությունները, հայտարարել է, որ դա կլինի «մոլդովական սցենար», որը կնախագծվի Հայաստանի վրա։
Անցյալ տարի եվրոպացի մասնագետներ են աշխատել Քիշնևում՝ պնդելով, որ հակազդում են ռուսական ապատեղեկատվությանը։ Սակայն, գործնականում, նրա պնդմամբ, «արգելափակել են անհարմար ռեսուրսները՝ առանց իրավական հիմքերի՝ մաքրելով տեղեկատվական տարածքը Ռուսաստանի հետ կապված ամեն ինչից»։
Զախարովան ընդգծել է, որ այլ երկրների փորձը ցույց է տալիս, որ նման փորձագետների ներգրավումը դժվար թե ամրապնդի իրական ինքնիշխանությունը, հավելելով, որ Հայաստանը՝ որպես ԱՊՀ անդամ, կարող է նմանատիպ օգնություն խնդրել համագործակցության իր գործընկերներից։
Նա նաև նշել է, որ այս տեղեկատվության հիմնական տարածողներից մեկը «Ազատ Եվրոպա/Ազատություն» ռադիոկայանի հայկական մասնաճյուղն է, որը նա նկարագրել է որպես «արևմտյան հետախուզական գործակալությունների հետ կապված կազմակերպություն»։
Զախարովան նշել է, որ լրագրողները նամակ են ստացել ՀՀ արտաքին գործերի նախարար Արարատ Միրզոյանից, և հարցրել է, թե ինչպե՞ս է փաստաթուղթը հասել լրատվամիջոցներին՝ ենթադրելով, որ «հնարավոր է՝ առաջին հիբրիդային հարձակումն է եղել»։
Միրզոյանը փետրվարի 13-ին նամակ էր ուղարկել Բրյուսել՝ առաջարկելով ԵՄ-ին արագ արձագանքման խումբ տեղակայել՝ նախընտրական շրջանում երկրում հիբրիդային հարձակումներին հակազդելու համար: Նույն աղբյուրների համաձայն՝ ԵՄ-ն ոչ միայն ուսումնասիրում է նման տեղակայման հնարավորությունը ընտրությունների ողջ ընթացքում, այլև քննարկում է խմբի մշտական ներկայության տարբերակը: Միրզոյանը ԵԽԽՎ-ում հայտարարել էր, որ ԱԺ ընտրություններին ընդառաջ Երևանի դեմ հիբրիդային հարձակումները կսրվեն։
Նորություններին հետևեք մեր կայքում, ինչպես նաև Telegram-ում և YouTube-ում