Իրանից Թուրքիայի օդային տարածքի ուղղությամբ բալիստիկ հրթիռ է արձակվել, որը ոչնչացվել է, հայտնել են թուրքական ԶԼՄ-ները՝ հղում անելով երկրի պաշտպանության նախարարությանը։
Նշվում է, որ հրթիռն այսօր խոցվել և չեզոքացվել է Արևելյան Միջերկրականում տեղակայված ՆԱՏՕ-ի հակաօդային և հակահրթիռային պաշտպանության ստորաբաժանումների կողմից։
Գերատեսչությունը թուրքական NSosyal սոցիալական հարթակում նշել է, որ զինամթերքը հայտնաբերվել է այն բանից հետո, երբ այն անցել է Իրաքի և Սիրիայի օդային տարածքով և հաջողությամբ խոցվել է հակաօդային պաշտպանության համակարգերի կողմից։
Նախարարության տվյալներով՝ Թուրքիայի հարավում գտնվող Հաթայի նահանգի Դյորթյոլ շրջանում ընկած բեկորները պատկանել են այն խոցող հրթիռին, որը կիրառվել է սպառնալիքը ոչնչացնելու համար։
«Մեր երկրի և քաղաքացիների անվտանգությունն ապահովելու մեր վճռականությունն ու կարողությունները գտնվում են ամենաբարձր մակարդակում», - նշվում է հայտարարությունում՝ հավելելով, որ զոհեր չկան։
Նախարարությունն ընդգծել է, որ Անկարան հանդես է գալիս տարածաշրջանային կայունության և խաղաղության օգտին, սակայն լիովին ունակ է պաշտպանել իր տարածքն ու քաղաքացիներին ցանկացած ծագման սպառնալիքներից:
Գերատեսչությունը նշել է նաև, որ Թուրքիայի ցամաքային և օդային տարածքը պաշտպանելու համար անհրաժեշտ բոլոր միջոցները կձեռնարկվեն վճռականորեն և առանց հապաղման։
«Մենք իրավունք ենք վերապահում պատասխանել մեր երկրի դեմ ուղղված ցանկացած թշնամական գործողության», - ասվում է հայտարարությունում՝ զգուշացնելով բոլոր կողմերին զերծ մնալ տարածաշրջանային հակամարտության սրմանը նպաստող քայլերից։
Թուրքիայի նախագահի աշխատակազմի հաղորդակցության վարչության ղեկավար Բուրհանեթթին Դուրանը նույնպես NSosyal հարթակում հաստատել է, որ Անկարայի վճռականությունն ու կարողությունները՝ ապահովելու երկրի պաշտպանությունը, մնում են ամենաբարձր մակարդակում։
«Մեր ցամաքային և օդային տարածքը պաշտպանելու համար անհրաժեշտ յուրաքանչյուր քայլ կձեռնարկվի առանց հապաղման», - ասել է Դուրանը։
Իսրայելն ու ԱՄՆ-ն փետրվարի 28-ին հայտարարել էին Իրանի դեմ լայնածավալ մարտական գործողություններ սկսելու մասին: Ի պատասխան՝ Իրանը հայտարարել էր Իսրայելի և տարածաշրջանում ամերիկյան թիրախների դեմ հրթիռային գործողության մեկնարկի մասին: Մարտի 1-ին Իրանը հաստատել էր երկրի գերագույն հոգևոր առաջնորդ այաթոլլա Ալի Խամենեիի մահը: Երկու կողմում էլ զոհերի և տուժածների թիվը ժամ առ ժամ փոխվում է։
Նորություններին հետևեք մեր կայքում, ինչպես նաև Telegram-ում և YouTube-ում