утренняя молитва Василия Великого
Боже и Господи сил, и всея твари Содетелю,
Иже за милосердие безприкладныя милости Твоея
Единороднаго Сына Твоего, Господа нашего Иисуса Христа,
низпослал еси на спасение рода нашего
и честным Его Крестом рукописание грех наших растерзал еси,
и победил еси Тем начала и власти тьмы.
Сам, Владыко Человеколюбче,
приими и от мене грешнаго благодарственная сия и молебныя молитвы,
и избави мя от всякаго всегубительнаго и мрачнаго прегрешения,
и всех озлобити мя ищущих видимых и невидимых враг.
Пригвозди страху Твоему плоть мою,
и не уклони сердца моего в словеса или помышления лукавствия,
но любовию Твоею уязви душу мою,
да к Тебе выну взирая
и Тобою наставляем,
свет неприступный и присносущный зрю,
непрестанное Тебе исповедание и благодарение возсылаю,
Отцу Безначальному
со Единородным Твоим Сыном
и Всесвятым и Благим и Животворящим Твоим Духом,
ныне и присно и во веки веков. Аминь.
