25 кеше Башҡортостандың Әмирлектәрҙәге вәкиленә ярҙам һорап мөрәжәғәт иткән
Башҡортостан Башлығы Радий Хәбиров республика халҡының мөрәжәғәттәре өсөн ситуация үҙәге ойошторорға ҡушты.
Берләшкән Ғәрәп Әмирлектәренән сыға алмаған Башҡортостан халҡы махсус тура линияға мөрәжәғәт итә ала. Башҡортостан Башлығы Радий Хәбиров республика халҡының мөрәжәғәттәре өсөн ситуацион үҙәк эшен ойошторорға ҡушты.
Яҡын Көнсығышта эскалация башланғандан алып ике көн эсендә 25 кеше Рәсәйҙең Берләшкән Ғәрәп Әмирлектәрендәге Сауҙа вәкиллеге ҡарамағындағы Башҡортостан вәкиллегенә мөрәжәғәт иткән, тип хәбәр итте Башҡортостандың тышҡы иҡтисади бәйләнештәр һәм конгресс эшмәкәрлеге министры Маргарита Болычева.
“Барыһы ла иҫән, сәләмәт, вәкиллеккә йәшәү урынын, яңы ҡунаҡхана табыуҙы йәки фатирҙы ҡуртымға алырға ярҙам итеүҙе һорап мөрәжәғәт итә. Әлегә мөрәжәғәттәр ойоштороу һәм техник мәсьәләләр буйынса ғына булды", – тип хәбәр итте министр.
Мәғлүмәттәр буйынса, туроператорҙар ҡунаҡханала йәшәүҙе оҙайта йәки туристар өсөн альтернатива һайлай, тип өҫтәне Маргарита Болычева. Ул Яҡын Көнсығыштағы ауыр тормош хәленә эләккән Башҡортостан халҡына ярҙам итеү өсөн ситуация үҙәгенең берҙәм номерын эшләтеп ебәреү тураһында иғлан итте. Кол-үҙәк бөгөн, 2 мартта, эшләй башлар тип күҙаллана.
28 февралдә Америка Ҡушма Штаттары Иранға ҡаршы һуғыш башланы. Америкаға ярҙамға союздашы Израиль дә ҡушылды. Иран алдан иҫкәртеүенсә, ҡаршы һуғыша.
