Яңылары Республика көнөнә асыласаҡ
2025 йылда Башҡортостанда 82 мең самаһы кеше ГТО нормативтарын үтәне.
Былтыр Башҡортостанда 82 мең самаһы кеше “Хеҙмәткә һәм оборонаға әҙер” өтә Рәсәй физкультура-спорт комплексы нормативтарын үтәне. Был хаҡта республика Башлығы Радий Хәбиров уҙғарған оператив кәңәшмәлә вице-премьер – спорт министры Руслан Хәбибов хәбәр итте.
Башҡортостанда бөтәһе 66 тест үҙәге эшләй, улар бөтә муниципалитеттарҙы үҙ эсенә ала. ГТО комплексы саралары “Рәсәй спорты” дәүләт программаһы сиктәрендә тормошҡа ашырыла.
Уҙған йыл йомғаҡтары буйынса республика ГТО нормативтарын үтәүгә тотоноусылар һаны буйынса Волга буйы федераль округында – өсөнсө һәм илдә 11-се урынды биләне.
Тест һөҙөмтәһендә 35,4 мең кеше алтын отличие билдәһе ала, 23 мең кеше – көмөш, ә 23,5 мең кеше бронза менән бүләкләнә. Муниципалитеттар араһында иң юғары күрһәткестәрҙе Шишмә, Мәләүез һәм Саҡмағош райондары күрһәткән.
– Башҡортостанда ГТО нормативтарын үтәүгә өлкән быуын кешеләрен әүҙем йәлеп итеү өсөн уникаль программа тормошҡа ашырыла. ГТО нормативтарын “алтын”, “көмөш” һәм “бронза”ға үтәгән 60 йәштән өлкәндәргә физкультура-спорт ойошмаларына бушлай йөрөү өсөн 10 мең һумлыҡ сертификаттар тапшырыла, – тине Руслан Хәбибов. – Шуның арҡаһында ГТО нормативтарын үтәгән оло йәштәгеләр һаны 2022 йылдан алып 4,5 тапҡырға – 3 257 кешегә тиклем артҡан.
Шулай уҡ 6-17 йәшлек инвалидтар һәм һаулыҡ мөмкинлектәре сикләнгән кешеләр, ГТО нормативтарын үтәгән махсус хәрби операция ветерандары сертификаттар алыу хоҡуғына эйә.
Вице-премьер хәбәр итеүенсә, 2026 йылда төбәк биләмәһендә “Хеҙмәткә һәм оборонаға әҙер” комплексын үтәү өсөн тағы 15 майҙансыҡ булдырыу планлаштырыла. Бынан тыш, Башҡортостан пилот төбәге сифатында пилотһыҙ осоу аппараттары менән идара итеүҙе күҙ уңында тотҡан ГТО комплексын һынауҙа ҡатнашасаҡ.
Республика Башлығы Спорт министрлығы коллективына һөҙөмтәле эшләгәне һәм халыҡтың һаулығын нығытыуға индергән өлөшө өсөн рәхмәт белдерҙе.
– Муниципалитеттарҙа яңы майҙансыҡтар асыу Республика көнөнә планлаштырыла, – тине Радий Хәбиров.
Фото: Башҡортостан Башлығы сайты.