“Дошманны тар-мар итеп кайтырбыз!”
БПЛА операторы булып хезмәт итүче якташыбыз үзенең расчетын тату гаиләгә тиңләде.
Техника һәм кораллану дәрәҗәсе нинди генә булмасын, теләсә нинди хәрби операциянең уңышы яугирләргә, аларның батырлыгына, һөнәри осталыгына бәйле. Бүген пилотсыз очу аппаратлары операторлары махсус хәрби операция зонасында һөҗүм бүлекчәләренә бәяләп бетергесез ярдәм күрсәтә. Бу системаларны хәрбиләр үзләре “безнең күзләр” һәм югары төгәллектәге корал, ди. Пилотсыз очу аппаратлары разведкада, артиллерия утын кирәкле ноктага юнәлтүдә зур роль уйный. Бүгенге язмабызның герое Владимир – БПЛА операторы.
Аның позывное – “Унөченче”. Батыр якташыбыз 11 яшендә әти-әнисез калган, балалар йортында тәрбияләнгән. Тумыштан көчле рухлы булуы аңа язмыш сынауларына бирешмичә, тормышның сикәлтәле юлларыннан ышанычлы атларга ярдәм итә. Кечкенәдән ул музыка белән мавыга, җырларга ярата, дзю-до секциясендә шөгыльләнә. Максатчан булуы нәтиҗәсендә, буй җиткергәндә егет инде спорт мастерлыгына кандидат нормативын үти.
Махсус хәрби операциягә киткәнче ул электрик булып эшләгән, автомобильләр сату белән дә шөгыльләнгән. Оборона министрлыгы белән контракт төзергә карар кылуын ул болай аңлата:
– Беренчедән, Ватаныма хәвеф янаганда мин үземнең читтә кала алмавымны аңладым, икенчедән, контракт төзүнең матди яктан гаиләмә зур ярдәм булачагын да исәпләдем. Хатыныма контрактка кул куярга һәм махсус хәрби операциягә барырга җыенуымны әйткәч, ул, әлбәттә, шунда ук ризалыгын бирмәде, күз яшьләрен дә түкмәде, “Синең белән берәр нәрсә булса, мин улымны ничек ялгызым үстерермен?” – дип кенә сорады. Мин аны тынычландырырлык сүзләр табарга тырыштым.
Менә бер ел инде Владимир – Кызыл Байрак орденлы Суворов мотоукчылар полкының “Унөченче” позывнойлы яугире. Сержант расчет командиры, БПЛА өлкән операторы. Позывноеның сәер яңгыравын ул гади генә аңлата: “Минем өчен бу сан бәхетле дип әйтергә була һәм ул мине гомерем буе озата бара”.
– Безнең расчетта алты кеше, үзебезне “кара каргалар” дип атыйбыз, – ди сугышчы. – Расчет командиры буларак, мин бурыч куям, пилотсыз очкычлар белән дүрт оператор идарә итә. Бездә андый аппаратларның төрлесе бар: разведка юнәлешле квадрокоптер, дошманны тар-мар итү өчен дрон-камикадзе һәм башкалар. Подразделениедә “Баба-Яга” очкычы да бар. Ул – коммуникацияләрне, дошман позицияләрен шартлату, юлларны миналау максатында кулланылучы коточкыч көч. Без үзебезне бер гаилә итеп тоябыз, расчетыбыз инде бер ел диярлек хәрби бурычыбызны уңышлы үти. Иң өлкәнебезгә – 43, иң яшебезгә 19 яшь.
“Унөченче” сүзләренчә, гаскәрләребез тулы куәт белән алга бара, сугышчыларның кәефе яхшы. Владимир Покровск юнәлешендәге бәрелешләрнең берсендә ике дошман солдатын әсирлеккә алган. Аларның берсе кешеләрне көчләп сугышка җибәргән территориаль комплектлау үзәге хезмәткәре булып чыккан.
“Унөченче” позывнойлы якташыбыз батырлыгы өчен Суворов, “Махсус хәрби операциядә катнашучы”, полкның “Соңгы сүз – бездә” медальләре белән бүләкләнгән. Күптән түгел ул унбиш көнлек ялга кайтып китте, дуслары, туганнары, өч яшьлек улы Мирон белән рәхәтләнеп аралашты, хатыны Эльвина белән төрле мәдәни чараларда катнашты. Кыска ялы вакытында да Владимир, үз подразделениесе сугышчылары ихтыяҗларын онытмыйча, хатыны белән бергә егетләргә посылкалар җыярга ярдәм итте. Ул үзе белән бензопычкы, генераторлар, шуруповертлар, маскировка челтәрләре, газ баллоннары, озак саклана торган туклану продуктлары алып китте.
Исән-сау җиңү белән кайтуыгызны көтәбез, якташлар!
Альберт Вәлиев.
Кушнаренко районы.