"Монда куркыныч!"
Уфа туристлары Берләшкән Гарәп Әмирлекләреннән элемтәгә чыккан.
Уфада туып-үскән һәм элек телевидение тапшыруы алып баручысы булып эшләгән Элина Хаирова әлеге вакытта Дубайда ниләр булуы белән уртаклаша. Хатын ире һәм дүрт яшьлек кызы белән 27 февральдә Гарәп Әмирлекләренә ял итәргә киткән, ә 28 февральдә Дубайда шартлаулар башланган.
«Бездә Интернет эшләми, чөнки аны сүндерәләр. Туганнар белән элемтәгә керү һәм яңалыкларны уку өчен бушлай 500 мегабайт бирделәр. Безгә һәрвакыт, кунакханәдән чыкмаска һәм ерак сәфәрләргә китмәскә, дип игълан итеп торалар, — дип уртаклашты Элина социаль челтәрләрдә. - Без лайнерда тур сатып алдык, ләкин капитан маршрутны үзгәртергә һәм планлаштырылган датадан бер тәүлек үткәч кенә юлга чыгарга карар кабул итте. Без каютага урнаштык инде, ләкин өске палубага чыгарга рөхсәт ителми".
Аның сүзләренчә, алар ял итүне болай күз алдына китермәгән булган. Әмма, тулаем алганда, барысы да тынычлык сакларга тырыша.
"Еракта булса да, шартлау тавышларын ишетү куркыныч. Иң катлаулысы — үзеңнең бу очракта көчсез булуыңны аңлау. Моннан тыш, чыгып йөреп булмый", - ди Элина.
Билгеле булуынча, Башкортстанның Тышкы икътисади элемтәләр министрлыгы Якын Көнчыгышта авыр хәлгә тарыган башкортстанлыларга ярдәм итү өчен Ситуацион үзәкнең бердәм саннарын булдырырга ниятли. Башкортстаннан 25 кеше Берләшкән Гарәп Әмирлекләрендә Русиянең Сәүдә вәкиллеге каршындагы Республика вәкиллегенә ярдәм сорап мөрәҗәгать иткән. Төбәкнең тышкы икътисади элемтәләр һәм конгресс эшчәнлеге министры Маргарита Болычева сүзләренчә, кешеләр, нигездә, торак табуда ярдәм сорап мөрәҗәгать итә. Беренчел мәгълүматлар буенча, туроператорлар туристларга кунакханә арендасын озайтырга, яки альтернатива сайларга ярдәм итә.
Шулай ук, Русия Гадәттән тыш хәлләр министрлыгы махсус борт белән Мисырдан 84 кешене, шул исәптән 38 баланы алып кайткан. "Ил-76" самолеты «Жуковский» аэропортына төшеп утырган. Бортта Израиль территориясендә хезмәт итүче һәм Мисырга җир өсте транспорт төрләре белән килгән дипломатик хезмәткәрләр һәм аларның гаиләләре булган, дип хәбәр иттеләр ведомствоның матбугат хезмәтендә.
Khaleej Times мәгълүматлары буенча, Берләшкән Гарәп Әмирлекләрендә Иран ягыннан һөҗүм нәтиҗәсендә өч кеше һәлак булган һәм 60 кеше җәрәхәтләр алган.
Фото: "Башинформ"