Башкортстанның Бөре сәламәтлек саклау медицина округы хезмәткәрләре арасында кышкы спартакиада үткәрелде. Бу юлы сәламәтлек саклау алгы сызыгында эшләүчеләр “Яшьлек” физкультура-савыктыру комплексы һәм “көньяк” микрорайонындагы чаңгы трассасында үзләренең физик әзерлекләрен, команда рухын һәм спортка булган мәхәббәтләрен күрсәттеләр.
Башкортстанның Бөре сәламәтлек саклау медицина округы хезмәткәрләре арасында кышкы спартакиада үткәрелде. Бу юлы сәламәтлек саклау алгы сызыгында эшләүчеләр “Яшьлек” физкультура-савыктыру комплексы һәм “көньяк” микрорайонындагы чаңгы трассасында үзләренең физик әзерлекләрен, команда рухын һәм спортка булган мәхәббәтләрен күрсәттеләр.
Бәйгеләрдә Балтач, Караидел, Мишкә, Борай, Аскын һәм Бөре районнарыннан килгән командалар катнашты. Спорт бәйрәме күптән көтелгән вакыйга булды, ул районнар арасында даими элемтәләрне ныгытуга, коллективларда спорт традицияләрен үстерүгә этәргеч бирә.
Чараның тантаналы өлешендә БР Сәламәтлек саклау министры урынбасары Динара Ениикеева, РФ сәламәтлек саклау хезмәткәрләре профсоюзының республика оешмасы рәисе Рауль Халфин, район Хакимиятенең эшләр идарәчесе Эльмар Галимҗанов, үзәк район дәваханәсенең баш табибы Салават Гыйльметдинов барлык командаларны да сәламләп, ярышларда уңышлар теләделәр.
-Киләчәктә дә мондый спорт бәйрәмнәрен күбрәк үткәрү, хезмәт коллективларында спортны популярлаштыру, хезмәткәрләрнең сәламәтлеген ныгыту – безнең уртак максатыбыз булырга тиеш. Чөнки сәламәт хезмәткәр – көчле сәламәтлек саклау системасының нигезе, - дип билгеләде сәламәтлек саклау хезмәткәрләре профсоюзының республика оешмасы рәисе Рауль Халфин.
Ярышлар программасы шактый бай иде. Командалар чаңгы ярышлары, өстәл теннисы, йөзү, тюбинглар белән эстафета, “күңелле стартлар” кебек традицион бәйгеләрдә үзләрен сынадылар. Бу ярышлар һәр катнашучыдан көч, җитезлек, тапкырлык һәм, әлбәттә, команда булып эшли алу сәләтен таләп итте.
Балтач үзәк район дәваханәсе командасы районны лаеклы тәкъдим итеп, югары нәтиҗәләр күрсәтте: чаңгы ярышларында – икенче, өстәл теннисында – өченче, йөзү буенча – икенче, тюбинглар белән эстафета – икенче, “күңелле стартлар”да – беренче урынны алып, балтачлылар гомуми зачетта 2нче урынны яуладылар.
Биредәге спартакиада бары тик спорт ярышлары гына түгел, ә медицина хезмәткәрләренең бердәмлеген, дуслык һәм татулыкны ныгытучы мөһим чара булды. Төрле районнардан җыелган командалар ярышның һәр мизгелендә бер-берсен рухландырып, көч биреп, җиңү юлында бергә атладылар. Балтач командасының катнашуы һәм югары нәтиҗәләре, һичшиксез, аларның лаеклы әзерлегенең генә түгел, ә бердәм команда булулары, бер-берсенә ярдәм итәргә омтылышларының ачык мисалы. Һәр җиңү, һәр уңай нәтиҗә, хәтта сынаулар да, команда рухын ныгытты.