«Քաղաքացիական պայմանագիր» կուսակցությունը ձևավորել է նախընտրական ցուցակի երկրորդ մասը, որը կազմված է ազգային փոքրամասնությունների ներկայացուցիչներից, գրել է«Հրապարակը»։
Ըստ թերթի աղբյուրների՝ թեև կուսակցությունում մտադիր էին փոխել ասորի և քուրդ համայնքներից ներկայացուցիչներին, երկար փնտրտուքներից հետո կանգ են առել նույն թեկնածուների վրա, քանի որ նշված համայնքներում իշխանության գաղափարները կիսող «խելքը գլխին» երկրորդ մարդ չեն գտել։
Պարբերականի տեղեկություններով՝ եզդիական համայնքից կրկին ընդգրկվել է Ռուստամ Բաքոյանը, ռուսական համայնքից՝ Ալեքսեյ Սանդիկովը, քրդերից՝ Կնյազ Հասանովը, իսկ ասորիներից՝ Արսեն Միխայլովը:
Իշխող կուսակցությունը փետրվարի 13-15-ը կուսակցության կենտրոնական գրասենյակում անցկացրել էր ներկուսակցական ընտրությունների առաջին փուլը, որին մասնակցել էր շուրջ 1100 պատվիրակ: Նրանք 276 անձից բաղկացած ցուցակից ընտրել էին 50-ական թեկնածու:
Քվեարկության արդյունքներով ձևավորվել էր նախնական վարկանիշային ցուցակը՝ ձայների նվազման կարգով: ՔՊ-ում երկրորդ փուլի քվեարկությունը նշանակված է մարտի 27-28-ը: Այս փուլում պատվիրակները 50 թեկնածուից կընտրեն վարչապետի թեկնածուին և կորոշեն ցուցակի վերջնական հերթականությունը, ներառյալ՝ խորհրդարանի նախագահի և այլ պաշտոնների հավանական թեկնածուների տեղերը:
Նորություններին հետևեք մեր կայքում, ինչպես նաև Telegram-ում և YouTube-ում