Чаа-Хөл кожуун мээң чуртум

Чарынныг-Арт ажып кээрге,

Чаа-Хөл кожуун мээң чуртум.

Аалчыларын эптиг-ээлдек

Ак-Туруг суур уткуп алыр.

Карбаш кылдыр буттагылаар,

Катай каккаш дүжүргүлээр,

Мөчек-мөчек шынганнарлыг

Мөге эрлер чурту ол-дур.

Сарыг-Хөлчүк ажып кээрге,

Чаа-Хөл кожуун мээң чуртум.

Чоннуң оруу чоон болгаш

Чорумалдар ону ойбас.

Ховаган дег самнап ойнаар,

Хоюңнадыр бадыргылаар,

Чазык-чаагай бүдүш-чаңныг,

Чараш кыстар чурту ол-дур.

Адар-Төштеп ажып кээрге,

Чаа-Хөл кожуун мээң чуртум.

Ак-Хем бажы таңдыларга

Чажыым чажып, алгап чорууйн.

27. 02. 26

#енданбс

#шүлүктер