Hurmatli universitetimiz professor-o‘qituvchilari, xodimalar hamda aziz talaba-qizlar!
Sizlarni kirib kelayotgan 8-mart – Xalqaro xotin-qizlar kuni munosabati bilan chin qalbimdan samimiy muborakbod etaman.
Ayollar jamiyatimiz hayotida, ayniqsa, ilm-fan, ta’lim va sog‘liqni saqlash tizimida muhim o‘rin tutadi. Ularning fidokorona mehnati, yuksak mas’uliyati, bilim va salohiyati mamlakatimiz taraqqiyoti hamda yosh avlodni har tomonlama barkamol etib tarbiyalashda beqiyos ahamiyatga ega. Universitetimiz jamoasida faoliyat yuritayotgan professor-o‘qituvchi va xodima ayollar, shuningdek, ilm olish yo‘lida izlanayotgan talaba-qizlarimiz o‘z bilim va iste’dodi, intilishi hamda matonati bilan ta’lim va tibbiyot sohasining rivojiga munosib hissa qo‘shib kelmoqda.
Bugungi kunda sizlarning ilmiy izlanishlaringiz, pedagogik mahoratingiz hamda kasbiy fidoyiligingiz universitetimiz nufuzini yanada oshirishga xizmat qilmoqda. Shu bilan birga, sizlar jamiyatimizda mehr-oqibat, sabr-toqat va ezgulik timsoli sifatida alohida e’tibor va ehtiromga sazovorsiz.
Muhtaram ayollar!
Sizlarning jamiyatimiz hayotidagi o‘rningiz, oilalarimizdagi mehr-muhabbat va baraka manbai sifatidagi beqiyos hissangiz doimo yuksak qadrlanadi. Sizlarga mustahkam sog‘lik, baxt-saodat, oilaviy farovonlik, cheksiz quvonch hamda ilmiy va kasbiy faoliyatingizda ulkan muvaffaqiyatlar tilayman.
Yana bir bor 8-mart – Xalqaro xotin-qizlar kuni bilan barchangizni samimiy muborakbod etaman. Bayramingiz muborak bo‘lsin!
Hurmat bilan,
Shuxrat Boymuradov,
Toshkent davlat tibbiyot universiteti rektori, tibbiyot fanlari doktori, professor
🕊Telegram | 📱Facebook | 📱Instagram | 📺YouTube
