"Миңә ҡыйын булмаһын тип, ул да ураҙа тотҡайны"
Яуҙағы шул рус егете күптән түгел һәләк булып ҡуйҙы. Сыҙай алманым, иланым...
Махсус хәрби операциялағы бер яугирҙең һөйләгәндәрен тәҡдим итәбеҙ.
...2023 йылдың март айы. Госпиталдәмен. Рамаҙан айы яҡынлаша. Яҙмышым тураһында төрлө уйҙарға бирелеп, ниндәй генә хәлдә лә, ураҙа тотормон, тип ниәт иткәнмен: Аллаһ Тәғәлә минән риза ғына булһын, балаларымды, яҡындарымды һаҡлаһын...
Госпиталдән сығыуымдың икенсе көнөнә Рамаҙан айы башланды. Таңдан окоп ҡаҙабыҙ. Яҙғы туң балсыҡлы ер. Күп тә үтмәй, хәлем бөтә барғанын тоям. Янымда өҙлөкһөҙ хәбәр һөйләп, яңғыратып көлөп эшләп йөрөгән шаян урыҫ егете ҡапыл туҡтап ҡалып, етди төҫ ала. Йәһәтләп һыу алып килә. “Миңә ярамай бит, туған. Ураҙа”, – тип йылмайып, ярҙамын кире ҡағам. Иптәшем нимә эшләргә белмәй аптырап ҡала ла, йәшен тиҙлегендә ҡырҡа ҡарарға килә: “Тимәк, бөгөндән мин дә ураҙала!”
Бергәләп күтәрһәң, һәр һынау еңелерәк. Ихлас урыҫ егете, һүҙен тотоп, беҙҙең менән ҡуша (батальонда ике мосолман ураҙа тотҡайныҡ) дини ғәмәлде үтәп, оло ихтыяр көсөн күрһәтте. Уға ҡарап, гүйә, дәрт-дарманыбыҙ артты, минең иһә һыҙланыуҙарым да баҫылғандай тойолдо...
Хәҙер инде өйҙәмен. Әммә яуҙаштарымдан айырылмаған да һымаҡмын: көн дә хәлдәрен һорашып, аралашып торам. Күптән түгел бергә ураҙа тотҡан урыҫ егете һәләк булып ҡуйҙы. Сыҙай алманым, иланым... Рамаҙан һынауҙарын күтәрешкән хәрби ҡәрҙәшемдең йәнен Йәннәттә ҡылһаңсы, Аллаһ Тәғәләм...
Әлеге ураҙа айында шул рус егете айырыуса йыш иҫемә төшә. Ниндәй генә диндән, милләттән булыуыбыҙға ҡарамаҫтан, һәммәбеҙҙе лә һаҡлаһаңсы, Аллаһ Тәғәләм.
Фото: яугирҙең шәхси архивынан.
Беҙҙең МАХ каналына ҡушылығыҙ: max.ru/gazetabash...