ФОТОФАКТ
Ийэ тыл, сурук-бичик күнүн чэрчитинэн Хаҥалас улууһун муниципальнай архыыба «Саха суруга-бичигэ архыып докумуоннарыгар» диэн сахалартан бастакы тыл үөрэхтээх учуонай, уhулуччулаах сырдатааччы, саха маассабай суругун-бичигин төрүттээччи, сахалыы тылынан бастакы үөрэх кинигэлэрин суруйбут, бэчээттэтэн таһаарбыт Семен Андреевич Новгородов алпаабытынан суруллубут докумуоннар, суруктар быыстапкаларын туруорда.
- Быыстапкабытыгар Николай Гордеев «Былыргы олох сэбэрэтиттэн кэпсээннэр» диэн Новгородов алпаабытынан илиинэн суруллубут үлэтэ көрдөрүүгэ баар. Итиэннэ биир дойдулаахпыт, суруйааччы Исай Никифоров «Кыым», «Большевистскай тэрийээччи» хаһыаттарга бэчээттэммит кэпсээннэрэ, фронтан суруктара киэҥ көрдөрүүгэ турдулар. Ону таһынан биһиги архыыппытыгар харалла сытар 1933-1934 сс. Арҕаа Хаҥалас оройуоннааҕы исполкомун дьаһаллара, боротокуоллара эмиэ киирдилэр, — диэн муниципальнай архыып сэбиэдиссэйэ Ольга Соловьева билиһиннэрдэ.
Ольга Гермогенова.
Ааптар хаартыскаҕа түһэриитэ.
