Ватанды һаҡлаусылар көнө уңайынан Сермән мәктәбе спортзалында мини-футбол буйынса турнир үтте. Спорт сараһы уҡытыусы, махсус хәрби операцияла ҡатнашыусы ауылдаштары Рәзим Сафин иҫтәлегенә бағышланды.
Яугирҙың тормош иптәше Айгөл Сафина спортсыларҙы сәләмләп, турнирҙы ойоштороусылар - ауыл хакимиәтенә, Сермән мәктәбенә һәм футболсыларға сикһеҙ рәхмәтен белдерҙе.
- Рәзим Рәшит улы үҙе лә спортты яратты, шуға был сараны ғаиләбеҙ менән йылда көтөп алабыҙ. Быйылғы турнир Ватанды һаҡлаусылар көнө алдынан уҙғарылыуы икеләтә мәртәбәле, - тине ул.
Өсөнсө тапҡыр ойошторолған ярышта барлығы биш команда ҡатнашты. Уйын ҡыҙыу барҙы, әле бер команда, әле икенсеһе ҡапҡаға туп индереп торҙо.
Шулай итеп, көсөргәнешле ярышта лайыҡлы I урынды яугирҙың туғандары яулаһа, II урынға Сермәндең "Толпар", III урынға студенттар командалары сыҡты. "Ямантау" командаһы һәм мәктәп уҡыусылары IV, V урындарҙы биләне.
Ярыштың бағыусылары булған Сафиндар ғаиләһе командаларға, ярыштың иң яҡшы спортсыларына иҫтәлекле бүләктәр тапшырҙы.
