Мәскәүҙә уҡыған Башҡортостан студенттары менән осрашыу уҙҙы
Йәнле аралашыу форматы сараның төп үҙенсәлеге булды, ул студенттарға спикерҙарға туранан-тура мөрәжәғәт итергә, үҙҙәрен борсоған һорауҙарҙы бирергә һәм үҙ башланғыстары менән таныштырырға мөмкинлек бирҙе.
18 февралдә Мәскәү ҡалаһында Рәсәй Федерацияһы Президенты ҡарамағындағы Башҡортостан Республикаһының Тулы хоҡуҡлы вәкиллегендә Башҡортостан студенттары һәм аспиранттары ассоциацияһы әүҙемселәре һәм йәш белгестәр республиканың дәүләт һәм йәмәғәт эшмәкәрҙәре менән осрашты. Сара йәштәр сәйәсәтенең, һөнәри үҫештең һәм кесе Ватан менән үҙ-ара эш итеүҙең көнүҙәк мәсьәләләрен тикшереүгә йүнәлтелгән асыҡ диалог форматында уҙҙы.
Осрашыуҙа РФ Федераль Йыйылышы Дәүләт Думаһы депутаты, Бөтә донъя башҡорттары ҡоролтайы президиумы рәйесе Эльвира Айытҡолова, Халыҡ-ара шашка буйынса ете тапҡыр донъя чемпионы Тамара Танһыҡҡужина, «Геройҙар ваҡыты» федераль программаһында ҡатнашыусы, подполковник, Батырлыҡ ордендары кавалеры Денис Камалетдинов ҡатнашты.
Йәнле аралашыу форматы сараның төп үҙенсәлеге булды, ул студенттарға спикерҙарға туранан-тура мөрәжәғәт итергә, үҙҙәрен борсоған һорауҙарҙы бирергә һәм үҙ башланғыстары менән таныштырырға мөмкинлек бирҙе.
Фекер алышыу барышында күп балалы ғаиләләрҙе торлаҡ менән тәьмин итеүҙән һәм һайлаусылар менән эшләү механизмдарынан алып Мәскәүҙә күп милләтле үҙәк ойоштороу перспективаларына һәм республикаға ҡайтҡан йәштәр өсөн ярҙам программаларына тиклем киң спектрҙағы мәсьәләләр күтәрелде. Сарала ҡатнашыусылар халыҡ-ара бәйләнештәрҙе үҫтереү, шул иҫәптән Бойондороҡһоҙ Дәүләттәр Берләшмәһе илдәрендә Башҡортостан вәкиллектәрен асыу мөмкинлектәрен тикшерҙе. Мәскәү вуздары студенттары өсөн эшкә урынлашыу, маҡсатлы уҡытыу, медицина туризмын үҫтереү һәм ихтыяжлы һөнәрҙәр буйынса эксперттар берләшмәһен булдырыу мәсьәләләренә айырыуса ҙур иғтибар бүленде.
Кисә аҙағында РФ Дәүләт Думаһы депутаты Эльвира Ринат ҡыҙының ярҙамсыларына таныҡлыҡтар тапшырыу тантанаһы үтте. Улар – әүҙем гражданлыҡ позицияһын күрһәткән һәм республиканан ситтә социаль проекттар лидерҙары булған башҡорт йәштәре әүҙемселәре.
Бындай саралар республика менән төбәктән ситтә уҡыған йәш граждандар араһында бәйләнештәрҙе нығытыуҙа мөһим роль уйнай. Тура һәм ышаныслы диалог студенттарҙың һорауҙарына тиҙ арала яуап бирергә, перспективалы кадрҙарҙы асыҡларға һәм уларҙың башланғыстарына ярҙам итергә мөмкинлек бирә.
Беҙҙең МАХ каналына https://max.ru/gazetabashkortostan ҡушылығыҙ!
Текст авторы: Альбина Сарвартдинова.
Сәлим Яҡупов фотоһы.