💂❤️Дзяржпрапаганда зрабіла клон «Зеркала» ў TikTok з фэйкамі пра Польшчу. У якасці лагатыпа выкарыстоўваўся крыху зменены варыянт лога «Гродзенскай праўды»
TikTok закрыў першую старонку, але ўжо створаны новыя каналы.
У TikTok з’явіўся канал, дзе згенераваная штучным інтэлектам вядучая расказвала фэйкі пра Польшчу на рускай мове, заўважыла выданне @nashaniva
Назва канала падобная да назвы аднаго з самых папулярных беларускіх выданняў — «Зеркала». Пры гэтым дызайн лагатыпа амаль цалкам паўтарае, з невялікімі зменамі, лагатып галоўнай дзяржгазеты Гродзенскай вобласці — «Гродзенскай праўды».
«Наша Ніва» сцвярджае, што акаўнт, магчыма, звязаны з галоўным рэдактарам «Гродзенскай праўды».
Першы ролік на канале апублікавалі 3 лютага ў 17:15 з загалоўкам «У Польшчы правал з наборам у войска». За гадзіну да публікацыі першага відэа назву канала змянілі на Zerkalonews. Аватар таксама нагадвае фірмовы стыль «Зеркала».
Іншыя ролікі зроблены ў падобнай манеры — з гучнымі загалоўкамі і дэзынфармацыяй унутры: «Палякі замярзаюць», «Польшча застанецца без пошты», «У Польшчы няма каму працаваць?».
Відэа з канала Zerkalonews, які меў крыху больш за 100 падпісчыкаў, актыўна каментаваў акаўнт tatyanasv03 з фота Таццяны Сяргеевай — галоўнага рэдактара абласной газеты «Гродзенская праўда». Апошняе відэа на яе старонцы — ШІ-версія яе фатаграфіі ў вечаровай сукенцы. Таксама яна публікуе відэа з дзяржаўных крыніц і крытыкуе праціўнікаў рэжыму Лукашэнкі.
«Наша Ніва» адзначае, што пакуль рэдакцыя рыхтавала публікацыю, TikTok заблакаваў канал — магчыма, за парушэнне правілаў платформы.
Разам з тым ужо мы заўважылі, што з’явіліся як мінімум два падобныя каналы з такім жа лагатыпам замест заблакаванага — з нікнэймамі zerkalonews1 і zerkalonews2. На першым з іх ужо з’явілася першае відэа, аднак падпісчыкаў там пакуль зусім няма.
