У выставачнай зале гісторыка-краязнаўчага музея пахне свежасцю. Не той прахалодай, што прыходзіць з вуліцы, а той, што нараджаецца на палотнах, калі творца піша росны ранак на ўскрайку лесу альбо неба з прыгожымі аблокамі.
19 лютага ў смаргонскім музеі адбылося адкрыццё выставы «Пейзажы маёй Радзімы» мастака Вячаслава АЎГУСЦІНОВІЧА.
Для Смаргоншчыны гэта падзея асаблівая. Вячаслаў Станіслававіч хоць і жыве цяпер у Мінску, але родам з вёскі Замосце, што непадалёку ад Войстама. Тут ён нарадзіўся ў 1959 годзе і вучыўся да 5 класа. Многія яго работы – гэта лісты дадому, на малую радзіму. Пейзажы, якія перадаюць той самы «смак» дзяцінства, знаёмы кожнаму, хто вырас на Смаргоншчыне. Карціны – пра нашу Смаргоншчыну і ўвогуле пра Беларусь, а знайсці іх можна ў прыватных калекцыях жыхароў Расіі, Кітая, ЗША, Швейцарыі, Італіі, Польшчы… Піша Вячаслаў Станіслававіч і абразы, вернікі смаргонскай парафіі Святога Міхала Арханёла добра ведаюць пра гэта.
Майстра, які скончыў Беларускі тэатральна-мастацкі інстытут яшчэ ў 1986 годзе, прайшоў школу прамысловага мастацтва і нават працаваў у галіне мастацкай галаграфіі. Але сэрца, як аказалася, заўсёды ляжала да жывога, даўняга, да таго, што не патрабуе тэхналогій, а толькі – творчага погляду і пэндзля.
На экспазіцыі прадстаўлена 40 палотнаў. Кожнае – як асобная песня. Пра краявіды Засмосця, Войстама, Залесся, Гарадзілава, Беніцы… Дрэвы, кусты, кветкі, хаты, валуны – на палотнах мастака ўсё гэта жыве, дыхае і, здаецца, нават мае пах. Яго пейзажы – не проста прыгожыя малюнкі, а найперш нашы эмоцыі, гісторыя, лёс, памяць.
…На адкрыцці выставы былі тыя, хто памятае Вячаслава Аўгусціновіча яшчэ дзіцем, і тыя, хто ўпершыню адкрывае для сябе яго творчасць. Сярод гасцей, якія з захапленнем гаварылі пра талент галоўнага героя выставы, – прадстаўнікі творчай інтэлігенцыі: старшыня творчага аб’яднання «Вечеря», дацэнт юрыдычнага факультэта БДУ Сяргей Далгарукаў, даследчык гісторыі і культуры кніг Беларусі Валерый Герасімаў, пісьменнік, перакладчык мастак, гісторык, фатограф Юрый Кур’яновіч, мастачка Галіна Бяганская, смаргонская паэтка, былая аднакласніца мастака Вера Вайцюль, галоўны спецыяліст аддзела культуры райвыканкама Наталля Чудакоўская.
Выстава будзе працаваць да 9 сакавіка. Той выпадак, калі варта адкласці ўсе справы і накіравацца ў музей, бо, як вядома, лепш адзін раз убачыць: ні адна рэпрадукцыя не перадасць таго самага паветра, якім цяпер напоўнена выставачная зала.
Галіна АНТОНАВА
Фота аўтара
Теги: общество культура новое в жизни города