Өфө нефть-техник университеты "Кадрҙар резервы" программаһын булдырған
Квалификацияны күтәреү программаһы буйынса юғары уҡыу йортоноң 27 хеҙмәткәре уҡып сыҡҡан да инде
Евразия фәнни-тикшеренеү үҙәгенең вуз-ара студенттар кампусы резиденты булған Өфө дәүләт нефть техник университеты (ӨДНТУ) “Кадрҙар резервы” квалификацияны күтәреү программаһын әҙерләгән. Юғары уҡыу йортоноң 27 хеҙмәткәре белем камиллаштырыу курсын үткән дә инде.
Ойоштороусылар үҙ алдына бер нисә бурыс ҡуйған. Беренсенән, кафедра коллективтарын юғары уҡыу йортондағы эш процестары менән ентеклерәк таныштырырға һәм үҙ-ара эш итеү алымдарын булдырырға. Икенсенән, подразделениелар эшендә үҙгәрештәргә дәртләндереү һәм уларҙы ӨДНТУ-ның үҫеш программаһы менән тап килтереү.
– Университеттың мөһим бурыстарының береһе – кафедраларҙың үҙ-ара бәйләнештәрен үҫтереү. (...) Ошондай эш итеүҙе ойошторорға ярҙам итерлек майҙансыҡтар булдырырға итәбеҙ, – тип уртаҡлаша ӨДНТУ-ның фәнни һәм инновацион эштәр буйынса проректоры Денис Гулин.
Беренсе төркөм уҡыуында юғары уҡыу йортоноң туғыҙ кафедраһы командаһы ҡатнашҡан. Мөдирҙәрҙән тыш, уларға һәр подразделениенан үҫеш программаларын формалаштырыуҙа ҡатнашҡан икешәр хеҙмәткәр ингән.
“Иҡтисад һәм стратегик үҫеш” кафедраһы мөдире Илвир Фазрахманов фекеренсә, мәғариф өлкәһендәге хеҙмәт асылы, бөтә иҡтисадтағы кеүек үк, үҙгәрә. Кафедра мөдире бөгөн уҡытыусы йәки ғилми хеҙмәткәр генә түгел, ә бер аҙ менеджер, иҡтисадсы, аналитик та булырға тейеш.
Программаның һәр модулендә, ӨДНТУ уҡытыусыларынан тыш, саҡырылған эксперттар ҙа ҡатнашҡан.
– Белем биреү сифаты тураһында һөйләгәндә, йыш ҡына студенттарға ҡарайбыҙ. Әммә бының араһында көн һайын аудиторияға һәм лабораторияларға ингән уҡытыусылар, кафедра мөдирҙәре, деканат хеҙмәткәрҙәре юғалып ҡала, – ти Башҡортостандың Фән һәм юғары белем биреү буйынса дәүләт комитеты рәйесе Светлана Мостафина. Уның фекеренсә, вуз-ара кампус резиденты ҡыйыу эш башҡарған – иғтибарҙы уларға күсергән. Шулай итеп, быға тиклем бер-береһе менән хеҙмәттәшлек итмәгән кафедралар араһында фән-ара проекттар барлыҡҡа килә башлаған. Вуз-ара кампус ошондай файҙалы хеҙмәттәшлеккә юл асыуға һәләтле.
БР Хөкүмәтенең матбуғат хеҙмәте мәғлүмәттәре буйынса.